96
1 Misaboa sabo vao am’ Iehovà !
mitakasia am’ Iehovà, ty tane toy iaby.
2 Misaboa am’ Iehovà, bangò i tahina’ey;
taroño boak’andro i fandrombaha’ey.
3 Atalilio aivo’ o fifeheañeo ty enge’e,
o sata’e mahalatsao añivo’ ondaty iabio.
4 Amy te ra’elahy t’Iehovà
vaho ho rengeñe añ’abo;
revendreveñen-dre
te amy ze ndrahare iaby.
5 Fahasive o ndrahare’ ondatio,
fa Iehovà ro namboatse o likerañeo.
6 Hasiñe naho volonahetse ro aolo’e,
haozarañe naho hatsaratseake
ro añ’anjomba’e miavake ao.
7 Manolora am’ Iehovà, ry foko’ ondatio,
toloro engeñe naho haozarañe t’Iehovà.
8 Atoloro am’ Iehovà
ty enge mañeva i tahina’ey;
mibanabanà, le miziliha an-kiririsa’e ao.
9 Mitalahoa am’ Iehovà
an-tsiki-miambake!
mititititìha añatrefa’e eo, ty tane toy.
10 Talilio amo fifeheañeo ty hoe:
Mifehe t’Iehovà;
toe mioreñe ty voatse toy, tsy hasiotse,
ho zakae’e mira ondatio.
11 Le hifale o likerañeo,
hirebeke ty tane toy;
hitroñe ami’ty halifora’e i riakey;
12 Hitreñe i hivokey,
naho ze he’e ama’e ao;
fonga hisabo an-kaehake
o hatae añ’alao,
13 añatrefa’ Iehovà eo, fa ho totsake re,
ho avy hizaka ty tane toy;
ho zakae’e an-kahiti’e ty voatse toy
vaho ondatio ami’ty figahiña’e