2
Ty Hasoa o Hihitseo
1 O anake, naho iantofa’o
o fivolakoo vaho akafi’o añ’ova’o ao o lilikoo,
2 naho añilaña’o sofiñe ty hihitse,
naho anokilaña’o troke ty hilala,
3 naho kaihe’o ty fitsikarahañe,
naho pazahe’o ty faharendrehañe
4 naho itsoeha’o hoe volafoty
ikodebea’o hoe vara mikafitse :
5 Le ho rendre’o
ty fañeveñañ’ am’ Iehovà
vaho hitendreke ty fahafohinañe an’Andrianañahare.
6 Fa manolo-kihitse t’Iehovà
boak’am-palie’e ao ty hilala
naho ty faharendrehañe.
7 Añaja’e hihitse maharongatse
amo vantañeo,
fikalan-dRe amo mpañavelo
an-kahitiañeo,
8 arova’e o lalan-katòo,
naho ambena’e ty lala’ o noro’eo.
9 Le ho fohi’o ty havantañañe
naho ty hatò, naho ty hamiràñe,
vaho ze lalañe soa;
10 Hizilik’ añ’ova’o ao ty hihitse,
naho hahafale ty tro’o ty hilala;
11 Hañambeñ’ azo ty filieram-batañe,
hijilova’ ty faharendrehañe;
12 hasita’e ami’ty lalan-karatiañe,
amy t’indaty mivolam-bìlañe,
13 amo miveve boak’ amo lalan-kahitiañeoo, hijarabajaraba
amo lalan-kaieñeo,
14 amo mirebek’ ami’ty hatsivokarañeo,
naho mifale ami’ty hamengohan-
karatiañeo,
15 ie mikelokeloke an-dia,
vaho miridrike an-dalañe;
16 Hamotsots’azo ami’ty tsimirirañe,
ami’ty karapilo mitsiriry an-drehake,
17 i namorintseñe ty valin-katorà’ey,
vaho mandikoke i fañinan’ Añahare’ey.
18 Migodroñe mb’am-pihomahañe ao ty akiba’e,
minday mb’an-kavilasy ao o lala’eo;
19 Le lia’e tsy mimpoly
ze miheo mb’ama’e ao,
tsy ho taka’e ka o lalan-kaveloñeo.
20 Aa le handenà’o ty lala’ o soao,
naho hifahara’o o lala’ o vantañeoo.
21 Fa hitoboke amy taney o vañoñeo,
vaho himoneñe ao o malio-tahiñeo;
22 Fe haitoañe amy taney o lo-tserekeo,
vaho ho voroteñe o mpamañahio.