18
Thempuho leh Leviho Mopohnaho
1 Pakaiyin Aaron heng'ah thu aseijin, nangma nahin na chapa te ahin, na insunga Levi te chilhah hon na boncha uva muntheng sung’a boina le suhkhel jouse chung’a mo napoh diu ahi. Chuleh Thempu natoh na chung chang’a mopohna jouse vang nang leh na chapa te chung’a bou chu ding ahi,” ati.
2 “Na phung chanpi Levi chate ho chu nang leh na chapa te toh Houbuh sung’a kithokhom dingin hin puijin lang hungun, Kitepna Thingkong maija natoh diu kin hung tongpan tauvin,” ati.
3 Ahin Levi te vang chu Houbuh maichama natonga ache teng ule, amaho chu ching thei tah a aum uva na atoh u angaije. Maicham muntheng lam'a thilkeo ho kom anailut loudiu ahi. Hiche ho chu atham khah tah uva ahile nangma nahin, na sopi ho abonna nathi sohhel diu ahi.
4 Levi te tia kiminsah jouse Houbuh maicham semna natohna jousea jao cheh diu ahinlah midang vang nangma toh natong’a nakithopi dinga pang thei louding ahi.
5 Houbuh maicham kintheng sunga natong, akimang cha ding ho ahin nangman hiche thupeh jouse hi chingthei tah a najui uleh Pakai lunghanna nangho Israel te chunga um kit talou ding ahi.
6 Keima tah in Israel te lah a Levi te na natoh khompi ka lhendoh peh nahi. Amaho jouse chu nangma dia hung kipedoh diu Houbuh maicham a Pakai kintheng natong ding ahiuve.
7 Ahinlah nangma nahin na chate jouse vang hiche kintheng maicham thempu natoh kiti jouse nang hon na tahsa tah uva nabol diu ahiye. Chuleh maicham phol sunga thil kimsel'a pondal nung lam’a um jouse jong jaona ahi. Keiman nangma hi atumtah a themputna natoh kapeh nahi. Koihileh hetpehna umlou mihem chun muntheng aganaival a ahileh thi ding ahi.”
Thempu Ho Chan Ding Thilto Ho
8 Pakai thupeh jouse hi Aaron henga seipeh in hiche kinthenga Israel miten ahinto hou chu vetup dinga kinganse nahitai. Nangma nahin na chate ahin kinthenga hung kitohdoh jousea hi mopo jing ding nahi tauve.
9 Meiya halvam louding thilto thengpen ho a chu mopo ding nahiuve. Hiche thilto thengpen ho chu – lhosoh thilto ho, chonset thilto ho, chule themmona thilto thengpen ho, chule hiche ho chu nang leh na chapa te chan ding ahi.
10 Nangman hiche thilto thengpen chu naneh ding ahi. Pasal jousen aneh diu, hichu athengpen a nalah diu ahi.
11 Israel miten maicham kintheng ahung kitoh jouse aboncha a nangma a hi ding ahi. Hiche ho jouse chu aboncha a na chanu te leh na chapa te jousen gouva na neiden diuva ka pehdoh ahitai. Na insung mite jouse koi hijongleh houdan a kisutheng jousen hiche maicham a hung kitohdoh jouse aneh thei cheh diu ahi.
12 Keiman nangma hi mipiten lhosoh maicham Pakaiya ahin todoh jouseu - Olive thao, lengpitwi athah, chule lhosohga toh kapeh nahiuve.
13 Gamsunga louga ahunglhung masa Pakaiya dia mipi hon ahinto jouse aboncha nangma ding ahi. Na insunga akisutheng jousen hiche maicham a hung kitoh doh jouse chu anehthei diu ahi.
14 Israel gamsunga Pakai maicham adia hung kichom khindoh jouse aboncha a nangma nachan ding ahi.
15 Minu a konna ahung pengdoh masa mihem a kon hihen gancha a kon hijongleh Pathen a dinga hung kipedoh jouse chu nangma a ding ahi. Ahinlah nangman nacha ahung pen masa chule hou thudol'a atheng loulai gancha jouse chu na lhatdoh jing ding ahiye.
