48
Takasy; Sabo’ o ana’ i Korao
1 Jabahinake t’Iehovà,
vaho rengeñe mb’añ’abo;
an-drovan’ Añaharen-tikañe,
i vohi’e miavakey.
2 Fanjàka an-toe’e eo,
ty hafalea’ ty tane toy,
ty vohi’ i Tsiône añ’ila’e avaratse ey,
ty rova’ i Mpanjaka hinakinakey.
3 I Andrianañahare an-kijoli’ey,
ty nampandrèndreke t’ie ro fipalirañe.
4 Hehe, nifanontoñe o mpanjakao,
nitrao-pionjoñe mb’etoañe,
5 Nioni’ iereo; le nilatsa; nangetraketrake, vaho nitriban-day.
6 Namihiñe iareo ty fihondrahondra,
ninivonivotse hoe ampela mitsongo.
7 I tiok’ atiñanañey ty ampivaletrahe’o
o lakam-bein-Tarsiseo.
8 Hambañe amy jinanjin-tikañey
ty nionin-tika
an-drova’ Iehovà’ i Màroy,
an-drovan’ Añaharentikañe ao;
ee t’ie hajadon’ Añahare tsy ho modo
nainai’ey. Selà
9 Nitsakorea’ay ty fiferenaiña’o
ry Andrianañahare
añivo’ i anjomba’o miavakey.
10 Manahake i tahina’oy
ry Andrianañahare,
ty fandrengeañe Azo,
pak’ añ’olo’ ty tane toy;
lifo-kavantañañe ty fità’o havana.
11 Ampifaleo i vohitse Tsiôney,
ampirebeho o anak’ ampela’ Iehodào
ty amo fizakà’oo.
12 Mañariaria amy Tsiône,
ikariokarioho, volilio o fitilik-abo’eo,
13 Hehe o kijoli’eo,
rangao o fitalakesañ’abo’eo;
hahatalilia’o i tariratse mandimbey.
14 Zay t’i Andrianañahare,
Andrianañaharen-tikañey, nainai’e donia.
Ie ty hiaolo antikañe pak’an-kavilasy.