21
Levi Phung Mite Khopi Ho
1 Hiche jou chun Levi phung sunga lamkaiho chu ahungun Eleazer thempupa toh, Nun chapa Joshua toh chuleh Israel pumpi phung lamkaiho ahung kihoutoh piuvin ahi.
2 Amaho chu Canaan gam'a Shiloh munna ahungun hiti hin asei uve, “Keiho hi ka gancha teu neh ding hampa phatna gam leh keiho chenna ding khopiho eipehna diuvin Pakaijin Mose kom'ah ana seijin ahi,” atiuve.
3 Hiti chun Pakai thupeh dungjuijin Israel mipite chun hiche khopiho le hampa phatna gamho hi amaho gam chan dingin Levi te chu ana peuvin ahi.
4 Levi phung sunga konna Kohath phung bahkai insung miho Aaron chilhah ho chu atil abul'a Judah, Simeon leh Benjamin phungho ana kipe khopi som le thum ho chu ape tauvin ahi.
5 Tumasang Ephraim, Dan leh Manasseh phung akehkhat ana kipesa khopi somkhat chu Kohath phungkhai insung midang ho chu ana peuvin ahi.
6 Tumasang’a Issachar, Asher, Naphtali chuleh Manasseh phung kehkhat ana kipesa khopi som le thum chu Gershon phung bahkai ho chu ana peuvin ahi.
7 Tumasang’a Reuben, Gad leh Zebulun phungho ana kipesa khopi som le ni ho chu Merari phungkai ho chu ana peuvin ahi.
8 Pakaijin Mose ana thupeh dungjuijin Israel chaten khopi hichengse hileh hamhing phatna gam hicheng hi vang kisanpeh bang-banga Levi te anapeh u ahiye.
9 Judah leh Simeon phunga kon'in Israel chaten khopi hichengse hi anape tauve.
10 Akhopi chengse hi Aaron chilhah ho Kohath chate insung leh Levi miho ma-ma insung khat acheng tauvin ahi, ajeh chu vang kisan chu amaho dia hung masa ahi.
11 Israel chaten amaho chu Kiriath-arba kiti (hichea Arba hi Anak pa ahin, akhopi Hebron jong akiti) Juda thinglhang gam'a khopi le akimvel'a hamhing gam chengse chu ape tauve.
12 Khopi gal'a loujao chengse le akhoneo ho vang chu Jephunneh chapa Caleb chenna dinga kipesa ahitai.
13 Aaron thempupa chilhah te chu Israel chaten mithat ho kiselna khopi Hebron le ahamhing gamsung jouse apeuvin, Libnah le ahamhing gam pumpi jong ana peuve.
14 Jattir khopi le Eshtemoa ahamhing gam jong apeuvin ahi.
15 Holon le ahamhing gam jouse apeuvin, Debir le hamhing gam jong apehtha uvin ahi.
16 Chule Ain khopi le ahamhing gamsung apehtha uvin, Juttah le ahamhing gam jong apeuve. Beth-shemesh le ahamhing apehtha uvin, hiti chun hiche phungni sunga kon hin khopi ko apedoh tauve.
17 Benjamin phunga kon'in Gibeon khopi le ahamhing gam jong apeuvin, Geba le ahamhing gam jong apeuvin,
18 Anathoth khopi le ahamhing gamsung se-se toh apumin Almon khopi le ahamhing gamsungse jong apeuvin ahi.
19 Aaron thempupa chilhah achate chan khopi chengse chu abonchan khopi som le thum toh ahamhing gamsungse toh ahopthan ahi.
20 Levi mite lah a Kohath insungmi, Kohath chate amoh chengse chu Ephraim phunga konna achan diu khopi akihoppeh tai.
21 Hiche Kohath chate amoh chengse chu mithat ho kiselna ding khopi Shechem le ahamhing gamsunga Ephraim thinglhang gamsung chu apeuvin, Gezer khopi le ahamhing gamsung jong apeuvin ahi.
22 Kibzaim khopi le ahamhing gam jong apeuve, khopi li alhingin ahi.
23 Chule Dan phunga kon'in Eltekeh khopi le ahamhing gam apeuvin Gibbethon khopi le ahamhing gam apeuve;
24 Aijalon khopi le ahamhing gam jong apeuve, khopi li ma alhingin ahi.
25 Manasseh phunga kon'in jong Taanach khopi le ahamhing gam apeuvin Gath-rimmon khopi le ahamhing gam apeuve; hichu khopi ni ahi.
