36
David In Pathen Lungsetna Longlou Aphondoh
La Lamkaipa Dia Pathen Soh David Labol.
1 Chonsetnin miphalou ho lungthimgil sungah thu aseijin ahi.
Ama hon Pathen ginna him-him anei pouve.
2 Akihisah nauvin amaho le amaho akijou lhepmun,
ichan geija gilou leh phamo hiuvem ti akihet pouve.
3 Athusei anatohna hou jouse hi adihlou leh kijoulhepna ngen ahi.
Chingthei tah a natoh leh thilpha bol ding hi adatthei pouve.
4 Jankhosot in ahah un thil dihlou tohgon tamtah agong jiuvin ahi.
Atohdoh uhi apha khatcha aumpoi.
Thilsea konna kiheidoh ding angaito mong-mong pouve.
5 O Pakai, na mingailutna longlou hi van bangin akihohjal e;
na kitahna hin meilom kaina mun ho hi akho khel e.
6 Na dihna jong molsang vum tobang ahi.
Na thutan dih dan jong twikhanglen thuh tah abang e.
Nangin mihem leh ganhing ho jong kibanga na ngailut ahi.
7 O Pathen, na mingailutna longlou hi iti mantam hitam!
Mihem jousen na mingailutna
lhaving lim noija chun choldona anei ui.
8 Na insunga nehkemlou an a chun navah vai.
Kanglou nalui a twi chu nadon sah e.
9 Ajeh chu nangma mihem hung kondohna twinah nahin,
keihon kamu u vah jong hi nanga kon ahi.
10 Pakai nangma ngailu ho chunga na mingailutna longlou chu londoh sah in;
milung thengho chunga thu adih in tanpeh in.
11 Mi kiletsah ho nei chotpha sah hih in
ahilouleh miphalou ho sottolle nei hisah hih in.
12 Ven! Thil dihlou bolte ho alhugam tauve!
Amaho chu kithoudoh kit louding a sot lhuh ahi tauve.