1 Pakaiyin jong Mose henga hiti hin aseipeh in, 2 Israel chate jouse kikhop khomna a hiti hin seipeh tan. Na Pakai le na Pathen'u keima then bang banga hi nangho jong nathen diu ahi. ✡ 3 Nalah uva koi hileh nu le pa jabolna nanei cheh diu, keima cholngahna nikho jeng jong nanit cheh diu ahi, keima hi na Pakai ule na Pathen'u kahi. ✡ 4 Milim doi kisem thu houhih hel un, milim doi jong semthua jabolna chansah di gohih hel un, Pakai le na Pathen'u keima kaum'e. ✡ 5 Nanghon chamna thilto ahin, kilhaina gantha ahin Pakai henglama todoh ding nanop uva ahileh, nangma cheh jong santhei dolin kisemtoh masauvin lang, chuteng hichu nakatdoh diu ahi. 6 Na thilto chengseu chu akikatdoh nikhoa neh chai ding, ajing nikho chan kat ding neh thei pai hi ding, hitia chu nithum lhinni geiya amoh chengse chu aboncha meiya govam ding ahi. 7 Nithum lhin nikhoa hiche thilto nekha chan chun, athil kitoh doh chu thet umtah ahitan, santhei dol ahi tapoi. 8 Chule koi hijongleh hiche sa nekha chan chun ama cheh in themmona akipoh ding ahi; ajeh chu aman Pakaiya thil theng asuhthang ahitan, ama chu amite lah a konna pampaiya um ding ahi. 9 Chule nang hon leiset gasoh na chopkhom tengu leh, nalou beh uchu apamchin geiya nachop khom lou diu, chule changphal jeng jong changpal geiya chom louding ahi. ✡ 10 Chule na lengpigui jong ngimsel'a nachom louding, na lengpi lei laiya lengpithei ajam thang ho jouse jong nalo ngim louding ahi, hichengse chu vaichate le kholjin ho dia nakhen tei ding ahi, keima hi Pakai na Pathen'u kahi. 11 Guchat kiti bol hih hel un, koi hijongleu chun naheng nakom cheh u jouva nabol louhel diu ahi. ✡ 12 Keima min pan a jouthua koima nalhep lhah louhel diu, hiche hoa chu na Pathen min nasuh chatvai louding ahi; Keima hi Pakai kahi. ✡ 13 Nangman naheng nakom nachoma nasuhgim thei louding, thalah soh natoh man jong pelouva najan khovah sah louding ahi. ✡ 14 Na-ngong mi jong nagaosap louhel ding chule mitcho masang jenga jong akipal lhuhna thei ima nakoi louding, hiche ho sanga chu na Pathen gin ding hi na thupi sah ding ahi; Keima hi Pakai chu kahi. ✡ 15 Nanghon thu natan tengu leh adih louvin tan ding gohih hel un, vaichaho chunga langneina nanei ham, ahilouleh milen ho chunga jong khentumna ima nabol louding ahi. Ahinlah thu chu adihtah a naheng nakom chunga natan ding ahi. ✡ 16 Nangman mikahlah a thuse polea chesuh chetou nabol louhel ding, chule naheng nakom jeng jong athina thei ding nagel'a na kidoupi thei louding ahi. Keima Pakai kahi. 17 Na lungthim sunga konna naheng nakom na thetbol louding, hiti sang chun naheng nakom in atohmo thudol'a phatah a naki houlimpi joh ding ahi, ajeh chu achunga phatlouna lhung thei ahi. ✡ 18 Nangman namite lah a konna achapa teu chunga phulahna nabol louding, tahsa lunghimona jong nei hihhel in, chuti sang chun nangma na kingailut banga, naheng nakom na ngailut ding ahi, keima Pakai kaum jing e. ✡ 19 Naboncha uva keima chonna dan jouse nanit sohkei diu ahi, na gancha ho chu jatchom chom na kitimat sah a, na kingai sah louhel ding, na loulai jenga jong muchi jatchom chom natu louding, chule ponsil jatchom cheh a kikhui von na