145
Pakai Phatna Le Thahatna Jal-a Vahchoina
David in vahchoila asem
1 Ka Pathen leh kalengpa Pathen nangma choi at inge, chule itih chan hijongleh nangma thangvah jinging kate.
2 Niseh a nangma ka thangvah jing ding, itihchan hijongleh nangma kavahchoi ding ahi.
3 Pakai hi athupin, Ama bou thangvah dinga lom ahi; koiman athupina tejou ponte.
4 Akhang khanga mihem ten Pakai natoh apachat jing diu, thil kidang tah-tah nabol ho aphonjal diu ahi.
5 Pakai nalal loupina kidang leh nathilbol datmo umtah ho giltah a kagel jing ding ahi.
6 Nathilbol gimnei ho hi mijouse kam'a kijadoh ding, keiman nathupi na ho ka phondoh ding ahi.
7 Kidangtah a naphatna thusim hi mijousen aseiphong diu, keiman jong nadihna thu hi kipahtah a vahchoila kasah ding ahi.
8 Pakai hi milungset them leh hepina'a dim, lunghang vahlou; lungsetna long lou ahi.
9 Pakai hi mijouse din aphai, Aman athilsem saho jouse chungah khotona lhingset apen ahi.
10 O Pakai, nasemsa jousen na henga kipathu asei diu, chule nanungjui dihtah jousen nathangvah diu ahi.
11 ama hon na lenggam loupina asap phong diu, nathahatna atah-lang diu ahi.
12 ama hon natohdoh thil loupi ho mihem chate aseipeh diu, navaihomna lenggam loupi leh anatsat dan aphondoh peh diu ahi.
13 Ajeh chu na lenggam hi tonsot lenggam ahin, nangin akhang khanga vai nahop ding ahi.
14 Pakaijin alhuho athoudoh in apohgih'in adelpha ho aphong dingin ahi. Aseidoh chan a kitah Pakai ahin, atohna jousea lungset them ahi.
15 Mit jousen kinem tah in nangma lam ahin ven, nangman amaho ngaichat dungjuijin aneh diu napejin ahi.
16 Nangman nakhut namang chan, hinkho neijouse hi agilkel adangchah nau nasuh bulhinpeh jin ahi.
17 Pakai hi atohna jousea kitahnan ajuijin, atohna chan'a ngailutna dim ahi.
18 Pakai henga taote Aman anailut jingin, tahbeh a taote aumpi jingin ahi.
19 Aman gimna le jana neipum'a ngaichatna neiho alolhinsah in, panpi ngaicha'a akanao angaipeh in ahuhdoh jin ahi.
20 Pakaijin Ama ngailuho ahuhdoh jin, hinlah miphalou ho vang asumang jin ahi.
21 Keiman Pakai chu ka thangvah jing ding, vannoi leisetna cheng jousen tonsot-tonsot in Amin thangvah jing tauhen.