23
1 Ie miambesatse hitrao-pikama
ami’ty mpifehe,
biribirio ty añatrefa’o eo,
2 vaho tohoro meso ty tretra’o
naho mpanao avetse rehe.
3 Ko lelalelae’o o raha mafiri’eo,
fa mahakama mahatsikapy.
4 Ko mamokotse vatañe ho mpañaleale,
ijihero am-pisafiri’o.
5 Ampihelañe’o fihaino hao ty tsy eo?
fa toe mitsene elatse
manahake ty vantio ty vara
mitiliñe mb’an-dindiñe eñe.
6 Ko kamae’o ty hàne’ o matitio,
ko irie’o o aze mafirio;
7 Fa hambañe ami’ty fañereñere’e
añ’ova’e ao ty ie: hoe re ama’o;
Mikamà naho minoma!
fe tsy ama’o ty tro’e.
8 Hilañe’o i pilipito’e nitsopehe’oy,
vaho hianto i fañandriaña’oy.
9 Ko misaontsy am-pitsanoña’ ty seretse,
fa ho sirikae’e ty hihi’ o enta’oo.
10 Ko avi’o ty nifaritsohañe haehae,
vaho ko miaribañe ty tanem-bode-rae,
11 amy te maozatse ty mpijeba’ iareo;
hitohaña’e ty ama’o.
12 Ampiantofo filie-batañe ty arofo’o,
vaho volan-kilàla o ravembia’oo.
13 Ko ahànkañe ami’ty ana’o ty lilo;
fa tsy mahavetrake ty lafan-kobaiñe.
14 Ie pisoe’o an-kobaiñe,
ho haha’o an tsikeokeok’ ao ty tro’e.
15 O anako, naho mahihitse ty tro’o,
ho ehake ty troko,
16 vaho hirebeke ty añ’ovako ao
naho mahafivolañe ty hiti’e o soñi’oo.
17 Ko apo’o ho tsikirihen-tro’o
ty mpandilatse,
fe imaneo lomoñandro
ty fañeveñañe am’ Iehovà.
18 Toe ey ty ho avy,
vaho tsy haitoañe ty fisalalà’o.
19 O anako, mitsanoña naho mahihira,
vaho avantaño mb’amy lalañey ty tro’o.
20 Ko mitraok’ amo
mpitolom-pitrini-divaio,
ndra amo mpamotseke henao;
21 fa songa hivarin-ko rarake
ty mahake naho i jike;
vaho hisikin-tsirodea ty poie.
22 Tsendreño ty rae nisamak’ azo,
vaho ko injè’o ty rene’o t’ie bey.
23 Vilio ty hatò le ko aletake;
ikalò hihitse naho anatse vaho hilala.
24 Handia taroba ty rae’ i mahitiy;
vaho hifalea’e i ana-dahy karafito nampiareñe’ey.
25 Ampiehafo ty rae’o naho i rene’o;
hampinembanembañ’ i nisamak’ azoy.
26 O anake, atoloro ahiko ty tro’o,
le ampifaleo amo satakoo o maso’oo.
27 Kadaha laleke ty tsimirirañe,
vaho vovoñe maifitse ty karapilo.
28 Mivoñoñe ao re hoe malaso,
vaho ampitomboe’e am’ondatio
ty hatsivokarañe.
29 Ia ty mioremèñe, ia ty mihontoke?
Ia ty ampoheke? Ia ty mitoreo?
Ia ty vinonotroboke tsy amam-poto’e;
Ia ty ama-maso mandofiry?
30 O mihenekeneke an-divaio,
o mitolom-pitsopeke divay linaroo.
31 Ko hentea’o ty hamena’ ty divay,
ty fimilomilo’e am-pitovy ao,
ty falamam-pioriha’e.
32 Ie am-para’e mitifatse hoe lapetake
vaho mihehetse hoe fandrefeala.
33 Hahaoniñe sahàtse o maso’oo,
vaho hivolan-kamengohañe
ty ron-doha’o.
34 Le hanahake ty mitsalalampatse
aivo’ i riakey rehe,
naho ty mandre ambone’
ty bodan-dain-dakañe eo.
35 Namofok’ ahy iereo,
fe tsy manaintaiñe;
linafa’e fe tsy nireiko!
Ombia te ho tsekake hipaiako indraike?