147
1 Treño t’Ià! Amy te soa ty fijejoañe
aman’ Añaharentika;
toe fanjàka naho mañeva
ty fandrengeañe Aze.
2 Ampitomboe’ Iehovà t’Ierosalaime :
atonto’e o añombelahi-mavo’
o nte-Israeleoo.
3 Jangane’e ty mikoretse añ’arofo, ho bandie’e o fere’eo.
4 Volilie’e ty ia’ o vasiañeo;
songa kanjie’e ami’ty añara’e.
5 Jabahinake i Talèn-tikañey,
ra’elahy an-kafatrarañe;
tsy taka-jehèñe ty hilala’e.
6 Tohaña’ Iehovà o mirèkeo,
gorè’e an-tane ty lo-tsereke.
7 Sabò am-pañandriañañe t’Iehovà;
Rengeo t’i Andrianañahare
am-piarahañe marovany,
8 Ie ty mpandafike rahoñe
an-dikerañe eñe,
naho mpañajary orañe an-tane atoy,
naho mampitiry ahetse am-bohitse ey.
9 Fahana’e hàneñe o bibio,
naho o ana-koàke migagakeo.
10 Tsy ty haozara’ o soavalao
ty mahahaha Aze,
tsy ty kitson-dahilahy ro ifalea’e.
11 Ondaty mañeveñe ama’eo
ro noro’ Iehovà,
o mpitamà ty hafatram-pikokoa’eo.
12 Rengeo t’Iehovà, ry Ierosalaime;
onjono t’i Andrianañahare’o, ry Tsiône.
13 Fa nampifatrare’e
o sikadan-dalam-bei’oo;
tahie’e o ajalahy ama’oo.
14 Ampierañerañe’e o efe-tane’oo,
vaho ampieneña’e ampemba soa.
15 Ahitri’e mb’an-tane atoy o fetse’eo, mipirirìtse o taro’eo.
16 Anjotsoa’e oram-panala
hoe volon’ añondry;
afiafia’e hoe lavenoke ty fanala.
17 Afitse’e ami’ty minjikio’e ty havandra’e, ia ty mahafijohañe miatreke
ty fangoratsaha’e.
18 Irahe’e mb’eo o tsara’eo
le mitranake iereo;
ampitiofe’e o tio’eo, vaho
ampidoañe’e rano.
19 Talilie’e am’ Iakobe ty tsara’e;
am’ Israele o fañè’eo naho o fepè’eo.
20 Tsy nanoe’e zay o tane ila’eo;
tsy fohi’ iereo o nafè’eo.
Treño t’Ià.