PHILEMON
HENGA
PAUL LEKHA THOT
Kihoucham'un!
Ngaidamna man kipe
Philemon lekhabu sung thu umdan
Ngaidamna kitihi thil hahsa khat ahi. C. S. Lewis in hitihin aseiye, “Ingaidamtheilou laisea, mi jouse dinga ngaidamna hi datmo umtah ahi.” Philemon lekhathot'a kon in, ngaidam thumna'a kon ngaidamna neidingdan muchet ahi. Paul in gospel thua lhangsap jal-in sohchanna akon jam Onesimus chun Yeshua atahsan in ahi. Hiche nikholai chun sohchanna a kon jamdohho chu kimkhat bolgimna achang'un chule kimkhat chun thina atoh jiuvin ahi. Philemon chu Onesimus dinga ajilkungpu ahin chule Paul dinga jong aloipa ngaitah ahi. Paul in Onesimus chu akhut ah hiche lekhathot hi achoisah in, akigui jopna lhon kehtasa semphat'a aumna ding deina in, Philemon henga alesol in ahi—ajehchu tua hi amani Christa jal'a sopi khat hilhon ahitai.
Lekhathot jihpa chule ajihkum
Solchah Paul, Rome mun'a songkul atanlai hichu AD 60-62 sunga ajih ahi.
Ipijeh'a ajih ham?
Solchah Paul akhatchanna Rome songkul atanlai AD 59-62, hiche sunga chu Onesimus, sohvahmang khat, chu songkul mun'a akimupia Yeshua atahsansah ahi (Chang 10). Paul dingin Onesimus chu kithokhompi theikhat ahi. Ahinlah Paul chun Philemon henga alesol in ahi. Hiche lekhathot hi Paul in Philemon henga asoh masapa ngaidam thumpehna dinga athot ahi.
1
Salam thu
1 Paul a kon in salam Hiche lekhathot hi Christa Yeshua chung chang a Kipana Thupha seiphongjeh a songkullut Paul le sopi Timothy teni a kon ahi. Keiman ngailut umtah, tohkhompi, Philemon henga,
2 chule isopinu'u Apphia chule kasepai chankhompiu Archippus, chule na-in'a kikhom houbung henga dinga kahinsut ahi.
3 I-Pau Pathen le Pakai Yeshua Christa chun lungset le lungmon napeu hen.
4 Philemon, nangma dinga katao tengleh ka Pathen kathangvah jingin ahi.
5 Ajeh chu Pakai Yeshuan atahsan le Pathen mite jouse nangailut thudol kana jajingin ahi.
6 Chule eihon Christa a ineiyu thilpha jouse hetna le hetchetna hin nanga um natahsan chu thilpha boldohna asona dingin kataopeh jinge.
7 Kasopi, nangman Pathen mite nahepina hin alungthimu nasuhalin, na-mingailutna hin kipana tahbeh le lungmonna eipei.
8 Hijeh a chu keiman lung ngamtah a napanpina Christa jal'a kangeh hi nangman naboltei dia kilomtah ahi.
9 Hinlah ikingailutna jaljeh a, keiman kahin ngehnom joh ahi. Hiche hi keima, kum upa tah le Christa Yeshua jal'a tupet'a songkullut, Paul'a kona taona ahi, tin neigelpeh in.
10 Keiman hiche kacha Onesimus hi nakhotona namusah dinga kangeh nahi. Keima songkul'a kaumpet in tahsanjal'in apa kahung hi.
11 Tumasanga chu Onesimus hi nangma dinga phachomlou anahi maithei ahi, hinla tua amahi eini dinga phatchomna higela ahitai.
12 Keiman amahi nahenga dingin kalungthim pumin kahinsole.
13 Keiman amahi hiche thihkhaova kakihen sunga hi Kipana Thupha seiphongnaa nangma thalhenga eikithopi dia umdensah ding kalunggon ahi.
14 Hinlah nangma phalpehna louvin imacha kabol nompoi. Nangma lungchamtah a neikithopi ding, seihat vanga bolchu hidahen kati ahi.
15 Nangman phat chomkhat a dinga Onesimus hi namansah chu aitih a naumpiden theina ding hinte.
16 Amahi nangma a dinga soh chu hijomtalouva, soh sanga chungnungjo, sopi deium dehset, keima dinga hung hi ahitai.
17 Hijeh chun keima hi natoh khompia neigela ahileh keima neilem ding tobang chun amahi analemin.
18 Aman nangma chu ipipena alamlouva nabolna umkham, aman bat nanei aumkhah a ahijongleh hichu keima bat in sun in.
19 Keimatah Paul in kakhuttah a hiche hi kajih ahi: Keiman sahpeh nange. Chule keiman nangin lhagaova neibat chu neisah dingin seiponge.
20 Tahbeh in, kasopi, Pakai jal'in hiche hi nei gelkhoh peh'in kati ahi. Christa ah hiche tilkhouna hi neipen.
21 Keiman, hiche lekhathot kajih hin, kangeh banga aphajocheh a nabol ding kaging chai.
22 Chukal val'in, keima dingin lhunna ding indan neinagonpeh in, ajehchu Pathen in nataonaho asan a chule keima nahenga kahung vahjet kit ding kakineme.
23 Christa Yeshua a songkul kalutpi Epaphras hin nangma lemnathu aseiye.
24 Chutima chun Mark, Aristarchus, Demas chule katohkhompi Luke teho hin nangho lemnathu aseiyuve.
25 Pakai Yeshua Christa lungsetna chun nalhagao umpi hen.