36
Ho a i Talè, Sabo’ i Davide, mpitoro’ Iehovà
1 Mivolañe an-karatiañe an-tro’e ao ty Tsivokatse. Toe tsy aolo’ o maso’eo ty fañeveñañe aman’ Añahare.
2 Mitsiriry ty vata’e o maso’eo,
ie maharendreke te mavoeñe o sata’eo.
3 Tahiñe naho hakalitahañe
o fivolam-bava’eo;
nado’e ty hihitse tsy anoe’e ty hasoa.
4 Mikitro-karatiañe an-tihi’e eo,
mijohañ’ ami’ty lalañe tsy mahasoa;
tsy rihie’e ty haloloañe.
5 Ry Iehovà, mahatakatse an-dikerañe ao ty fiferenaiña’o,
an-drahoñe eñe ty figahiña’o.
6 Manahake o vohitse ra’elahio
ty havantaña’o, miheotse o fizaka’oo,
ry Iehovà, Hene ambena’o
ndra ondaty ndra biby.
7 Fanjaka ty fiferenaiña’o, ry Andrianañahare !
vaho mipalitse an-talinjon’ela’o ao
o ana’ ondatio;
8 Ie anjañe ami’ty havokara’ o anjomba’oo,
vaho ampikamae’o añ’oñen-karavoravoa’o.
9 Fa ama’o ty rano itsititiahan-kaveloñe;
an-kazavà’o ao ro ahaoniña’ay hazavàñe.
10 Toloño amo mahafohiñ’Azoo
ty fiferenaiña’o;
naho amo vañon-trokeo ty havantaña’o.
11 Ee te tsy homb’amako
ty tombom-pinevonevoke, vaho tsy hanao soik’ ahy ty tañan-do-tsereke.
12 Mifitake ey o mpanao ratio,
naronje ambane, tsy hitroatse ka.