26 Kohath chate amoh chengse insung mite chan khopi chu abonchan khopi somkhat le ahamhing gam jouse toh ahopthai.
27 Levi te inko lah a insung khat Gershon chate jong chu Manasseh phung kehkhat a kon'in asan diu chu apeuvin, Bashan gamsungse Golan khopi le ahamhing gamsungse apeuve; hiche khopi jong mithat ho kiselna khopi ma-ma ahi, chule Be-eshterah khopi le ahamhing gamsung jong ahin, khopi ni hi apeuvin ahi.
28 Chujongleh Issachar phunga kon'in jong Kishion khopi le ahamhing gamsung apeuvin, Daberath khopi le ahamhing gamsung se-se jong apeuve.
29 Chule Jarmuth khopi le ahamhing gamsung apeuvin, En-gannim khopi le ahamhing gamsung jong apehtha uvin ahile, khopi li alhingin ahi.
30 Asher phunga kon'in jong Mishal leh Abdon khopi le ahamhing gam jong apeuve,
31 Helkath khopi le ahamhing gamsung jong apeuvin chule Rehob khopi le ahamhing gam jong apeuvin ahileh khopi li ma alhingtai.
32 Naphtali phung sunga kon'in jong Galilee gamsunga Kedesh le ahamhing gamsung jong apeuvin, hiche khopi jong hi mithat ho kiselna khopi ma ahi, Hammoth-dor le ahamhing gamsung jong apeuvin, chule Kartan khopi le ahamhing gamsung jong apehtha uvin, abonin khopi thum alhingtai.
33 Gershon chate inko chujat dinga khopi kipedoh chengse chu abonchan khopi som le thum alhingin ahamhing gamsung se-se toh ahi tha cheh in ahi.
34 Levi te mi amoh chengse, Merari chate chu Zubulun phunga kon'in achan diu akipen, Jokneam khopi le ahamhing gamsung apeuvin, Kartah khopi le ahamhing gamsung apeuve.
35 Dimnah khopi le ahamhing gamsungse apeuvin, Nahalal khopi le ahamhing gamsung jong apeuve, abonin khopi li alhingin ahi.
36 Reuben phunga kon'in jong Bezer khopi le ahamhing gamsung chu apeuvin, Jahaz khopi le ahamhing gamsungse jong apeuve.
37 Kedemoth khopi le ahamhing gamsungse apeuvin chule Mephaath khopi le ahamhing gamsungse jong apeuvin ahileh khopi li alhinge.
38 Gad phunga kon'in jong Gilead gamsunga Ramoth khopi le ahamhing gamsungse apeuvin, hiche khopi jong hi mithat ho kiselna khopi ma-ma ahiye; Mahanaim khopi le ahamhing gamsung jong apeuvin,
39 Heshbon khopi le ahamhing gamsungse jong apeuvin, Jazer khopi le ahamhing gamsungse apeuvin ahileh abonin khopi li alhingin ahi.
40 Merari chate inko chujatpi Levi inkote lah a aum nalaiho dia kipedoh khopi chengse abonchan khopi som le ni alhingin ahi.
41 Israel chate lah a Levi te khopi chengse chu abonin khopi somli le get alhingin, ahamhing gamsung se-se toh ahitha cheh in ahi.
42 Khopi hijat chun akimvel khopam dunga hamhing gam anei cheh uvin, hitobanga hi khopi chujat chu changsoh hel ahiuve.
43 Hitobang hin apu apateu henga akihahselna bang bangin Pakaijin Canaan gam pumpi chu Israel te apetai; Israel ten jong agam pumpi chu atoupha uvin acheng tauve.
44 Chujongleh apu apateu henga akihahselna bang chun Pakaijin Israel te chu ajet aveiya mitea kon'in akicholdo sahtai; agalteu khatna khat jengcha jong amaho ting tan jouvah abeihel tan ahi; ijeh nem itileh Pakaijin agalteu abonchan akhut uva apedoh tan ahi.
45 Pakaijin Israel te insung dinga akitepna pha chengse chu khatcha alhinglel abei hellin, abonchan athutep chengse aguilhung sohkeijin ahi.