52
Ho a i Talè, Sabo’ i Davide, naho niheo mb’amy Saole t’i Doege nte Edome, nitalily te noly añ’anjomba’ i Ahimeleke t’i Davide.
1 O Fanalolahio, ino ty firoharohà’o
hatsivokarañe?
Lomoñandro ty fiferenaiñan’ Añahare.
2 Mikilily fandrotsahañe ty famele’o,
manahake ty fiharatse masioñe;
ty mpamañahy tia.
3 Tea’o ty raty te ami’ty soa;
i lañitsey ta te hivolan-to. Selà
4 No’o ze atao fivolan-katramoañe, ty fameleke mamañahy tia.
5 Aa le harotsan’Añahare kitro-katroke, ho sintone’e, le hapitso’e amy kiboho’oy, vaho hombota’e an-tanen-kaveloñe. Selà
6 Ho isa’ o vantañeo, naho hañeveñe
vaho hiankahake ty hoe :
7 Hehe t’indaty tsy nanao
an’Andrianañahare ho fipalira’e;
fe ty habei’ o vara’eo ty niatoa’e,
vaho o fikinia’eo ty nihaozara’e.
8 Aa naho zaho, le hoe sakoa mandrevake
añ’anjomban’Añahare ao;
iatoako nainai’e donia
ty fiferenaiñan’ Añahare,
9 Andriañeko nainai’e rehe,
amy te Ihe ty nanao zay,
vaho ho tamaeko i tahina’oy
ie ty soa añatrefa’ o noro’oo.