21
Melma Khut A Huhdohna Jal'a David In Pathen Athangvah
La Lamkaipa Dia David Labol
1 Na thahatna a hi lengpa iti kipah hitam, O Pakai!
Galjona napeh jeh in aman kipah in kho asam e.
2 Ajeh chu nangin alungthim'a angai chan napen;
aman athumho khatcha jong nada peh poi.
3 Nangin lolhinna leh hou theinan nalamto ji.
Alu chungah sana hoipen lallukhuh na khuhsah in ahi.
4 Aman ahinkho na hoitup peh din athumjin,
chule nangin ataona nasanpeh jie.
Ahin nikho jong tonsot a din nasuh saopeh ji e.
5 Na galjona chun jabolna lentah achansah in,
thupina le loupi nan najem hoijin ahi.
6 Nangin tonsot malsom nan na phungvuh in
chuleh nang toh umkhom a nopna kipana achun na phungvuh e.
7 Ajeh chu lengpa'n Pakai atahsan e.
Hatchungnung Pen ngailutna longlou chun alhuhna dinga kon'in na hoidoh sah jingin ahi.
8 Nangin nagal miho chu na mattup sohkei ding ahi.
Nangma nadouho jouse chu thahat tah na banjetna chu na mattup ding ahi.
9 Nangma nahung teng amaho chu meikong lah a
na selut ding ahi.
Pakaijin alunghanna a asuhgam ding;
meikonga ahalgam ding ahi.
10 Achateu leiset chunga kon a na thaimang ding;
ama hon son le pah aneikit lou diu ahi.
11 Ama hon nang dounan thil gong jongleu,
athilse gon hou chu lolhing louding ahi.
12 Ajeh chu ama hon na thalchang amaho kapna dinga nadoi chu
amuteng uleh kiheimang untin jammang diu ahitai.
13 O Pakai, na thahatna nasatah a chun hung thoudoh tan.
Tumging le lasah toh thoa na hatna natoh chu ka kipapi diu ahi.