118
Orasaun agradesimentu tanba manaan funu
1 Foo agradese ba NAI Maromak, tanba Nia nee diak;
Nia domin dura tinan ba tinan.
2 Israel oan sira, dehan sai ba,
“Nia domin dura tinan ba tinan.”
3 Arão nia jerasaun sira, dehan sai ba,
“Nia domin dura tinan ba tinan.”
4 Ema nebee hamtauk NAI Maromak, dehan sai ba,
“Nia domin dura tinan ba tinan.”
5 Bainhira susar hanehan hau, hau halerik ba NAI Maromak;
Nia lori tiha hau ba iha rai luan.
6 NAI hamutuk ho hau, nunee hau la tauk ida.
Ema mundu nee bele halo saida ba hau?
7 NAI hamutuk ho hau; Nia mak tulun hau;
hau sei haree hau nia inimigu sira lakon.
8 Diak liu hamahon aan iha NAI
duke tau laran ba ema mundu nee.
9 Diak liu hamahon aan iha NAI
duke tau laran ba ukun nain sira.
10 Uluk nasaun jentiu hotu-hotu mai serku hau,
maibee hodi NAI nia naran, hau baku tuun tiha sira.
11 Sira serku hau husi sor-sorin,
maibee hodi NAI nia naran, hau baku tuun tiha sira.
12 Sira hobur hau hanesan bani,
maibee ahi haan sira lalais hanesan fali ahi haan ai tarak;
hodi NAI nia naran hau baku tuun tiha sira.
13 Ema dudu hau ba kotuk, hau besik atu monu,
maibee NAI tulun tiha hau.
14 NAI mak hau nia forsa; hau hananu ba Nia;
Nia sai tiha ona hau nia Salvador.
15 Ema moris loos haksolok iha sira nia tenda laran tanba sira manaan;
sira haklalak dehan, “NAI nia liman loos halo ona buat boot!
16 NAI foti aas tiha ona Nia liman loos;
NAI nia liman loos halo ona buat boot!”
17 Hau sei la mate maibee moris,
no hau sei foo sai buat nebee mak NAI halo tiha ona.
18 NAI foo ona kastigu todan mai hau,
maibee Nia la entrega hau ba mate.
19 Loke portaun moris loos nian mai hau,
atu hau bele tama ba laran hodi foo agradese ba NAI Maromak.
20 Ida nee mak NAI nia portaun;
ema nebee moris loos sei tama husi nee.
21 Hau foo agradese ba Ita Boot, tanba Ita Boot rona ona hau;
Ita Boot sai tiha ona hau nia Salvador.
22 Iha fatuk ida nebee badaen fatuk sira lakohi uza,
maibee agora fatuk nee mak sai fali fatuk nebee prinsipal.
23 NAI Maromak rasik mak hili fatuk nee;
ita haree ba furak teb-tebes.
24 Ohin loron mak NAI Maromak halo nunee;
mai ita haksolok ho kontenti iha loron ida nee.
25 NAI Maromak, favor salva ami!
NAI, foo rezultadu diak ba ami nia servisu.
26 NAI foo bensaun ba ema ida nebee mai lori NAI nia naran;
husi NAI nia uma ami foo bensaun ba imi.
27 NAI mak Maromak;
Nia foo tiha ona Nia naroman hodi leno ita.
Kaer ramus tahan iha liman laran ba
hodi halo prosisaun too iha altar.
28 Ita Boot mak hau nia Maromak, hau sei hahii Ita Boot;
Ita Boot mak hau nia Maromak, hau sei foti aas Ita Boot nia naran.
29 Foo agradese ba NAI Maromak, tanba Nia nee diak;
Nia domin dura tinan ba tinan.