94
1 O ry Iehovà,
Andrianañahare mpamale-fate,
ry Andrianañahare, mpañome-to:
mireandreaña.
2 Miongaha, ry Mpizaka’ ty tane toio;
lilovo ami’ty fañeva’e o mpirengevokeo.
3 Sikal’ ombia o lo-tserekeo, ry Iehovà :
pak’ombia ty mbe hitreña’ o tsivokatseo?
4 Mifatatiake, manotratsotrake;
mijiajia iaby o mpanao ratio.
5 Demohe’ iereo ondati’oo ry Iehovà,
volevole’ iereo ty lova’o.
6 Vonoe’ iereo ty vantotse
naho ty renetane,
naho mañoho-doza amo bode-raeo;
7 vaho manao ti-hoe: Tsy vazoho’ Ià;
tsy mañaoñe t’i Andrianañahare’ Iakobe.
8 Mañaraharà ry borololo am’ ondatio;
naho o dagolao, ombia t’ie hahafohiñe?
9 Tsy mahajanjiñe hao i nambole o ravembiaoy?
Tsy mahavazoho hao i Mpitsene fihainoy?
10 Tsy hanoro hao i Mpandilo o fifeheañeo?
ie mañòke hilala am’ondatio.
11 Arofoana’ Iehovà
ty fitsakorea’ ondaty;
t’ie kofòke avao.
12 Haha t’indaty lilove’o ry Ià,
naho i anara’o amy Tsara’oy;
13 homea’o fitofàñe an-tsan-kasotriañe,
ampara’ te nihaliañe koboñe
o lo-tserekeo.
14 Tsy ho farie’ Iehovà ondati’eo;
tsy haforintse’e i lova’ey.
15 Mbe himpoly ami’ty hahiti’e o zakao,
le hene hañorik’ aze o vañoñ’ añ’arofoo.
16 Ia ty hitroatse amo tsereheñeo ho ahy? Ia ty hijohañe amo mpanao ratio
ho amakoo?
17 Naho tsy Iehovà ty nañimb’ ahy
le ho nitobe am-pitsiñañe ty fiaiko.
18 Ie anoeko ty hoe :
Midorasitse ty tomboko;
le manozañ’ ahy ty fiferenaiña’o
ry Iehovà.
19 Ie mañotrotro ty hamahimahin-troke, le mampanintsiñe ty fiaiko
o fañohòa’oo.
20 Mete hiharo-rehak’ ama’o hao
ty fitobohan-katsivokarañe—
ie mikitro-draha hatao’e fañè,
21 naho mirañadrañake hañè-doza
ami’ty fiai’ o vañoñeo,
vaho mañozoñe ty lio tsy aman-kila.
22 Fe haboam-pitsolohako t’Iehovà,
vaho lamilamy fipalirako
t’i Andrianañahareko.
23 Nampolia’e ty hatsivokara’ iareo, vaho ho mongora’e ty amo fikotriha’iareoo; toe ihañitoa’ Iehovà Andrianañaharentika.