21
Ho a i Talèn-tsakeray, Sabo’ i Davide
1 RyIehovà, mirebeke
ty haozara’o i mpanjakay;
mandia taroba
amy fandrombaha’oy.
2 Fa natolo’o aze ty naìnañ’ arofo’e,
le tsy nangazoña’o ama’e
o halalin-tsoñi’eo. Selà
3 Salakae’o am-pitahian-tsoa;
apo’o añ’ambone’e eo
ty sabaka volamena ki’e.
4 Nihalalia’e haveloñe, le natolo’o aze,
eka, halava andro kitro añ’afe’e.
5 Mañonjoñe ty enge’e o fandreketa’oo,
nanampeza’o asiñe naho volonahetse.
6 Nampiraoraoe’o nainai’e;
Ampirebehe’o ami’ty hafaleañe
añ’atrefa’o.
7 Iatoa’ i mpanjakay t’Iehovà,
ie tsy ho ronjeronjeñe ty amy
fiferenaiña’ i Andindimoneñey.
8 Ho onim-pità’o ze hene rafelahi’o;
ho takarem-pitàn-kavana’o
o malaiñe azoo.
9 Hampanahafe’o ami’ty toñake
mirekake iereo
an-tsam-piforoforoa’o;
hagodra’ Iehovà an-kaviñerañe,
vaho ho forototoe’ ty afo.
10 Ho mongore’o an-tane atoy
o tarira’ iereoo,
naho o tiri’iareoo amo ana’ondatio.
11 Nikilily raty azo iereo,
nikitroke haratiañe ama’o,
f’ie tsy ho lefe,
12 Hampiambohoe’o iereo
Ampibitsohe’o fale o lahara’eo.
13 Mionjona ry Iehovà an-kaozara’o !
Ho saboe’ay naho ho bangoa’ay
ty hafatrara’o!