tahsa chunga navon louhel ding ahi. ✡ 20 Pasal koi hileh huh jeh a numeiya kichodoh loulai, chamlhatna jong kipe nailou, ahinlah pasal chom khat toh kitepsa khat chu aluppi tah a ahileh, hichu phatah a kholtoh masat a, anumeinu chu chamlhatna kichansah nailou ahin, hijeh a chu thina chan mochan sah louding ahi. 21 Hiche mihempa chun athemmo thilto ding, ama ding mong monga kikhop khomna ponbuh kotpi maiya Pakai angsunga ahin kailut ding, hichea themmona thilto ding chu kelngoi chal khat hi ding ahi. 22 Hiche themmona thilto hiche mipa chun abol jeh a chu, thempu pan jong themmona thilto kelchal chu Pakai angsunga thoidamna anei peh ding, hichea chu chonset abol khahna a konna ngaidamna chang ding ahi. 23 Naboncha uva gamsung nahung luttengu leh, kumthum sunga thingga jouse chu koiman aneh thei lou lai ding ahi. 24 Kumli ahung lhin teng chule hiche kuma chu thingga jouse aboncha, Pakai angsunga thangvahna kut khat a thensona um cheh ding ahi. 25 Chule kum nga lhin teng thingga jouse chu naneh thei diu, nang hon gamga jouse chu nangma nangma ding cheh a nakilo lhah jeng thei u ahitai. Keima Pakai na Pathen'u kahi. 26 Nanghon ipi sa hitaleh athisan pum in nehtha hihhel un, phun jong sanghih unlang mitpheldoi kiti jong choi hihhel un. ✡ 27 Na chalsam u jong som hih unlang, na bengmul u jong among lamse natan theilou diu ahi. ✡ 28 Mithi ho jeh in natahsa chungu atpop ding gohih unlang, na tahsa na tichung hou na atkeh louhel diu, na tahsa cheh uchu milim hoa khat chan nasem theilou diu ahi. Keima Pakai kahi. 29 Na chanu chu aki joh a pansah ding got dan lang, na kisuhboh sah louhel ding ahi, achuti louva ahileh gamsung pumpi jeng jong akijoh a pang ding, hitia chu gamsung pumpi phatlou nan ahinlo jeng thei ahi. ✡ 30 Keima cholngah nikho jouse chu nanit cheh diu, keima muntheng jong jabolna nanei jing diu ahi. Keima na Pakai u kahi. ✡ 31 Doithem ho leh lhagao phalou ho heng jong jon louvin don jong don hih un, hiche ho chu gellut da uvin lang, hiche ho achun kisuboh khaget un nate, Keima Pakai na Pathen'u kahi. ✡ 32 Tehse lukang jabolna napeh a amasanga na dindoh ding, upa masanga jong jabolna nanei ding chule Pakai na Pathen jong nagin jing ding ahi. Keima Pakai kahi. 33 Kholgam mi khattou toh na gamsunga kholjin khomna nanei leh, na boncha uva hiche kholjin mi chu aphalouva nabol thei lou diu ahi. ✡ 34 Nalah uva hung kholjin le kholgam mi chu nalah uva konna peng doh banga um jing ding, hiche kholjinpa chu nangma cheh na kingai bang bang uva na ngailut cheh diu ahi, ajeh chu na boncha uva Egypt gamsunga ana kholjinsa nahi tauve. Keima Pakai na Pathen'u kahi. 35 Thu natan nau mun jouse, ipi ham khat tou adung avai natenau ahin chule thil ajat nasim nau hijongleh, adih louva nabol louhel diu ahi. ✡ 36 Leptoh le ding thil jouse jong dihtah a kitoh dil del'a nakoi diu, thil agih tena jong adihtah naman diu, ephah jong akitoh chet chet naman diu adihtah chu naman diu ahi. Keima hi Pakai na Pathen'u kahin Egypt gam'a konna nahin puigal kaipau chu kahi. 37 Hijeh chun nabon chauvin keima chonna dan jouse aboncha a najui uva nabol jing diu ahi. Keima hi Pakai kahi.