51
David In Achonsetna Aphondoh Chule Ngaidam Channa Dia Atao
David Lengpa Bethseba Toh Ajon Jouva Nathan Themgaopa Ahenga Ahunga Alabol.
1 O Pathen, na mingailutna longlou jeh in
na mikhotona chu neimu sah in.
Na mihepina kidang tah jeh chun
ka chonset nen beh jouse nei suhbei peh in.
2 Ka themmona ho jousea kon'in nei sutheng inlang nei soptheng in.
ka chonsetna a kon'in nei sutheng sel in.
3 Ajeh chu ka phatlouna ka kihet in;
sun le jan'in eijui jing'in ahi.
4 Nangma douna mong'a chonse kahi;
nangma mitmun thilse chu kana bol tai.
Na thuseijin na dihna aphondoh ding ahi,
chuleh ka chung'a na thutan jong adih in ahi.
5 Ajeh chu kanu oisung'a ka kijil'a pat a—
chonset pum'a kijil kahin chonsesa hung penga kahi.
6 Hinla nang'in kanu oisung'a pat in jong athenga kaum ding na-na ngaichat ahin,
hiche mun jeng'a jong chu chihna lungthim neina hil pat ahitai.
7 Ka chonsetna a kon'in nei sutheng lechun ka then ding ahitai;
neisop theng lechun buhbang sang'in theng tang'e.
8 Oh! Ka kipana neipe kit in;
nang'in nei hesoh sah ahin tun nei kipa sah kittan.
9 Ka chonsetna ho neivet peh jing hih in, ka setna nenbeh ho sumang in.
10 Lungthim thah nei sempeh in, O Pathen.
Ka sunga um lhagao hi nei thah sempeh in.
11 Na angsung'a kon'in nei paidoh hih in,
chuleh keija kon'in na Lhagao Theng chu lamang hih in.
12 Nei huhhing nikho a ka kipana chu avel'in nei pekit inlang,
chuleh nathu a nung jing mi nei hisah in.
13 Chuteng na thua nunglou ho jong nangma deilam'a ahung chonna diuva kahil ding,
chutengleh amaho nangma kom lang'a hung kile kit ding ahiuve.
14 O Pathen mi huhhingpu, keiman thisan kaso tah jeh in nei ngaidam'in
chutileh nei ngaidamna chu kipah tah a vahchoila a kasah ding ahi.
15 O Pakai, lungnachim'a nangma ka vahchoi theina dingin ka lei nei lhappeh in.
16 Nangman kilhaina thilpeh na ngaicha pon,
pumgo thilto ding khat jong na ngaicha pon ahi.
17 Nangin na ngaichat kilhaina chu-Lhagaova kisuh gep ahin, nang'in lung kisuchip pum'a kisihna neiho napaidoh poi o Pakai.
18 Zion hi lungsetna mitvet in venlang hin kithopin;
Jerusalem pal hinsem phan.
19 Chutengleh kilhaina lungthengsel a kipe pumgo thilto hon lunglhai in natin—
chule pumgo thilto pum bongchal ho avel'in hung kitohdoh tante.