19
Pathen Natoh Ho Leh Athu Hing In Aloupina Phong
David Labol
1 Van ho'n Pathen loupina aphongdoh un ahi.
Vanthamjol hon jong akhut thepna atahlangui.
2 Anitin'in aphongdoh jing jengun;
jansim janseh le ama chu aseiphong jingui.
3 Ocheng soh louvin thu aseiyun;
a ochen uhi akijakha ngaipoi.
4 Ahinlah athu chun vainoi alodim'in,
thucheng jong chun vannoi leiset athechan soh in ahi.
Vanthamjol hoa Pathen'in nisa chenna ding asem peh e.
5 Hichu kichen jouva moulang emsel a ahung potdoh bangin avahchan jengin ahi.
Kisongtah a lhaitet golseh a panggo bangin haltah le kipah tah in aum'e.
6 Vanmong langkhat akon'in nisa ahung sohdoh jin
ajotna ding vanmong lang khat geijin ajui pehji e.
Hiche asat a kon chun imacha ahoidoh jipoi.
7 Pakai thuhil ho hi achamkim'in,
lhagaova asuhal jingin ahi.
Pakai Dan thu ho hi tahsan thei tah ahin,
milham jong chihsah jeng thei ahi.
8 Pakai thupeh ho hi adih in,
lungthim akipasahji e.
Pakai thupeh ho hi akicheh in,
lungsunga hetthem theina eipeuvin ahi.
9 Pakai gin le jana nei hi athengin,
hiche hi tonsotna ding ahitai.
Pakai thutan hi adih e;
a itih a dih jing jeng ahi.
10 Hiche ho chu sana sanga dei umjo ahin,
sana thengpen sanga jong dei umjo ahi.
Khoiju sangin jong alhum jo'n,
akhoiphang dunga kilhoh lhatil sangin jong alhumjoi.
11 Hiche ho hi na sohpa dinga gihsalna ahin,
na thunung hoa dia kipana chanvou lentah ahi.
12 Kalung sunga chonset kiselguh jouse hi iti kahetdoh jou ding ham?
Hitobanga kiselgua setna hoa konhin neisil thengin.
13 Nasoh hi henasasa chonset bolna a kon'in nei huhdoh in!
Hiche ho hi kachunga vaihomsah hihbeh in.
chuteng keima chonsetna a konna
ka hoidoh ding ahi.
14 Kakam a kon'a hung potdoh thucheng ho leh
ka lungsunga ka lunggel ho
nalung lhaina hihen,
O Pakai, ka songpi leh eihuhhingpu.