118
Pathen Mingailutna Hi Tonsot a Ding Ahi
1 Pakai chu aphatna jeh in thangvah'un! Ami ngailutna dihtah chu tanglouvin aum jinge.
2 Israel pumpin avel in seikit hen. Ami ngailutna dihtah chu tanglouvin aum jinge.
3 Aaron chilhah ho leh thempu hon avel in seikitnu hen. Ami ngailutna dihtah chu tanglouvin aum jinge.
4 Pakai ging jousen seikit uhen agailut thutah chun tonsot in athoh jing e.
5 Kagenthei pet in Pakai kom'ah kataovin ahileh Pakaijin kataona asangin eilhadoh tai.
6 Pakai keilanga apanleh ipi kakichat ding ham? kon I-eilothei dingham?
7 Pakai keilanga apanleh Aman eipapin tin, eidou ho chu kajosa tobanga kavetding ahi.
8 Mihem a kingai sangin, Pakai kiselna a nei aphajoi.
9 Leng chapa te a kingai sangin, Pakai a kisel aphajoi.
10 Eidouva chidang namdang ten eiumkimvel jongleh keiman amaho chu Pakai thahatna jalla ka suhmang ding ahi.
11 ama hon eiumkimvellun eidelkhum'un ahi, ahinla ken amaho chu Pakai hanta jallin kasumang gamtan ahi.
12 ama hon khoi bangin eiumkimvellun eitom'un, meikong a-al leng lungngin eileo tobangin eibolseuvin ahinla keiman Pakai thahatna jallin amaho chu kasumangtan ahi.
13 Kagal miten tha tei ding eigouvin ahin Pakaijin eihuhdoh tai.
14 Pakai hi kathahatna leh kala ahin Aman galjona eipetan ahi.
15 Kipana le galjona lahi michonphate ponbuh sungah akisan, Pakai thahatna banjet in thil loupitah atongdohtan ahi!
16 Pakai thahatna banjetchun thil loupitah atongdohtan ahi.
17 Keima thilou ding kahin, Pakaijin eibolpeh thil ho phongdoh dinga kahinjoh ding ahi.
18 Pakaijin nasatah in eijepmin, ahinlah eithisah pon ahi.
19 Mikitah ho lutna kot chu neihondoh peh in keima lut ing ting Pakai chu thangvahna kapehding ahi.
20 Hiche kelkot ho hi Pakai kom lhuntheina ahin michonpha ho jong hicheahi lutji ahiuve.
21 Kataona neisanpeh jehleh galjona neipeh jeh in nangma ka thangvah e!
22 Insahon adeimova apaimangu inning'a songpi khomdet pennin apangtai.
23 Hiche hi Pakai natoh ahin mitvet dinga thil kidangtah ahi.
24 Hiche nikho hi Pakaijin asem ahin, eihon kipahtah leh thanomtah a imandiu ahi.
25 O Pakai lungsettah in neihuhdoh'un, O Pakai lungset tah in nei lolhin sah tei-teijun.
26 Pakai min'a hungpa chu anunnomme. Pakai Hou-In'a kon'in nangho phatthei kahinboh'un ahi.
27 Pakai chu Pathen, ichung uva hi vahjinga um a ahi. Kilhaina sa chu khaovin khitninlang maicham ki ho chutoh khitbeh'in
28 Nangma ka Pathen nahin keiman kavahchoi ding nahi! Nangma ka Pathen nahin keiman kachoisang ding ahi.
29 Pakai chu aphatna ho jeh in thangvah'un! Ajeh chu ami ngailutna dihtah chu tonsot a um jing ahi.