77
Ho a i Talè, ami’ty Iedotone, Sabo’ i Asafe
Ty feoko mb’aman’ Añahare
naho itoreovako;
ty feoko mb’aman’ Añahare,
vaho nanokilaña’e ravembia!
2 Amy andro nahampohek’ ahiy
t’ie nipay i Talè;
an-taña nahity, tsy nigebañe te haleñe;
nifoneñe tsy hohòeñe ty foko.
3 Ie mahatiahy raho, ry Andrianañahare
le mitretretretre, ie tsakorèko,
le mitoirañe ty troko. Selà
4 Tana’o tsy hikòpoke o holi-masokoo;
embetse raho tsy mahafivolañe.
5 Nereñereko o andro taoloo,
o taoñe haehaeo,
6 Tiahiko o nititihako an-kaleñeo;
mifañaoñe ami’ty troko raho,
le hoe ty fitsakorean-troko:
7 Haitoa’ i Talè zafe-anake hao?
le lia’e tsy hisohe’e hao?
8 Fa modo kitro añ’afe’e hao
ty fiferenaiña’e?
Fa nilesa kitro-katroke hao
i nampitamae’ey?
9 Nihaliñon’Añahare hao ty fatariha’e?
nagabe’e an-kaviñerañe ao hao
i fitretreza’ey? Selà
10 Le hoe raho : Zao ty halemeako:
Ie ataoko ho mete miova
ty fitàn-kavana’ i Andindimoneñey.
11 Ho tiahiko ty fitoloña’ Ià,
hahatsikaitse o raha tsitantane
nanoe’o haehaeo.
12 Ho hene tsakorèko o fitoloña’oo,
hereñerèko o tolon-draha’oo.
13 Ry Andrianañahare, masiñe ty lala’o;
ia ty ndrahare ra’elahy
hañirinkiriñe aman’ Añahare?
14 Ihe ro Andrianañahare
mitolon-kalatsàñe!
fa naboa’o am’ ondatio ty haozara’o.
15 Nijebañem-pità’o ondati’oo,
o tarira’ Iakobe naho Iosefeo. Selà
16 Nahatrea Azo o ranoo,
ry Andrianañahare,
ie nahatrea azo i ranoy
le nivalitaboake !
nitabohazake i lalekey.
17 Nampikojojoake orañe o rahoñeo;
nigorogodoiñe i likerañey,
nimb’etia mb’atia ka o ana-pale’oo.
18 Tam-po’ i tangololahiy
ty fivola’ i ampi’oy;
nampireandreañe’ i helatsey
ty voatse toy!
nihondrahondra naho niozoñozoñe
ty tane toy.
19 Nitoañe’ i lala’oy i riakey,
i rano jabajabay ty nilalan-tsile’o;
vaho tsy nioniñe o liam-pandia’oo.
20 Narahe’o hoe lia-raike ondati’oo, am-pità’ i Mosè naho i Aharone.