1 Titus, nangman vang, kithuhilna dihtah dungjuiya hinkho man ding dan domsangin. 2 Upa lang jep ho chu mi kitim them, ja umtah, lung limgeh cha a hing, ahi theina diuvin hil'in. Amaho chun tahsan dettah aneiyuva chule ngailutna le thohhatna a adimset diu ngai ahi. 3 Chutobangma chun, nupi tehse lang jep ho jong chu Pathen jatah a hinkho mang din hil'in. Amaho chu mihehse hat le ju a lop hilouva, chusanga midang thilpha ipi ahi ahil diu ahi. 4 Hiche nupi tehse lang jep ho chun nutil khangdongho chu a inneipu te chengu ngailut leh achateu ngailutje ahil diu, 5 Lung limgeh le thengsel'a um ding, ama in'a natong mi hi ding, chule naphatong le a inneipu teu noiya kun ahina diuva ahil diu ahi. Chuti le Pathen thu chu jachatna a asosah lou diu ahi. 6 Hitobang machun, khangdong ho chu limgeh cha a hing din tilkhouvin. 7 Chule nangma tah jong imalam jousea ama hon thilpha bolna lama avettoh a ajuina dingun um'in. 8 Thutah chu hilin, chutileh na thuhil chu adem theilou dingu ahi. Chuteng eiho dem'a pang ho chu jahcha uva chule ichung uva seiding ima aneilou dingu ahi. 9 Sohho chun apakaihou thuphat jousea angai jing dingu chule ajochan uva alunglhai sah diu ahi. Ama hon nelkal dauhen, 10 ahilouleh guhchat bol dauhen, amavang imalam jouseah ginchat thei le apha ahinau vetsah uhen. Chuteng eihuhhing uva Pathen chung changa kithuhilna chu dei umtah asodoh dingu ahi. 11 Ajeh chu Pathen mihepina hung kilah a mijouse huhhingna chu ahin lhut ahitai. 12 Chuleh eiho Pathen ngaisah louna le chonset nopsahna a konna kiheimang dinga kihilchah ihiuve. Hiche gitlouna leiset a hi lunglima, chondihna a chule Pathen ngaisahna neiya ikhosah dingu ahi, 13 chutia kinep umtah chuche nikho loupitah Pathen hatchungnung le eihuhhing uva Jesu Christa loupina hung kilah ding ni chu katjinga um ihiu ahi. 14 Aman chonsetna jousea kon eisoptheng diu, i-ontholna diu, chule ama mitea eisem uva napha tong dinga apumpia kiphaltheng ihina ding uva ahinkho manbeiya eipeh u ahi.✡ 15 Nangman hichengse hi nahil'a chule tahsan chate chun abol diuva natilkhou ding ahi. Angaikhoh dungjuiya nangman amaho suhdihna tha nanei ahi, hijeh chun koimacha nathusei nahsahmo bolsah hihhel in.