44
Masanga Pathen Mi Huhdohna Ho Chule Tua Gentheina
Lalamkai pa dia Korah chapa te labol
1 O Pathen, phat sottah masanga kapu kapa teu khanglai a nanatohnathil bol ho eina seipeh u chu keiho tah in kanakol un kanajaove:
2 Nangin nangma helou namtin vaipi ho naban thahat in na-na deljam in agam leiset uchu kapu kapa teu na-na pen ahi. Nangin agal miteu na-na suhlhuh peh in kapu kapa teu chu na-na chamlhat sah in ahi.
3 ama hon achemjam uva gal anajouva gam analah u ahipoi; aban thahat uva jong gal anajou ahipoi. Amavang nangma ban thahat leh namaivah chun gal na-na jopeh ahi bouve ajeh chu nangin amaho chu na-na ngailun ahi.
4 Nangma kalengpa le Pathen ka Pathen nahin nangin Israel te dingin gal na-na jo peh tai.
5 Nangma thahatna jal a bou kagal miteu kanungno jouvu ahin naming a bou keihon eidouhou kachotphao ahi bouve.
6 Keiman kathalpi kasongpoi, kachemjamin eihuhdoh dingjong kakinempoi.
7 Nangma bouvin kagalmi teu chunga galjona neipeh u ahi bouve, hiti hin nangin eihotbol teu chu jumna napejin ahi.
8 O Pathen naloupina ho hi tantih neilou va ka samphon jing diu, chule a kumkho a ka thangvah jing diu ahi.
9 Ahinla tunvang nangin jumthetna neipaidoh u ahitai. Nangin ka sepai hou jeng jong neilamkai peh tapouve.
10 Nangin kagalmi teu va kon'in neinung jamsah un chuleh eidou hou chu kagamsung u nalosah tai.
11 Nangin kelngoiho bangin eikisat chen chen sah gamtauvin chitin vaipi lah a neithe thang gamtauve.
12 Nangin nasahlut namitehi manbai tah in najohdoh in man neilouhel toh nabah sahtai.
13 Nangin kaheng kakomhou noise neichansah tauvin kavel uva mite taitom le houset dingbep in neikoitauve.
14 Nangin amaho totthang hoina bepseo neihisah tauvin isahlou tah in alu eihih khum tauvin ahi.
15 Ki taitom jingna a konhin kakile doh jouta pouvin kamai uva jumleh jachat mel kapu den tauve.
16 Kajah uhi eitaitomteu housetna thucheng ngen ahin, kamit uva kamu houhi ahileh kachung uva phula nom dougal mite ngen ahiuve.
17 Hichenghi kathoh jeng vangun keihon nangma kasumil deh pouvin ahi. Kitepna thuchengho jong kasukeh deh pouve.
18 Kalungthim un nangma kanuse deh pouvin nalampia kon'in jong kajam mangdeh pouve.
19 Hinlah nangin sial chenna neldi gam anei suchipden tauve, nangin thina le muthim neikhu khum tauve.
20 I jemtia keihon Pathen ka Pathen u min kasuh mil uva ahilouleh gamdang semthu pathen houna a kakhut u kalhandoh khah uva ahileh,
21 Pathen'in ahet tei ding ahi ajeh chu Aman mihem lungthim a thuguh jouse ahet ahi.
22 Ahin, nangma jal in niseh in eiki thatnun; kelngoi bangin eiki that tauve.
23 O Yahweh Pakai hung thoudoh in ibol a na imut ham? Hung thoudoh in! neipaidoh pai pai hihbeh un.
24 Ipidinga namai naheimang ham? Kathohgim naoleh eibolset naohi nanahsah lou hitam?
25 Keiho leivui lah a kalhumat gam tauve, bonlhoh lah a akhupbon kakijam tauve.
26 Hung kipatdoh inlang! Neikithopiuvin! Nami ngailutna longlou chun neihung lhatdoh tauvin.