132
Nai Maromak nia promesa ba liurai David
Kantiku peregrinasaun nian.
1 NAI Maromak, hanoin nafatin David ba;
keta haluha terus ho susar nebee nia hasoru.
2 Nia jura ba NAI;
Nia halo ona juramentu ba Jacó nia Maromak Kbiit Nain dehan,
3 “Hau sei la tama iha hau nia uma laran
ka deskansa iha hau nia toba fatin;
4 hau sei halo hau nia matan lakan hela deit;
hau lakohi dukur,
5 too hau hetan fatin ida ba NAI Maromak;
too hau hetan hela fatin ba Jacó nia Maromak Kbiit Nain.”
6 Iha rai Efrata ita rona kona ba kaixoti promesa nian;
ita hetan kaixoti nee iha rejiaun Jaar nian.
7 Depois ita dehan, “Mai ita baa iha NAI nia hela fatin;
mai ita hakruuk iha Nia ain hodi adora Nia.”
8 NAI Maromak, hamriik ba hodi tama iha Ita Boot nia fatin deskansa;
lori ho kaixoti promesa nian, ida nee hatudu sai Ita Boot nia kbiit.
9 Hau harohan atu Ita Boot nia nai lulik sira hatais lia loos,
no Ita Boot nia povu santu hananu haksolok.
10 Keta fila kotuk ba liurai nebee Ita Boot hili ona,
tanba Ita Boot promete tiha ona ba Ita Boot nia atan David.
11 NAI Maromak jura tiha ona ba David;
Nia jura ho lo-loos, no sei la dada fila fali. Nia dehan,
“Hau sei foti o nia oan ida
hodi sai liurai iha o nia fatin.
12 Se o nia oan sira kaer metin hau nia promesa
no halo tuir lei nebee Hau hanorin ba sira,
entaun sira nia oan sira mos sei tuur
hodi ukun iha o nia fatin tinan ba tinan.”
13 NAI Maromak hili tiha ona Siaun;
Nia hakarak sidade nee sai Nia hela fatin. Nia dehan,
14 “Ida nee Hau nia fatin deskansa tinan ba tinan;
Hau sei hela iha nee tanba Hau nia hakarak mak nee duni.
15 Hau sei haraik bensaun ba sidade nee too ai haan nakonu;
Hau sei foo ai haan ba ema kiak sira haan too bosu.
16 Nai lulik sira iha sidade nee, Hau sei foo hatais ho salvasaun;
povu santu nebee hela iha sidade nee sei hananu haksolok.
17 Iha sidade nee Hau sei foo kbiit ba David;
Hau sei halo nia ahi oan lakan beibeik tanba Hau mak hili nia sai liurai.
18 Hau sei halo nia inimigu sira moe boot,
maibee liurai nia koroa sei nabilan.”