139
1 Ho a i Talè, Sabo’ i Davide.
Ry Iehovà, fa nitsikarahe’o raho,
mbore arofoana’o.
2 Arofoana’o ty fitobohako
naho ty fiongahako;
oni’o ty ereñeren-troko
ndra te tsietoitàne añe.
3 Vandroñe’o o liakoo,
naho o fandreakoo;
hene arofoana’o o lalakoo.
4 Ie mbe tsy an-delako ao ty fivolako,
Hete! ry Iehovà, kila arofoana’o.
5 Nifahera’o raho—
aolo eo naho amboho ao;
vaho nisazoha’o fitàñe.
6 Loho fanjàka amako i hilala zay, abo, tsy takako.
7 Aia ty hombako hisitak’ amy Arofo’oy?
Aia ty hibotitsihako o lahara’oo?
8 Ie mionjom-b’an-dikerañe mb’eo raho,
eo rehe;
naho alafiko an-kerakerak’ ao
ty fandreako, hehe t’ie eo;
9 Ie rambeseko o ela’ i maraiñeio,
naho mitoetse añ’ olon-driake
tsietoitane añe,
10 eo ka ty hitehafam-pità’o ahy,
naho hanazok’ ahiko ty fità’o havana.
11 Ie anoeko ty hoe,
Toe hanafotse ahy ty ieñe,
vaho hivalike ho haleñe
ty hazavàñe amako,
12 Fe ndra o hamoromoroñañeo
ro tsy maieñe ama’o,
mireandreañe hoe i àndroy ty haleñe,
hàmbañe ty hazavàñe naho ty ieñe.
13 Tsinene’o o añovakoo;
nanenoñ’ ahy an-tron-dreneko ao.
14 Andriañeko rehe,
fa an-karevendreveñañe naho halatsàñe
ty nitsene’o ahiko;
fanjàka o satam-pità’oo,
toe apota’ ty fiaiko.
15 Tsy nietak’ ama’o o taolakoo, ie nanoeñe an-kafitse ao,
naho nitseneñe an-kahimbañe
an-kalalefan-tane ao,
16 Nivazohom-pihaino’o
o nanoeñe ahikoo,
naho nipatereñe amy boke’oy
ze hene andro norizañe ho ahy,
ie mboe tsy teo ty raike.
17 Miheotse amako o fivetsevetse’oo
ry Andrianañahare!
Mienene t’ie mitraoke !
18 Ie imaneako iake, le andikoara’e ty ia’ o faseñeo.
ie tsekake, le mbe ama’o eo.
19 Ehe ohoño loza o lo-tserekeo,
ry Andrianañahare !
Mihankàña amako arè,
ry ondaty mpampiori-dioo,
20 Injè’ iareo an-keloke rehe,
manoñoñe Azo tsy vente’e
o malaiñ’Azoo;
21 Tsy hejeko hao o tsy tea azoo,
ry Iehovà?
Tsy hifangantoreko hao
o miatreatre ama’oo?
22 Toe hejeko am-palai-mena;
fonga volilieko ho rafelahiko.
23 Tsikaraho raho, ry Andrianañahare,
arofoano ty troko;
tsoho vaho arendreho
o fitsakoreakoo.
24 Vazoho, he amako ao ty fiolañe,
vaho iaolò mb’an-dalañe nainai’e mb’eo.