2
Hanorin kona ba orasaun
Nee duni hau husu liu-liu atu imi halo orasaun ba ema hotu-hotu. Harohan husu Maromak nia tulun, i agradese ba Nia. Halo orasaun nunee ba liurai sira ho ukun nain sira hotu, atu ita bele moris iha pas ho hakmatek hodi moris tuir Maromak nia hakarak i hamtauk ba Nia. Orasaun hanesan nee diak i halo haksolok Maromak ita nia Salvador, tanba Nia hakarak atu ema hotu-hotu hetan salvasaun i kompriende lia loos. Maromak mesak ida deit. I so Kristu Jesus deit mak bele halo dame entre Maromak ho ita ema. Nia rasik ema, i Nia foo Nia Aan para selu kotu ita ema hotu-hotu nia tusan hodi foo liberdade ba ita. Ho nunee, tuir tempu nebee Maromak desidi ona, Nia hatudu mo-moos mai ita katak Nia hakarak salva ema hotu. Tanba nee Nia hili hau sai apostolu hodi baa haklaken Liafuan Diak ba sira nebee laos ema Judeu, i hanorin Maromak nia lia loos ba sira atu sira mos fiar ba Jesus. Hau apostolu duni, hau la bosok.
Bainhira sarani sira halibur malu halo orasaun iha nebee-nebee, hau hakarak atu mane sira halo orasaun ho laran moos. La bele hirus ka istori malu. Nunee mos hau hakarak atu feto sira hatais ropa tenki hatene aan, tenki tau ropa nebee hatudu respeitu. Lalika halo fuuk oi-oin ka uza osan mean ka morteen perola rebo-rebo, ka hatais ropa folin karun para enfeita aan. 10 Diak liu imi enfeita aan ho hahalok diak. Nee mak serve ba feto nebee dehan nia adora Maromak.
11 Bainhira ema hanorin Maromak nia liafuan, feto sira tenki nonook hodi rona ho respeitu tomak. 12 Hau la foo lisensa ba feto sira atu hanorin mane ka manda mane sira, feto tenki nonook. 13 Tanba Maromak halo uluk Adão mak foin halo Eva. 14 I laos Adão mak monu ba Satanás nia lia bosok, maibee Eva mak monu hodi kontra Maromak nia orden. 15 Maibee bele nunee mos, feto sira sei hetan salvasaun liu husi hetan oan,* naran katak sira nafatin fiar ba Kristu, hadomi ema seluk, moris ho laran moos, i hatene aan.
2:7 2 Timóteo 1:11 2:9 1 Pedro 3:3 2:13 Jénesis (Kejadian) 2:7, 2:21-22 2:14 Jénesis (Kejadian) 3:1-6 * 2:15 Liafuan “feto sira sei hetan salvasaun liu husi hetan oan”, nia signifikadu laduun klaru.