17
1 Fa demoke ty troko,
le modo o androkoo; vaho veka’e amako ty kibory.
2 Toe amako atoa o mañinje ahikoo;
naho harefe’ o masokoo
ty fanigiha’ iareo?
3 Toloro antoke henaneo, Ihe ro tsoake, ia ka ty hifampipao-pitàñe amako?
4 Fa nakite’o ty tro’ iareo tsy hahilala,
aa le tsy honjone’o.
5 Ie mifosa rañetse hahazoa’e raha,
le hilesa ka o mason’ ana’eo.
6 Fe nanoa’e mpitolom-bola’ ondaty;
firorà’ o lahilahio ty tareheko.
7 Nampaieñe ty fioremeñako o masokoo,
hoe talinjo avao o fangefangekoo.
8 Ilatsa’ ondaty vantañeo, hitrobo-vatañe ty vaño
hatreatre’e ty tsy aman-kake.
9 Mitan-ty lala’e ty marentane,
naho mihaozatse vaho mihafatratse
ty malio fitàñe.
10 Aa inahareo iaby,
mibaliha mb’etoa indraike,
f’ie tsy hahatrea ondaty mahilala ama’ areo.
11 Fa modo o androkoo,
nipeñapeñake o safirikoo;
naho o fisalalan-trokoo!
12 Afote’ iereo ho andro ty haleñe
[ami’ty hoe]:
Mitotoke añatrefa’ i ieñey ty hazavàñe,
13 Ie andiñisako ho akibako
ty tsikeokeoke, naho añ’ieñe ao
ty andafihako i tihikoy,
14 Aa naho tokaveko i koboñey, [ty hoe:] Raeko rehe, naho i oletsey:
Ihe ty Reneko naho rahavaveko;
15 Aia arè o fitamakoo?
I fisalalàkoy, ia ty mahaisak’ aze?
16 Hilenteke mb’an-tsikeokeoke ao hao re?
hitrao-pitofàñe an-debok’ ao hao zahay.