9
Sheba Lengnun Solomon Ahung Vil
1 Sheba lengnun Solomon minthanna ho thu ajahdoh phat chun, apatep mong-mong dingin thudoh hahsa tampi dong dingin Jerusalem a ahung tan ahi. Amanu chun akilhonpi tamtah toh gimnamtui, sana le songmantam tampi sangong sao ahinpoh sah in, thupitah in Solomon kom ahunglhung tan ahi.
2 Solomon chun amanu thudoh jouse abonchan adonbut in, chule bailam tah in ahilchen'in ahi.
3 Sheba lengnun Solomon chihna ho, chule aleng inpi sah,
4 adokhang chunga an le twi ho, amilen milal ho touna, ajen lea pang ho kivonna, akhon dom'a pangho kivonna le Pakai Hou-In a pumgo thilto abol ho amudoh chun kidang asaval'in athia abang jengin ahi.
5 Chuin Sheba lengnun lengpa kom'a aseijin, “Keima gamsunga kana jah na chihna le na natoh thilbol ho hi atah mong ahi.
6 Ahinlah kamit tah a kana musanga chun miho thusei chu atah hi dingin kana gelpon ahi. Tahbeh a sei dingin na thupina ho hi akehkhat bepbou eina kiseipeh ahi bouve, hiche eikiseipeh kajah ho sangin gam chengin nakho khel'in ahi,” ati.
7 Namite iti pan akipah tadiuvem! Namilen-milalte ho, na angsunga adin jing uva na chihna thu ajah jingu hi iti pan akipah tadiuvem!
8 Pakai, na Pathen chu vahchoiyin um tahen, Ama chu na chunga lunglhai tangei inte. Pakai na Pathen'in vaihom dinga laltouna a na tousah a lenga na pansah ahitai. Ijeh-inem itileh na Pathen chun amite Israel te alungsetna atonsotna adopsang nom jeh chule thutah le thudih a amaho chunga vai nahop theina dinga lenga na pansah ahitai.
9 Chuin Sheba Lengnu chun Solomon Lengpa chu sana pounds 9,000 chule gimnamtui le songmantam tamtah apen ahi. Amanun Solomon Lengpa apeh tobang gimnamtui chu tumasangin ana um kha hih laijin ahi.
10 (Chutoh lhonin, Hiram Lengpa soh ho leh Solomon Lengpa soh ho chun Ophir a kon'in sana ahinpo uvin, chule algumthing le songmantam jong ahinpo uve.
11 Lengpa chun algum thingho chu Pakai Hou-In le leng inpi kalbi ho semnan amangin chule lasathem ho dingin selangdah le pehkhong semnan amangin ahi. Hiti ho tobang hi tu masangin Judah gamsunga ana kimukha hih laijin ahi.)
12 Solomon Lengpa chun Sheba lengnun angaichat le athum jouse chu apen, aman ahinpoh sanga tamjo chu alepeh kit in ahi. Chuin amilal ho tochun agamlang uva akinungle kit tauvin ahi.
Solomon Hoina Le Aloupina
13 Kumseh a Solomon in sana amu jat chu tons 25 aphan ahi.
14 Hiche lah a hi thilcho thil joh ho leh kivei mihon apeh u pang loulai ahi. Chujongleh Arabia gam'a lengho le gamvaipo hon jong Solomon chu sana le dangka ahin pohpeh un ahi.
15 Solomon Lengpa chun sana a kikheng kidalna pho 200 asemin, kidalna pho khat chun sana pounds 15 alutnin ahi.
16 Aman sana a kikheng kidalna pho aneo 300 jong asemin, kidalna pho khatna chun sana pounds 7-1/2 cheh alutnin ahi. Hiche ho se-se chu lengpan Lebanon’a gammang inpia chun akoitai.
17 Chuin Lengpan Saiha a laltouna khat asemin sana thengsel'in atomjol'in ahi.
18 Laltouna a chun kalbi gup aneijin chule sana touna keng ngapna toh akibutto in ahi. Touna teni jet le veiya chun sakei bahkai lim ni adingin ahi.
19 Kalbi mong teni chunga chun sakei bahkai lim som le ni aumin, kalbi dan gup ma aning cheh a chun sakei bahkai lim khat cheh akikoijin ahi,
20 Solomon twi donna khon ho jouse chu sana lhanga kisem ahin chule Lebanon gammang'a konna sana thengsel'a kisem ngen ahi. Thil ho jouse chu dangka a kisem khatcha aumpoi, ijeh-inem itileh Solomon khanglai chun dangka chu manlhom jep danin ana kihen ahi!
21 Lengpa chun kiveina kongtol tampi aneijin kongtol ho chu Hiram in Tarshish a asolji uve. Kumthum lhunseh leh kong innei ho chu khatvei ahung kileji uvin, sana, dangka, saiha, guldute le vahong ho ahin pojiuvin ahi.
22 Lengpa Solomon chu leng dang ho jouse sangin haona le chihnan achungnung jon ahi.
23 Nam jousea Leng ho chu Pathen'in apeh achihna ho thu ngainom leh houlimpi dingin ahung jiuvin ahi.
24 Akum kumin ama hungvil jouse chun sana le dangka sangkholchol, gimnamtui, gal manchah, sakol le sangan ho kipa thilpeh adin ahin pohpeh jiuvin ahi.
25 Solomon chun sakol buh le sakol kangtalai koina indan 4,000 aneijin, chule sakol jong 12,000 aneijin ahi. Hiche ho chu sakol kangtalai koina khopiho le Jersusalem'a ama kom naiyah akoijin ahi.
26 Solomon chun sahlam a Euphrate vadung apat Philistine te gam chan chule lhanglama Egypt gamgi sunga lengho chunga vai ana homin ahi.
27 Lengpa chun Jerusalem khopi sunga dangka nengjeng jungin abol'in songlheo lah abahsah jenge, chule thing mantam jong Judah phaicham'a theipi thingkeh ninglhing tah a muntin'a akimu jeng thei bangin abol'in ahi.
28 Solomon sakol ho chu Egypt gam le gam chom-chom'a konna hung kipolut ahiuve.
Solomon Vaihom Sung Lahchom
29 Solomon vaipoh abulla kipan achaina chan geiya thilsoh adang ho chu, Themgaopa Nathan Lekhabu, leShiloh a Ahijah Themgaopa, chule Iddo a Mitva Neipa Gaomu, chule Nebat chapa Jerobaom chung changa muneipa thusim'a akijihlut sohkeijin ahi.
30 Solomon chun Jerusalem a Israel pumpi chunga, kum somli vai ana pon ahi.
31 Ama athi chun apa David khopia chun akivuitai. Chuin achapa Rehoboam chu ama ban'ah lengin ahung pang tan ahi.