23
Balaam In Israel Phatthei Aboh
1 Chuin Balaam’in Balak lengpa kom'ah, “Pumgo thilto maicham mun-sagi hiche mun ahin nei sahpeh inlang, chuleh bongchal sagi le kelngoi chal sagi neigon tup peh tan,” ati.
2 Balak in Balaam thupeh ho chu angaijin chuin bongchal le kelchal pumgo thilto chunga atohdoh cheh lhon tai.
3 Hichun Balaam'in Balak kom'a aseijin, “Hikom'a pumgo maicham kihalna ahin ana um tadin, keima Pathen'in eiki houlimpi hinam ti kaga kholchil ding, chuteng hiche ho chu nangma ka seipeh ding nahi,” ati. Hichun Balaam chu molchung gei achangin akal tan,
4 hilai achun Pathen'in Balaam akimupin a sei pehtai, “Keiman maicham sagi cheh kabolin, chuleh bongchal nou khat cheh le kelngoi chal khat cheh ka lhandoh tai,” ati.
5 Hichun Pathen'in Balaam chu ahoupin Balak seipeh ding thu apen ahi. Chuti chun aman, “Nangma Balak henga hiche ka thusei hi seipeh tan,” ati.
6 Chuti chun Balaam chu akile tan ahileh Balak lengpa chu Moab mi a milunho chutoh pumgo maicham mun'a ana din'u amun ahi.
7 Hiche hi ahi Balaam aseipeh chu:
Aram mun a kon'in Balaam in ei koudoh in;
Moab lengpan solam thinglhang apat in eihin puidoh e.
'Hungin'! 'Kei din Jacob hung gaosap in!
Hungin chule Israel te manthahna ding hung phong doh in.
8 Ahinlah iti themmo kachan ding ham
Pakaiyin themmo achan lou ho chu?
9 Keiman molchunga pat amaho kamun,
Molvum apat in kaveuvin ahi.
Amaho achang uva ahin u kamun,
Namdang te akon lhenchom ahiu kamu doh e.
10 Koiham Jacob chilhah ho simjou ding, simseng lou neldi ja khu?
Israel mipi jat li chu kon asimjou ding ham?
Chonpha te bangin kei jong thi ingting;
Ka hinkho jong amaho bang chun kichai hen.”
11 Hichun Balak Lengpan Balaam heng’a aseijin, “Ipi neilo hitam? Ka melma te gaosap dinga kakou nahi. Chusangin, nangin phatthei naboh jotai!” ati.
12 Ahinlah, Balaam chun adonbut in “Keiman vang Pakaijin ka kamsunga thucheng akoi ho bou ka seidoh ding ahi bouve” ati.
Balaam Thusei Nina
13 Hichun Balak Lengpan aseijin, “Hungin mun chom'a che hite. Khulam'a khu Israel nam abon u hi hih jongleh namu ding ahi. Atam behseh uve amaho beh chu gaosap in!” ati.
14 Chuin Balak in Balaam chu Zophim kiti lhaang kikhang laiya Pisgah molchunga apui touvin ahi. Hilai mun achun maicham phung sagi atungdoh in bongchal leh kelngoi khat cheh chu akatdoh tan ahi.
15 Balaam in lengpa kom'a aseitan, “Keima Pakai toh kaga kimuto kah in nangma na pumgo thil tona mun ahin ana dingin,” ati.
16 Chule Pakaiyin Balaam akimupin chule thu ahinpen ahi. Aman aseijin, “Balak henga kilen chule ka thusei chu gaseipeh in,” ati.
17 Hijeh chun Balaam chu akinung le in Balak le Moab migun ja-um ho chu maicham mun'a ana din uchu amun ahi. “Pajaijin ipi aseiyem? tin Balak chun thanom tah in adong'e.
18 Balaam in athupoh asei chu hiche hi ahi:
“Thoudoh in, Balak, chule ngaijin!
Kasei ngaijin, Zippor chapa.
19 Pakai hi mihem ahipon, hijeh chun aman jou aseipoi.
Ama mihem ahipon, hijeh chun aman lung akhelpoi.
Aman aseidohsa chule aboldoh lou um kha em?
Aman kitepna aneiya abulhit lou um kha em?
20 Ngaijun, phatthei bohna thupeh kamui;
Pathenin phatthei aboh tan, chule keiman kalehei theipoi!
21 Aman Jacob manthahna ding tohgon imacha agong pon;
Israel din hamsetna akoipoi.
Ajeh chu Pakai a Pathen uvin amaho aumpin;
a leng diuva phondohsa ahitai.
22 Pathenin Egypt a konin ahin puidoh un;
amaho din ama chu bongchal hattah tobang ahi.
23 Gaosap nan Jacob sukha pontin;
Israel douna din doi thanei tah umponte.
Hijeh a chu Jacob dinga hitia kisei ding,
'Israel dinga Pathenin itobanga thil kidang abol hitam!'
24 Hiche mite chu sakei bangin athou doh un,
thahat tah sakei bangin achamin ading doh tai.
Choldo ding anompoi
anchah akimu masang sen,
a satha thisan adon masang sen!”
25 Hichun Balak lengpa chun Balaam henga asei tan, “Aphai, amaho hi na gaosap louding ahitah leh phatthei jong bohda jeng tan!” ati.
26 Ahin Balaam in Balak chu adonbut in, “Pakaijin eiseipeh bou ka bolthei ahi tia kana sei hilou ham?” ati.
Balaam Thusei Thumna
27 Chuin Balak lengpan Balaam jah a aseijin, “Hungin, mun chom khat a napuibe inge. Iham tia Pathenin pha asah leh hiche mun a chu amaho na gaosap sah thei ahi.”
28 Hiti chun Balak in Balaam chu Peor molchung sangpen, gam ong tamtah ahung kisuh vetna mun'ah chun apuijin ahi.
29 Balaam in Balak aseipeh in, “Maicham mun-sagi hiche mun ahin nei sahpeh inlang, chuleh bongchal sagi le kelngoi chal sagi neigon tup peh tan,” ati.
30 Hichun Balak in Balaam sei bangin abol'in bongchal sagi le kelngoi chal sagi chu maicham chung cheh a atohdoh tai.