SONG OF SOLOMON
SOLOMON LABU
Solomon Labu Jihpa Chule Akijih Kum
Hiche lathu hohi Solomon kimin phahna’a kijih chule Solomon amatah-in ajih hidin ginchat ahitoh kilhon in, Solomon Labu ahilouleh Solomon Zaila tin aki minvon ahi.
Chule Leng Solomon khang 970 le 930 BC sunga ana kijih ahin, hiche Zaila hohi Israelten Pathen le amite kingaina dol-in aleuvin, Christianten Christa le ahoubung mite kitimatna dol-in akilen ahi.
Thusim Che Dan
Thusim chedan hi gollui laiya mipi vet dinga thusim tho abolji nauva, lasa hon athusim zaila’a asah thojiu tobanga kijih ahi. Chule athu chedan het bailamna ding in athusei le alasah chu numeinu ahi tengleh ‘Mounu’ tin athubul in akitahlang in, pasal pa’a ‘Moulang’ akitin, chule akahlah’a honlasa le lomgol lasa ho chu ‘Zailom’ tin aki tahlang’e. Hiche bu hi lasut ahilouleh lathu ahijeh'in, thu hopkhen na ding in ‘Labung’ tin mun get in aki homkhen in ahi.
1
Shulam Nungahnun Kelngoi Chingpa Angaina
1 Zailom: Hiche hi Solomon la ho lah’a apipen, adang jouse sanga thupi ahi.
2 Mounu: Neichop in lang, avel in neichop in, ajeh chu nei deibolna chu lengpitwi sang in jong alhumjoi.
3 Gimnamtwi nakinu chu iti namtwija hitam, namin ngei hi agim namtwi kitungdoh tobang ahi. Akidang poi, khangdong nungah jousen hibang loma nahin deiju hi!
4 Kei jong neipuijin, hung in; kijam ta hite! Lengpan ajalna pindan’ah ei puilut hen.
Zailom: Iti kahin kipapiu hitam, O Lengpa. Na milungset dan hi lengpitwi sang in ka ngaisang jouve.
Mounu: Nahin ngaisangnau hi adih tangeiye!
5 Keima ka vouso avom vang'in kamelhoi nai, Vo Jerusalem Chanute-Cedar phaiya ponbuh kisongho banga vom, Solomon pondal banga vom chu ka hinai.
6 Kavouso avom jeh-in, Neihin vehih-uvin-nisan ei kahdup jeh ahibouve. Ka sopi pasal ho ka chung ah alunghang uve, alengpi leiju vekol ding in eino uvin, hijeh chun kei le kei ka kijen joupoi; keima lengpilei ka kivet kol man poi.
7 Nei seipeh-in, O goldei, tuni na kelngoi honho hoilama na puiding ham? Sun teng hoikoma na kol sah ding ham? Ajeh chu keima hi noti banga naloi-napaiho chule kelngoite lah’a iti ka vavai le jeng thei ding ham?
8 Moulang: Na het loule, O nungah melhoipen nu; ka kelngoi ho kikaina nung juiyin lang, kelngoi chingho ponbuh vel’a chun na kelchate vah-in.
Melhoina Toh Pharaoh Sakol Ho Tekahna
9 O ka deinu, na nunnop dan hi Pharaoh sakol lagol lah-a khat toh nabang’e.
10 Na bengmai alangtoa hi iti deium hitam! Na bilba tenin asal emsel jeng’e! Nangong jong iti dei um hitam, na sana bilba hung kailha chun ajem hoi be cheh-e.
11 Zailom: Sanavui sempeh-ungting, kicheina ding dangkavui toh thosah-unge.
12 Mounu: Lengpa jalkhun chung ah alum in, gimnamtwi ka kinu gimnam hi aki tunglut jel jeng’e.
13 Ka goldeipa hi ka ang-a Myrrh gim namtwi theineo kikhai abangin ahi.
14 Ama hi En-gedi lengpileiya henna pahcha-boh toh abange.
15 Moulang: Iti hoiya hoi nahi hitam, O ka goldei nu! Namit teni hi vakho te abang jeng’e.
16 Mounu: Nangma jong na hoi ngeije, O goldei, kam’a seidoh jou hoi hilouvin dei na um nalom’e! Hampa dong nem hiuheo khu i-jalkhun lhon ding in alom e.
17 Namtwi tah Cedar thingbah ho jeng jong i-inkam lhon ding in apang uvin, chahthing ho jeng jong i-insun lhon ding in apang’uve.