17
Elijah Themgao Va-Ah Ten Avah
1 Gilead gamsung, Tishbe khoa konna hung Elijah in Ahab lengpa kom'ah, “Akin katoh jing, hingjing Pakai Israel Pathen min’a kasei ahi, ‘Keiman thu kapeh tokahsea kum phabep sunga hi gotwi leh daitwi lha louding ahi!” ati.
2 Hijou chun Pakaijin Elijah kom'ah hitin ahinsei tai,
3 “Hiche mun hi dalhan lang, Jordan luigal niso lam, Kerith vadung kom'a khun gakisel tan.
4 Hiche vadung’a twi hi don inlang chuleh va-ah ten ahin poh ho chu nejingin, ajeh chu keiman an nahin pohpeh ding’a ka nganse ahi,” ati.
5 Elijah chun Pakaijin aseipeh bang bangin abol in, Jordan solang Kerith vadung pang’a chun apansa tan ahi.
6 Va-ah te chun jingkah nilhah in anneh ding changlhah le sa ahin pohpeh jin chuleh vacha twi chu adonjin ahi.
7 Ahin chomkhat jouvin hiche vadung jong chu akang tan ahi, ajeh chu gamsung’a go ana ju tapon ahi.
Zarephath Khoa Maithainu
8 Hiti chun Pakaijin Elijah kom’a thu ahin seiye,
9 “Nangma chen lang Sidon khopi kom’a Zarephath khoa gache tan. Nangma vah dinga Keiman meithainu kathupeh ahitai,” ati.
10 Ama Zarephath ah achen, akhosung kelkot phung agah lhun phat in, meithai khat in thinggo ana chom amun amanu kom'a chun, “Lungset tah in khon khat a twi themkhat nei hinpe thei dem?” atin ahi.
11 Amanu chun twi agaso got leh, aman, “Changlhah themkhat jong neihin choipeh in,” ati.
12 Ahin amanun jong ajah a, “Pakai na Pathen min'a kihahsel’a kasei ahi, insung’a changlhah hal khatcha jong ka neipoi, belsung’a changbong khut dimkhat seh kanei tan, hai sunga thao themcha bou kanei tai, tua thingkang themkhat kachom jong hi hiche changbong hile thao hi kasuhto a kei le ka chapa ding’a ka kan’a, ka nehjou lhon teng ka thi dinga ka gellhah lhon ahitai,” ati.
13 Ahinlah Elijah in amanu kom'a chun, “Lunggim hih in! Nasei chu bol jengin, ahinla changlhah themkhat kei dingin hinbol masan, chujou tengleh aval chu nang le na chapa neh dingin kibol lhon nan nate.
14 Ajeh chu hiche hi Pakai Israel Pathen'in asei ahi, belsung’a changbong chun beitih anei louhel ding, haisung’a thaotwi jong chu beitih nei louva um ding, gamsung’a Pakaijin gotwi ahin juhsah masangsea hitia chu neng jing jeng ding ahi, tin aseiye,” ati.
15 Hichun meithainu jong achen Elijah seibang bangin agabol tai, amanu ahin Elijah ahin, chuleh amanu insung mi ahiuvin an chu ni sottah aneuvin ahi.
16 Belsung’a an jong chu abeithei tapon, hai sunga thaotwi jong chu alhasam kha tapoi, Pakaijin Elijah jah a aseibang bangin aumtai.
17 Phat chomkhat jouvin hiche numeinu chapa chu ahung dammo tai. Ama dammo chu ahungkhoh cheh-cheh jeng tan, achaina in ahung thitan ahi.
18 Hijou chun meithainun Elijah kom’ah, “Vo Pathen mipa ka chunga hi ipi nabol hitam? Hilaiya hi ka chonset ho Pathen henga phongdoh dia hikom'a hunga, ka chapa thilo sah nahim?” ati.
19 Ahin Elijah in adonbut in, “Na chapa chu neihin pen,” ati. Anu pheichung’a akon chun akidop doh in, indan chung’a agejina a chun adom touvin alupna jalkhun achun alupsah in ahi.
20 Hichun Elijah chu Pakai heng’a ataovin, “Vo Pakai ka Pathen, keiman lhunna a kaneiji hiche meithainu chunga hi hamsetna na chuhsah a achapa hi nathi sah ding hitam?” ati.
21 Hichun hiche chapangpa chunga chun thumvei alum’in, Pakai kom’ah chun apeng jah jengin, “O Pakai ka Pathen, lungset tah in hiche chapang hinkho hi hin kiledoh sah tei-tei jin,” ati.
22 Pakaijin Elijah taona chu ana ngaipeh in, hiche chapangpa hinkho chu ahin kiledoh sah in ahung hingdoh tan ahi.
23 Hichun Elijah in inchunga kon'in ahin pomsuh in anu ape in, “Ven! nacha hi ahing tai!” ati.
24 Hijou chun meithainu chun Elijah kom’ah, “Tunvang keiman nangma hi Pathen mi mong-mong nahin chuleh Pakaijin nang’a hin thu asei mong-mong’e ti ka hechen tai,” ati.