46
Pathen Hi Eiho Dinga Kiselna Le Thahatna Ahi
Korah chapa ten lalamkai pa heng a O chung hoa sah dia ala bol u.
1 Pathenhi ikiselnao leh isongpiu ahi, boina nikho hoa eipanhu diuva kigosa ahi.
2 Hijeh achu liingkihot henlang molle lhang chim henlang twikhanglen a kilehlut jongleh kicha tapouvinge.
3 Twikhanglen hi kinong henlang kitum jeng hen. Twikhanglen kinong a ahung letdoh jeng banginmuolle lhang jong kihot chimlha jeng hen.
4 Vadung khat in I-Pathen'u khopia chun kipa thanopna ahin polut e.
5 Hiche khopi achun Pathen achengin kisumang thei louding ahi. Nikho kipat a pat Pathen'in avenbit jingding ahi.
6 Leiset chung namtin vaipihi aboitan lenggam ho jong akiling sohtan ahi! Pathen ahung kisen in ahileh leiset ajunlha gamtan ahi!
7 Yahweh Pakai hatchungnung hi ilah uva aum in, Israel Pathen hi ikulpiu ahi.
8 Hungin Yahweh Pakai thil loupi bolhi hungvetan, Hunginlang aman vannoi leiset asuhmang hi hungve tan.
9 Aman vannoi leiset pumpia galho hi atuhtang in athalpiu leh ateng chau heboh peh gamtan ahi.
10 “Thipchet un, chule Pathen kahi hi heovin! Vannoi leiset pumin eijabol cheh diu ahi. Leiset pumpia a hi dopsanga kaum ding ahi.”
11 Hatchungnung Pathenhi ilah uva aum'e; Israel Pathen hi ikulpiu ahi.