PHILIPPI
MITE HENGA
PAUL LEKHATHOT
Kipa galjona
Malam non! Pathen toh kiguijopna hinkho lhum'a del jing
Philippi Lekhabu sung thu umdan
Tahsan chate imatih chan'a kipana ding thudol Paul in ahilchen in ahi. Huhhingpu Jesu a kipana ineiyu hi koiman eilahpeh theilou diu ahi, ati. Hahsatna dinmun a jong kipana aumin, kineosahna jeng ajong kipana aumin ahi; Jesu hetna hi kipana le phattheina ahin, lunglhaisel'a ilamlhah teng kipana eipeuve ti, hiche lekhabu sunga kon muchet ahi.
Lekhathot jihpa chule ajih kum
Solchah Paul in AD 60-62 sunga ajih ahi. Hichu Rome lengvaipoa kon songkul atan laiya ajih ahi.
Koi henga ajih ham?
Philippi mun'a tahsan chate dinga ajih ahin, hichu solam gamkai Greece ahi. Rome gamkaiya Philippi hi Europe pumpia dinga Solchah Paul in, Houbung aphudoh masatpen chu ahin, hichu AD 50 vel ahi. Philippi Houbung miten Paul kimanchahna ding cholam ahinthot jal uchun akipah lheh in, chule Paul in Houbung mite thuhil dihlouva kon akivenna diuvin ahilchah in, kipumkhat tah a hinkho aman jingna diuvin thupeh aneiye.
1
Lemna Thu
1 Hiche lekhathot hi Christa Jesu a sohchang Paul le Timothy a kon ahi. Keiman Philippi a um Pathen mitheng teho Christa Jesu a um upaho le deacon ho jouse dinga kajih ahi.
2 I-Pau Pathen le Pakai Jesu Christa chun lungset le cham-lungmon napeuhen.
3 Nangho kalunga kageldoh chanin ka Pathen ka thangvah jinge.
4 Keiman taona kaman seh le kipah thanom tah in nangho jouse dingin ka thumpeh jiuve.
5 Ajeh chu Christa Kipana Thupha hillhangna thudol a, najah masat niuva pat tuni chan geiyin nangho katohkhompi nahi jing uve.
6 Chule keiman nanghoa natohpha tongpan'ah Pathen chun Christa Jesu ahungkit nikho lhin masangsea anatoh chu ajoma abulhit tei ding ahi, ti katahsan akichenin ahi.
7 Nangho na boncha uva thudol a keiman lung hitia kagel hi adih ahi, ajeh chu nangho ka lungsunga kagelkhoh jing nahiuve. Hichea hi keima songkul lut thudol hihen chule Kipana Thupha lamdol a kihonna thu kaseina hihen chule thutah a phudetna lam thudol hijongleh, nangho na boncha uva keima toh Pathen lungsetna kachan khompi nahiuve.
8 Ichan geiya nangho kangailut nahiuva chule Christa Jesu milungsetna a chu nangho na boncha uva kangai lheh u ahi chu Pathen'in ahenai.
Alekhathot ho ataopehna
9 Nanghoa ngailutna chu aha lonlhah cheh cheh a chule nangho hetna le hetkhenna a nakhantoube chehna ding uva katao ahi.
10 Ajeh chu keiman ipipen chu kiphamoa ham ti nang hon nahet diu kadeisah peh nahiuvin, hitia chu Christa ahungkit nikho hunglhun kahsea ngailutna theng le nolnabei hinkho naman theina dingu kati ahi.
11 Nangho huhhing nachan nau hi ga sona lama nadim jing uva, Jesu Christa a chonphatna na hinkho uva nasodoh theiyuva ahileh Pathen loupina le vahchoina hung hi ding ahi.
12 Chule kasopi te, nang hon ka hinkhoa ahung sohsaho chengse chu ipipen chu hita jongleh Kipana Thupha machal sahna dinga soh ahi tihi nahet dingu kadeiyin ahi.
13 Ajeh chu amitakip, hiche leng inpia umho eivesuiya pang sepai ho chan gei hin Christa jal a thihkhaova kihen kahi ti ahetsoh keiyu ahi.
14 Chule keima songkul'a eikikoi jeh a hikoma um atahsan jousen lungngamna le hansanna aneiyuva Pathen thu chu kichatna nei louva asei theiyu ahi.
15 Mi phabep ho chun Christa thu chu kimit thipna le midehnan aseiphongun, chule mi phabep hon lungdih pun aseiyuve, kiti ahi.
16 Amaho chun Kipana Thupha hongbit a panga kahi aheuvin, keima eingailut jeh uva aseiphongu ahi.
17 Midang ho vang chun Christa thu aseiphongu chu, chang phatchomna lunggel, lungdihpua hilou, thihkhaova kakihen hi bol genthei bea kaumna ding ngaitoa thusei phonga ahiuve.
Paul lungsunga kipana
18 Hinlah hichu imacha akhohpoi. Alunggon uchu dihlou hihen, adih hijongleh, Christa thu chu akiseiphong pou le kipah a kahi. Chule kipah jom nalai ding kahi.
19 Ajeh chu keima dinga natao u chule Jesu Christa Lhagao panpina chu, keima eikilhadohna hung hi ding ahi.
20 Ajeh chu keiman ginchatna le kinepna bulhingset kanei chu, keima jachatna a kachuh louhel ding, hinla keima Christa dinga masanga banga lung ngama kaum jom ding ahi. Chule ka hinkho hi hinna hihen, thina hijongleh Christa jabolna hung soh ding ahi ti katahsan e.
Hin chu Christa, thi chu hamphatna
21 Ajeh chu keima dinga hin kiti hi Christa dinga hin ahin, chule thi chu aphajo cheh ahi.
22 Hinlah tahsaa kahin le, keiman Christa dinga tohga phajo kaboldoh ding ahi. Hijeh chun hoijoh hi aphajo ham ti kahepoi.
23 Keima lung ngaichat ni neiya lunggel kichi-ah a uma kahi: Keima kache a Christa toh umkhom chu gamchenga keima dinga phajo'ah ahi.
24 Hinlah nangho khohsahna a tahsaa kahin jom ding hi kiphamo joa ahi.
25 Nangho jouse tahsanna a na khantou uva chule kipana a hetna nanei theina ding uvin, keima hing nalai ing ting nakithopi jom uvinge, ti ginchat hi kaneiyin kahen ahi.
26 Chule keima nangho henga avel'a kahung kit tengleh nang hon Christa Jesu a kisonna naneibe chehna ding uva ka hinkhoa ipi aboldoh ham ti nahet dingu ahi.
27 Chukalvalin, nangho van gam mite chonin chon un, Christa Kipana Thupha to kitoh in hinkho mang uvin. Chuti chun keiman kahunga nangho kahung mu u hihen ahilouleh athua nachung thuu kajah tho hijongleh, nangho lhagao khat le lungkhat pua na dinkhom uva chule Kipana Thupha thua tahsan gal nasat u thudol chu henange.
28 Chule namelma teu kichatsahna a chun kicha hihbeh un. Hichu amaho kisuhmangna dinga amelchihna hung hi ding, hinla nangho vang Pathen Ama tah chun na huhdoh dingu photchetna ahi.
29 Ajeh chu nangho Christa tahsanna a chanpha seh changa nahi pouve, hinlah Ama jal a hahsatna jong thoh dinga chanpha changa nahiuve.
30 Hijeh chun masanga thoh gim puma kagalsat namu uvin, tujengin jong naja soh keiyun ahi.