16 Amaho chu lhakhat ahung lhing tengleh na lhatdoh ding ahi. Hiche ho lhatdohna ding jat chu sum-eng peh nga hiding (inthenga thil tena dungjuiya shekel somni hiding, hichu gerah somni toh kibang ahi).
17 Ahinlah, nangman kelcha, kelngoi chule bongnou apeng masa pentah ho chu na lhatdoh louding ahi. Hiche ho chu Pakai dia kichomkoi atheng ahi tauve. Athisan chu maicham a thekhum inlang, athao chu thilto hoitah kipe in meiya halvam in, agimnam chun Pakai alunglhai sah ding ahi.
18 Thilpeh hoitah maicham a sa hin kitohdoh a omlhang le ajetlang mal chu nanga ding ahitai.
19 Pakai henga Israel miten ahin todoh thilto theng ho hi Keiman nangma kapeh nahitai. Hiche ho hi nangma le na chapa te na chanu te chan hijing ding ahi.Hiche kitepna hi Pakai le nangma kikah a kitimatna akeh thei loubeh ding ahin, hichu na chilhah te jouse a ding jong ahi.”
20 Chuin Pathen'in Aaron chu ahoulimpi tan, nangho thempu hon Israel mipi te toh gambeh hihen nei le gou kipehto na bollou dingu ahi. Keima hi nanei nagou u chu kahi, ati.
Levi Ho Chan ding Hopsom
21 Nangma insung mite naphung chan khompi Levi te chun Houbuh maicham natoh ho jouse chu keima gam leiset anei khel uva Israel mipia konna gam leiset a konna hopsom kipe ding ahi.
22 Tu apat Israel chilhah hijeng jongleh Levi phung chule thempu tilou koima chan Houbuh kom aphah theilou diu ahi. Amaho chun kinai tah a jong ahin nailut lou diu, ahin nailut uva ahileh thepmo chang ding’u chule thilo ding ahiuve.
23 Levi te chilhah hon bou Houbuh mun'a na atoh thei dingu, chule iti ham khatna boina aum leh ama hon mopohna anei ding’u ahi. Hichu nangma dia a itih a jui ding’a longlou ding dan kipe ahi. Levi ten Israel te lah a gam aneilou diu,
24 ajeh chu keiman Israel te chu hopsom kapeh sah ding, hichu ama hon maicham thenga ahin peh dingu ahi. Hiche ho jouse hi Levi te chanvou ding ahin ajeh chu Levi ten gamtum achombeh a anei theilou diu ahi.
Levi Te Hopsom Peh Ding Dan
25 Pakaiyin jong Mose aseipeh in,
26 Levi te chu hiche ho hi hetsah in; Israel mipite hopsom todoh ho chu keiman kana seipeh nang hon chanvou nasan dingu chu ahi. Hijeh a chu nanghon hiche ho chu hopsom a hopkhat napeh diu, som a khat a konna som a khat chu Pakaiya thilto theng ahi.
27 Pakaijin hiche maicham na hin todoh ho chu nangma lou gasoh nato bang uva asim ding, na changphol a kivolha masa pen ahilouleh na Lengpitwi lhohlhah masapen bang’a asan ding ahi.
28 Israel ten Pakaiya thil theng ahinto hou chu som a khat napeh ding ahi. Hiche hi Pakaiya dinga atheng chu ahin, chule hiche chu Aaron thempu napeh ding ahi.
29 Thilpeh nakipeu chu nang hon jong Pakai chu apha pentah napeh teitei diu ahi.
30 Chule hiche thupeh najui dinga kilom ho Levi te seipeh tan nangman na maicham ahoi pentah ho nahinto tengleh hiche ho chu nangma lousohga ahilou le nangma lengpilei laiya bang tah a naki simpeh ding ahiye.
31 Levi te jouse nangma nahin na sopi na insung mijouse hiche na ankong hi hoikom hijongleh naneh thei cheh diu ahi. Ajeh chu Pathen Houbuh maicham na natoh jeh uva ahi.
32 Thempu ho hi aphapen tah napeh leh Pakaiya dinga hopsom a hung kitoh chu naneh chun themmo nachan louding ahi. Ahinlah nangma chingtheiyin Israel miten thil theng tah ahin todoh hou chu imacha thenglou tah in geldan imacha na geldao khah le na thilo jeng thei ahiye.