27
1 Ko irengevoha’o ty hamaray,
fa tsy fohi’o ze mete haboa’ ty andro.
2 Angao ho tsiririe’ ty ila’e
fa tsy ty falie’o,
ty alik’ama’o fa tsy o fivimbi’oo.
3 Mavesatse ty vato; midogìñe ty faseñe,
fe mavesatse te am’iereo
ty haembera’ i dagola.
4 Toe masiake ty habosehañe,
sorotombake ty loa-tiñake,
fa ia ka ty mahafiatreke ty famarahiañe.
5 Hàmake ty endak’ am-batraike,
ta ty hatea mietake.
6 Vente’e ty fikobokoboan-drañetse,
ta ty oroke maro’ i rafelahiy.
7 Malay tantele ty ànjañe,
fe mamy ami’ty saliko ze atao mafaitse.
8 Hoe foly mandifik’ ami’ty traño’e,
t’indaty mandridrike ami’ty akiba’e.
9 Mampinembanembañ’ arofo
ty rano mañitse naho ty rame,
vaho mahasaro-tron-drañetse
ty famerea’ondaty.
10 Ko aforintse’o ty rañe’o
naho ty rañen-drae’o,
vaho ko mamonje ty anjomban-drahalahi’o
naho mivovò ama’o ty hankàñe;
kitra’e ty mpitrao-tanàñe marine eo,
ta ty rahalahy añe.
11 Mahihira rehe anake,
naho ampiehafo ty troko,
hahavaleako ze mitombok’ ahy.
12 Mahaonin-kankàñe ty mahilala
le miampitse,
fe misibeke mb’eo ty forom-po,
vaho mijale.
13 Rambeso ty sarimbo’ i
nitsoake ambahiniy,
le ifihino ho antoke ty amy ampela tsy fohiñey.
14 Ty mitata rañetse am-pazake
te terak’ andro,
hatao ho fatse ama’e.
15 Hambañe ami’ty fitsopatsopan’
andro avy,
ty rakemba mitribahatse;
16 hamejan-tioke t’ie hamejañ’aze,
hoe mamihiñe menak’ am-pitàn-kavana.
17 Maniom-by ty vy,
vaho andrañita’ ondaty ty vintan-drañe’e.
18 Hikama ty voa’e
ty mañalahala sakoañe,
vaho hasiñeñe ty miatrake i talè’ey.
19 Manahake ty tarehen-drano hetsoroen-daharañe,
ty hetsoroen’ arofo’ ondaty t’ondaty.
20 Tsimbia tsy etsake ty tsikeokeoke
naho ty hankàñe,
le liae tsy eneñe ty fihaino’ ondaty.
21 Am-patañe ty volafoty
vaho an-toñake ty volamena,
fitsoehañe ondaty ty engeñe atolots’aze.
22 Ndra te demoheñe amañ’ana-deo
an-deoñe mitraoke tsako lisaneñe
ty dagola,
mbe tsy hisitak’ ama’e ty hanè’e.
23 Rendreho soa o hare’oo,
vaho dareo o lia-rai’oo,
24 fa tsy nainai’e ty vara,
naho tsy ho añ’afe’afe’e
ty sabakam-bolonahetse.
25 Ie fa tinatake i ahetsey,
naho mitiry o tiritiri’eo,
vaho natontoñe ty ahetse am-bohitse ey;
26 ho siki’o o anak-añondrio,
vaho ho vilin-teteke o ose-lahio;
27 mahaeneñe ty fikama’o i rononon’ osey,
naho ho hane’ o keleia’oo,
vaho ho famahanañe o anak-ampata’oo.