18
Maicah In Ahab Agih Sal
1 Jehoshaphat hin haona le jabolna bulhing setnin ana neitan, ama hin numei kilah tona lama Ahab toh kisamkaina ana nei lhon'in ahi.
2 Kum phabep jouhin Samaria a Ahab villin aga chesuh in ahileh, Ahab in bongchal leh kelngoi athat nin ama leh ahin kilhonpi ho neh ding chun nengtah in ana gonpeh in ahi. Chuin Ahab in Jehoshaphat chu Ramoth-gilead nunglahna dinga galkon a jao dingin alunglah in ahi.
3 Ahab lengpa chun Jehoshaphat jah a chun Ramoth-gilead toh kidouna dinga hi neihung kithopi ding ham anatin ahi.
Jehoshaphat chun adonbut in, “Ikitho hih ding ham! Kei le nang thakhat ihin, kei mite jong nang mite ahin hiche gal a chun nahung kithopi nange,” ati.
4 Chuti chun Jehoshaphat in aseiben, “Hinlah amasan Pakaijin ipi asei holdoh hite,” ati.
5 Hichun Israel lengpan themgao 400 akou khom'in amaho chu adongin, “Keiho hi Ramoth-gilead satna galkon a kache diu ham ahilouleh ka cheda diu ham?” ati.
Hichun amaho chun, “Chetou jengun! Amaho chu Pathen'in lengpa nang khut a ahin pehdoh ding ahi,” atiuve.
6 Ahinlah Jehoshaphat in, “Tua hi eihon idoh theiju themgao dang umlou hitam? Ama chu hiche thudoh ma-ma hi idoh diu ahi,” ati.
7 Israel lengpa chun Jehoshaphat kom’a, “Eihon idoh theiju Pakai themgao khat vang aum'e, ahinlah keiman ama hi kavetnom poi. Ajeh chu ama hin kei dinga thilpha asei ngaijipoi! Ama chu Imla chapa Micaiah kitipa chu ahi,” ati.
Hichun Jehoshaphat in,“Hichu leng khat thusei ding dan ahipoi! Aman ipi asei chu ngaiyu hite,” ati.
8 Hiche phat chun Israel lengpan a sepai lamkai khat chu akouvin, “Imla chapa Micaiah chu gangtah in gapuijin,” ati.
Ahab Douna A Micaiah Gao Thusei Ho
9 Israel lengpa leh Judah lengpa Jehoshaphat chu aleng von lhon cheh a akivon lhon'in, Samaria khopi lutna kelkot lutna tollhang achun atou lhon'in amasang lhonna themgao ho chun gaothu aseijun ahi
10 Kenaanah chapa Zedekiah chun thih alan saki limin asemin, “Pakaijin hitin aseije: Hiche sakiho a hi Aram mite chu na suhmang ding ahi!” ati.
11 Hiti chun themgao ho jouse chun gaothu asei sohkeiyun, “Ramoth-gilead jonin chetouvun na lolhin diu ahi, ajeh chu Pakaijin galjona napeh ding ahi,” atiuve.
12 Micaiah kouva kisolpa chun akom’a hitin aseijin, “Ven, themgao ho jouse chun lengpan gal ajo dingin asei sohkeiyun ahi, nangman jong hitima chun sei le chun pha ding ahi,” atipeh e.
13 Hichu Micaiah in adonbut in, “Hingjing Pakai min'a kasei ahi, ka Pathen'in asei seibou kasei ding ahi,” ati.
14 Micaiah chu lengpa kom ahung lhun phat in Ahab in adongin, “Micaiah, Ramoth-gilead a hi galsatna kache diu ham ahilouleh kache dauva pha ham? ati.
Micaiah in abonvut in, “Cheovin, galolhing tauvin amaho chun nangma khut a pehdoh in um nante!” atipeh in ahi.
15 Hichun lengpan hitin aseije, “Micaiah nang kom'a hi ijatvei Pakai minin thudih seijin tia kangeh ding nahim?” atin ahi.
