6
Hatahata amo Hagegeañeo
1 O anake, ie nampipok’ antoke am’ondatio,
lehe nañoho-pitàñe hitsoake
ty ambahiny,
2 ie finandri’ ty entan-tsoñi’o, vinandibandi’ ty fireham-bava’o,
3 Ano zao, ty anake toke: Mivotsora, ie fa nihotrak’ am-pità’ ondatio: akia, mireha ama’e,
imaneo halaly indatiy!
4 Ampifoneño roro o maso’oo, tsy hidrodreke o vohomaso’oo.
5 Mibolitira hoe hirañe an-tañañe,
naho hoe kibo am-pitàm-pikehe.
6 Akia mb’ami’ty vitike, ry tembo,
haraharao o sata’eo vaho mahihira!
7 Ie tsy amam-pifehe, tsy amam-pisary,
tsy amam-pandily,
8 fe kotepè’e ami’ty asara ty hane’e,
vaho atonto’e am-pitatahañe
o lintse’eo.
9 Pak’ ombia rehe te mbe hitozoke,
ty mpitsorotake tia?
Ombia t’ie hitroatse amy firoroa’o?
10 Mikonkòñe kedeke, miroro tsi-ampe, mifehefare hitofa’o heike:
11 le hiambotraha’ ty hararahañe
hoe malaso,
vaho ty hapoiañe hoe lahifihaty.
12 Ty lahi-tembo naho i lahiaga:
i mpañariok’ am-bava vìlañey,
13 ami’ty maso mipie,
an-tomboke mitsao tane,
an-drambo-taña manondrotondro,
14 ie am-pikitrohan-draty an-tro’e nainai’e, ro mbore mikilily,
mitolom-pamitse fifalaiñañe;
15 Aa le, hiambotraha’ ty hankàñe
ami’ty manao zao le ho demoke
tsy lefe jangañeñe.
16 Eneñe ty raha heje’ Iehovà, Eka, fito ro tiva ama’e:
17 ty fihaino mievoñevoñe,
ty fameleke mandañitse,
ty fitàñe mampiori-dio-maly,
18 ty troke mikitro-karatiañe, ty fandia mifajifajy mb’an-katsivokarañe,
19 ty mpitalily vilañe, mikofòke lañitse, naho ty mampiboele fifankalaiñañe an-drolongo’e.
20 O anake, ambeno ty lilin-drae’o,
vaho ko apo’o ty fañòhan-drene’o.
21 Ifeheo an-tro’o ao nainai’e; rohizo am-bozo’o eo.
22 Hiaoloa’e te mijelanjelañe, ie màndre, hambena’e;
tsekake le ivesovesoa’e.
23 Toe failo o lilio,
naho hazavàñe t’i Hake, vaho lalan-kaveloñe o endake fanoroañeo.
24 Hikalañe azo tsy homb’ amy tsimirirañey, ami’ty lela-malama’ i karapiloy.
25 Ko irie’o an-troke
ty hamontramontra’e,
asoao tsy ho tsepahe’ ty vohomaso’e.
26 Vonga-mofo ty tamben-tsimirirañe,
fa naho vali’ ondaty,
le i fiaiñe sarotsey ty itsindroha’e.
27 Naho otroñe’ ondaty añ’araña’e ao ty afo,
tsy hirehetse hao ty saro’e ?
28 Mete lia’ondaty hao ty vae mirekake,
tsy hahamae’ o fandia’eo?
29 Zay ty fifandian-tihy
ami’ty vali’ ondaty:
tsy mete tsy liloveñe ty mitsapa aze.
30 Tsy injè’ ondatio ty mpampikametse
te mikizo hampahaeneñe ty fiai’e saliko,
31 fa ndra ie, naho tsepake,
ro hañavake im-pito,
fonga hondroha’e ze vara añ’akiba’e ao.
32 Akore ty hagegea’ ty mañarapilo
an-drakemba:
fa sata’ ty handrotsa-batañe.
33 Vono-troboke naho hasalarañe ty ho zoe’e, vaho tsy ho faopaoheñe ka i inje’ey.
34 Mampiforoforo ondaty ty famarahiañe, tsy hapo’e amy andro hamalea’e fatey.
35 Tsy handrambesa’e ondroke,
tsy mahatèke aze
t’ie ampitoboroñan-dravoravo.