116
1 Kokoako t’Iehovà amy te janji’e
ty feoko naho o halalikoo,
2 Amy te nanokilaña’e ravembia,
le ho tokaveko Amy ze hene androko.
3 Nivandire’ o talin-kavilasio raho,
nazi’ i tsikeokeokey;
nizò fikoretañe naho anahelo.
4 Le nikanjieko ty tahina’ Iehovà:
Ehe, r’Iehovà, hahao ty fiaiko!
5 Matarike t’Iehovà naho mahity;
Eka, mpitretrè t’i Andrianañaharentika.
6 Arova’ Iehovà o trentrañeo,
nizo havoretra raho fe rinomba’e.
7 Mimpolia mb’am-pitofà’o ao ry fiaiko,
fa nampiraorao azo t’Iehovà.
8 Fa navotso’o an-kavetrahañe ty fiaiko,
tsy ho foy rano o masokoo, tsy hitsikapy o tombokoo,
9 t’ie hitsontik’ añatrefa’ Iehovà,
an-tanen-kaveloñe ao.
10 Nahatoky avao ndra te nataoko ty hoe: Mafe ty fisotriako.
11 Hoe raho te nianifañe:
Fonga Remborake ondatio.
12 Akore ty hañavahako am’ Iehovà?
ami’ty habein-kasoa’e amako?
13 Ho zonjoñeko
ty fitovim-pandrombahañe
vaho hikanjy ty tahina’ Iehovà.
14 Havahako o nifantàko am’ Iehovào,
añatrefa’ ondati’e iabio.
15 Sarotse am-pihaino’ Iehovà
ty havilasi’ o noro’eo.
16 Ry Iehovà, toe mpitoro’o raho, fetrek’oro’o,
ty anan’ anak’ampata’o;
fa nabala’o o rohikoo.
17 Hengaeko sorom-pañandriañañe,
vaho ho kanjieko ty tahina’ Iehovà.
18 Hondrohako am’ Iehovà
o nifantàkoo,
Eka, añatrefa’ ondati’e iabio.
19 An-kiririsan’anjomba’ Iehovà eo,
añivo’o ao, ry Ierosalaime.
Treño t’Ià!