31
Ho a i Talè; Sabo’ i Davide
1 Ama’o ao, ry Iehovà, ty fitsolohako;
ko apoho ho salaren-ka,
hahao amo havantaña’oo.
2 Atokilaño amako ty ravembia’o, imbao masìka,
t’ie ho lamilamy fipalirako,
kijolim-pandrombahañe ahy.
3 Toe Ihe ro lamilamiko naho kijoliko;
i Tahina’oy ro hanehake naho hiaolo ahy.
4 Akaro amy harato naeta’iareo amakoy,
amy te Ihe ro fitsolohako.
5 Am-pità’o ao ro anolorako troke,
fa nijebañe ahy rehe ry Iehovà,
Andrianañaharen-kavantañañe.
6 Hejeko o mpañaoñe
ty hakoafan-dRemborakeo;
Iehovà ro iatoako.
7 Hifale naho hirebeke
amo fiferenaiña’oo raho,
fa nihaoñe’o o hasotriakoo;
naho niarofoana’o
ty haferenaiñako,
8 tsy napo’o an-tañan-drafelahiko ao;
fa navotra’o an-tane mangadagadañe
eo o tombokoo.
9 Tretrezo ry Iehovà, fa tokoen-draha;
nabotsem-pihontoke o masokoo,
eka, ty fiaiko naho ty sandriko.
10 Fa nirì-ty hontoke ty fiaiko,
naho ty fiselekaiñañe o taokoo,
milesa ty haozarako ty amo tahikoo,
vaho minike o taolakoo.
11 Toe finjèn-draho ty amo rafelahikoo,
mentsake o mpiharo-tanàñ’ amakoo,
fañembañañe o rañekoo,
mibotitsik’ amako ze mahaoniñ’ahy
an-dalañe ey.
12 Haliño hoe lolo raho,
tsy amam-betsevetse;
manahake ty karabiba.
13 Tsinanoko ty bisibisi’ i màroy,
harevendreveñañe mb’etia mb’atia,
mikinia ahy,
ikililia’e ty hañè-doza amako.
14 Fe zaho, Ihe ro fiatoako ry Iehovà
hoe raho: Ihe ro Andrianañahareko.
15 Am-pità’o o androkoo;
avotsoro an-taña’ o rafelahikoo,
naho amo mpanao samporerakeo.
16 Ampaviaho amy mpitoro’oy
ty lahara’o;
hahao amo fiferenaiña’oo.
17 Ko apo’o ho salaren-draho ry Iehovà,
fa mikanjy Azo,
fe meñaro o lo tserekeo, ampitsiño an-tsikeokeok’ ao.
18 Hampianjiñeñe
o famelen-dremborake
manotratsotrake o vantañeo
ie mirengevoke naho mañinje.
19 Akore ty harà’ elahin-kasoa’o
nahaja’o ho amo mañeveñ’ama’oo,
ie nitsene’o ho amo mpitsolok’ ama’o
añatrefam-pihaino’ o ana’ondatio!
20 Akafi’o am-pipalirañe añatrefa’o iereo, ami’ty fikililia’ ondatio; ampitsolohe’o an-kivoho ao tsy ho vorehe’ o famelekeo.
21 Andriañeñe t’Iehovà,
fa nilosore’e amako ty fiferenaiña’e,
an-drova niarikatoheñe.
22 Aa naho zaho, hoe raho te niendrake: ho naitoañe aolom-pihaino’o eo.
fe jinanji’o ty fivolan-kalaliko,
te nikaiheko.
23 Kokò t’Iehovà ry noro’e iabio,
arova’ Iehovà o migahiñeo,
vaho avarigidi’e amo mpievoñevoñeo ty avake.
24 Mihaozara naho mihafatrara arofo
ry hene mpitamà Iehovà.