28
Ahaz In Judah Gam'a Vai Ahop
1 Ahaz hi leng ahung chan chun kum somni alhing tan, ama hin kum som le gup sungin Jerusalem’a vai anahom'in ahi. Ama hin apa David in ana bol bangin Pakai mitmun thildih anabol pon ahi.
2 Ama hi Israel lengte chondan in ana chonin Baal doilim ho ana semdoh in ahi.
3 Ama hin Ben-Hinnom phaicham a chun gimnamtui meiya ana lhut nam'in, achapa te meijah ana gouvin pumgo thilto nan ana mangin ahi. Israel te hung kijotna gam'a konna Pakaijin ana nodoh nam mite chonna kidah umtah chon'in ana chon'in ahi.
4 Aman munsang dung leh molchung dungah chuleh thingphung noi tinnah pumgo thilto ana bollin gimnamtui analhut nam in ahi.
5 Hitobanga achon phat hin Pakai a Pathen'in Aram lengpa khut a h ana pedoh tan ahi. Ama hon ajophat un mi tamtah gal-hingin ahin kaijun Damascas lang alhut tauve. Hiche jou chun ama chu Israel lengpa khut a pehlut in aum'in Ahaz in gal aleltan mi tamtah jong athiuvin ahi.
6 Ramaliah chapa Pekah chun Judah te chu nikhat sungin mihangsan cheh 120,000 athat in ahi, ajeh chu ama hon apu apa teu Pakai Pathen chu ana suhmil jeh u ahi.
7 Mihat tah Zichri kitipa chun lengpa chapa Maaseiah chu athatnin, khopi sunga vaihom’a pang Azrikam leh lengpa dinga sepai lamkai ani channa Elkanah jong athatnin ahi.
8 Israel te dinga Judah te chu asopi teu ahivangin Israel sepai ten numei chapang 200,000 gal-hingin aman’un achomdoh u thilkeo tamtah toh Samaria gam'ah gal-hingin akaijun ahi.
9 Ahin Oded kiti Pakai themgao pa chu Samaria sepaiho kom'a chun achen hitin agaseije: “Veuvin napu napa teu Pathen chu Judah te chunga alunghan jeh a amaho chu nangho khut a ahin pehlut ahi. Ahinlah nang hon lungkhen louhel'in nathat un apen gin'u kakom ahunglhung peh in ahi.
10 Tunjong nang hon Judah leh Jerusalem mite chu pasal ahin numei ahiuvin nasoh un napansah gotauvin ahinlah nangho jong hi Pakai na Pathen'u maija chonse nahilou uham?
11 Tun kasei hi ngaijun nasopi te ho chu gal-hinga namat hou chu nungsol kit tauvin ajeh chu nachung uvah Pakai alunghang tan ahi,” ati.
12 Hichun Ephraim chate lah a lamkai phabep ho chu—Jehohanan chapa Azariah, Meshillemoth chapa Berekiah, Shallum chapa Jehizkiah, Hadlai chapa Amasa chu adingdoh un galsat hung kile ho chu akimaitopi uvin hitin aseijun ahi.
13 “Nanghon gal-hinga mi nahin kailut lou diu ahi! Nanghon ichonset nau na belap un gal-hingin mi nahin kaitauvin ahi, eihon nasatah in Pathen Israel chungah ilunghan sah jeng tauvin ahi,” atiuve.
14 Hichun thalchoi sepai ho chun amimat hou leh athil chomdoh hou chu khopi lamkaiho masanga chun ahin koi tauvin ahi.
15 Amin cheh a kipanna kinganse ho chu ahung dingdoh un thilkeo kichomdoh ho leh gal-hinga kiman ho chu ahin puidoh un, akeova umho chu von avonpeh un, sandal asepeh un, anneh twidon apeuvin thao jong anupeh un ahi. Alhasam ho chu sangan chungah atousah un hiti chun jubiphung khopi, Jericho a asopihou kom gei chu ahungthah un ahi. Hichea kon chun Samaria a akile tauve.
Ahaz In Hou-In Akha
16 Hiche phat lai chun Judah lengpan Ahaz in Assyriah lengpa chu akithopi dingin atem'in ahileh anompon ahi.
17 Ajeh chu Edom mite ahungun Judah chu ahin bulu uvin gal-hingin aman’un akai tauvin ahi.
18 Philistine te jong ahungun Judah phaicham leh lhanglam ahin bulu uvin, Beth-shemesh, Aijalon, Gederoth, Soco thinglhang kho ho, Timnah le akho ho, chuleh Gimzo leh akho ho chu alonvuh un achenkhum tauve.
19 Ajeh chu Judah lengpa Ahaz in amite chan asuhboi peh a Pakai douna a na atoh jeh a Pakaijin Judah tehi a engbol ahi.
20 Assyria lengpan Ahaz hi kithopi tah sangin adouvin apangjon asugim jon ahi.
21 Hijeh chun Ahaz hin Hou-In a kon leh khopia kon'in chuleh mipi lamkai ho a kon'in sana ana chomkhom in Assyria lengpa chu anapen, ahivangin aman ana kithopi dehpoi.
22 Hahsatna akhon geija ato tah vang'in Ahaz hin Pakai doumah abolbe jingin ahi.
23 Ama hin achunga gal hin bol a ahinjou chuleh ahin sugenthei Damuscus mite semthu pathen ho kom'ah pumgo thilto abol'in kilhaina asem'in, hitin aseijin, “Hiche pathen hon Aram lengho akithopin ahi, hijeh chun kenjong hiche pathen ho kom'a hin kilhaina semleng keijong eikithopi diu ahi,” ati. Ahinlah hiche hin ama le Judah te chungah hahsatna alhutbe jon ahi.
24 Lengpa chun Pathen Ina thilkeo ho jouse achu alan asugoi sohkeijin chuin Hou-In kotchu akhah in Jerusalem khopi muntin'ah doiphung atungdoh in ahi.
25 Judah gam'a khopi jousea semthu pathen houna atungdoh in gimnamtui ho ahalnam'in gamdanga pathen ho chu ahou tan ahi. Hiti chun aman apu apate Pakai Pathen lunghanna chu akiloilut khum tan ahi.
26 Ahaz vaihom sunga anatoh athilbol jouse chu apatna apat ajona gei Judah Le Israel Lengte Lekhabua akijihlut sohkeijin ahi.
27 Ahaz lengpa athi chun, lengte lhanna vuilouvin Jerusalem khopi sunga anavui tauve. Achapa Hezekiah chu apa khel'in leng achang tan ahi.