6
1 Janjiño henaneo ty nafè’ Iehovà:
Miongaha, aboaho amo vohitseo o enta’oo, ampitsanoño o haboañeo ty fiarañanaña’o.
2 Mitsendreña ry vohitseo, ty sisì’ Iehovà,
ry manantañe maoza’ ty tane toio,
fa manan-kabò am’ondati’eo t’Iehovà,
ie toe hifanjomotse am’Israele.
3 O ry ondatikoo,
ino ty nanoako azo?
Akore ty nahamokorako azo?
Atalilio.
4 Zaho nañakatse azo
an-tane Mitsraime añe,
nijebañ’azo an-trañom-pañondevozañe,
le nampiaoloeko azo t’i Mosè naho i Aharone vaho i Miriame.
5 O ry ondatikoo, tiahio henaneo i nikinià’ i Balake mpanjaka’ i Moabey,
naho ty natoi’ i Balame ana’ i Beore aze boake Sitime pake Gilgale,
hahafohina’ areo o sata-vanta’ Iehovào.
6 Akore ty hiatrefako Iehovà?
ty hiambaneako aman’ Añahare
Andindimoneñey?
Hiatrefako an-tsoron-koroañe hao,
an-temboay hao?
7 Ho no’ Iehovà hao t’ie kobatròk’ arivo?
ndra torahañe rai-ale mikararàke menake?
hatoloko hao ty tañoloñoloñako
ty amy fiolàkoy?
ty vokan-troko ty amo hakeom-piaikoo?
8 Fa natoro azo, ry koahe, ty hasoa,
naho ty ipaia’ Iehovà:
te hanoe’o ty hiti’e,
t’ie ho tea fiferenaiñañe,
vaho hirè-batañe hindreza’o fañavelo aman’ Añahare’o.
9 Mikoik’ amy rovay
ty fiarañanaña’ Iehovà,
hañaoñe ty tahina’o ty mahihitse.
Janjiño i Kobaiñey, naho i nanendre azey.
10 Mbe amam-baran-katsivokarañe hao
ty añ’akiba’ i lo-tserekey?
naho i kapoa-tomotse tìvay.
11 Ho volilien-ko hiringiri’e hao raho
t’ie amam-balantsy vìlañe,
naho amam-batom-pamañahiañe an-koroñe ao?
12 Ie pea katramo o mpañalealeo,
naho mivolam-bande o mpimone’eo,
vaho mamañahy am-bava’e ao ty lela’ iareo.
13 Aa le ho silòfeko rehe,
ho zevoñeko ambane, hampibangìñ’ azo
ty amo tahi’o maroo.
14 Hikama rehe fa tsy ho anjañe;
hasalikoañe mampikoritoke
ty an-tro’o ao;
hanao an-driha rehe fa tsy hahafihaja,
vaho hatoloko ami’ty fibara ze nakafi’o.
15 Hitongy rehe fe tsy hanatake;
handia olive fe tsy hihosotse
amy menakey;
naho hampipiritse valoboke,
fe tsy hinome’o ty divai’e.
16 Nitambozora’ areo o fañè’ i Omrio;
naho nitàñ’ o sata’ i Akabeo,
naho nañavelo amo fisafiri’ iareoo;
aa le hampangoakoaheko rehe,
hampikosihañe o mpimoneñeo,
le ho vavè’ areo ty inje’ ondatikoo.