16 Hichun Micaiah in aseijin, “Keiman Israel te hi achingbei kelngoi banga molchung dunga akithe cheh u kamui. Chuleh Pakaijin hitin aseijin, 'Amaho hi lung mongin a in cheh uva kileu hen,'” ati.
17 Israel lengpa chun Jehoshaphat kom'a hitin aseije, “Ama hin kakom'a thilpha asei khapon, thilse jeng aseije kati hilou ham?” atin ahi.
18 Hichun Micaiah in aseijin Pakaijin hitin aseije, “Ngaijun Pakai chu alal touna a atouvin van mite chu ajet aveijah adingun ahi.”
19 Pakai chun hitin aseijin, 'Koi penin Ahab kom'a nache uva Ramoth-gilead a khu aga lhuhkamna dinga naga lunglah diu ham?' ati.
“Thumop tamtah aumin,
20 hichun lhagao khat in Pakai angsung ahin nailut in, 'Keima chengting galhem lhange!' ati.
Pakaijin, “I-nagalo ding ham?” ati.
21 “Hichun lhagao chun adonbut in, 'Keima chengting Ahab themgao jouse chu jou gaseisah ing kate,'” ati.
“Pakaijin chenlang hiti chun gabol'in lang hung lolhing tan,” ati.
22 Hijeh chun veuvin! “Pakaijin a themgao jouse chu jou aseisah ahin, Pakaijin naman thana dinga asei sah ahi bouve,” ati.
23 Hichun Kenaanah chapa Zedekiah chun anailut nin angeiphe abeh peh in, itih a chu Pakai lhagaovin keima eidalhah a nang kom'a thu asei ham?” ati.
24 Micaiah chun adonbut in “Tomlam a nalhai lut a naga kisel teng hetan nate!” atipeh in ahi.
25 Hichun Israel lengpan a sepai lamkai kom'a chun, “Man inlang khopi vaihompa Amon leh leng chapa Joash kom'ah ga pelut tan.
26 Amani kom'a chun songkul'a akoi lhon ding keima damsel'a kahung kile kit kahsen aneh ding changlhah themkhat toh twi themkhat ana peuvin!” ati.
27 Micaiah in asamjah jengin, “Nangma nahung kile pou-pou leh Pathen'in kei kom'a thu aseilou hi ding ahi!” ati. “Chuleh aman Avel'a umho kom'a chun, “Hiche kasei hi jasohkeiyun,” ati.
Ahab Thi
28 Hiche jou chun Israel lengpa Ahab leh Judah lengpa Jehoshaphat chu Ramoth-gilead khopi abulu dingin akondoh lhontai.
29 Ahab chun Jehoshaphat kom'ah hitin aseijin, “Galmun a ilut tengleh nangin lengvon kivon inlang, ken vonchom kivon inge,” ati. Hichun Israel lengpa chun vonchom akivonin gal mun'ah alut tauvin ahi.
30 Aram lengpa chun sakol kangchunga tou gal lamkai ho chu Israel lengpa bou atup diuvin thu apen ahi.
31 Hijeh chun Jehoshaphat lengpa chu amu phatnun Israel lengpa ahisah sohkeiyun, anokhum tauvin ahi. Ahinlah Jehoshaphat chu apeng jah in ahileh, Pakaijin ahuhdoh in ama nokhum ho chu adalhah sah tan ahi.
32 Sakol kang chunga tou lamkai ho chun ama chu Israel lengpa ahilou ahedoh tauvin adalha tauve.
33 Ahinlah Aram sepai khatnin thalchang khat chu agah donkapmin ahileh, Israel lengpa galvon kikah a chun akaplut khatan ahi. Hichun asakol kangtalai tolpa kom'a chun ka kitongkha tai galmun'a kon'in nei toldoh tan atin!” ahi.
34 Hiche ni chun galkisat chu akhoh cheh jengin, Israel lengpa vang chu sakol kangtalai chunga aoplha tan, nilhah lang geijin Aram te lang chu angan nilhum kon'in athitai.