11
Maknicalh ixt'iyun'an lapanacni
Pus acsnich icxtaknicalh k'antam actiyac ju pulhcacan tu'u'. Chai icjunicalh:
―Ak'ost'a'ulh chai alhc'at'ich ju ixpujitat Dios chai junta xavanican ju pum ju Dios. Vachu' ap'ut'ek'e ju anch ta'an lak'ayanin ju Dios. Para jantu alhc'ayap'i ju la'ismakspa' ju pujitat. Ju anch axtaknican ju yu'unch ju jantu talak'ayai ju Dios. Chai lakat'utu c'ata a paitat catalhinona' ju yu'unch ju lak'achak'an junta lak'ayacan ju Dios. Chai ac'axtakniya' ixtachaput'an ixt'iyun'an quilapanacni. Ju chunch laich catanona' ju quinchivinti tam milh a lakat'ui cientos a sesenta avilhchan. Chai catalakch'iya' ju pumpu' tachi ju talakch'i ju na ta'amak'aninin.
Yu'unch ju tachi ak'at'ui xaq'uiu olivo tajunita. Chai tachi ju lakat'ui ixputayan cantila ju ya la'ix'ucxlacapu' ju Dios ju amanavin ju lacamunutpa' junita. Chai ni xamati' calactu'uputuna' pus lana taxtui ju alapna' la'ixquilhni'an ju ixt'iyun'an lapanacni. Chai lana amakni ju ixt'alaxcai'an. Pus ni xamati' calactu'uputuna' chunchach ju capuniya'. Chai ju yu'unch ixt'iyun'an lapanacni axtaknicanta ju ixtachaput'an ni laich catanona' ni jantu camina' ju xcan tachi chun ju avilhchan ju catatsucuya' nonin ixchivinti Dios. Chai vachu' alin ixtachaput'an ni lai catalapalak'o ac'alhni ju xcan. Chai lai ca'amamak'alhk'ajni ju lapanacni tijpachux ju mak'alhk'ajnat va tapakchux ju catanaviputuna'. Chai acsni catanavik'oya' ixlhich'alhcat'an ixnajunca ixchivinti Dios pus ju maktili' ju cataxtuya' junta na makat lhok'onk'o'anta ca'alact'alasaya' ju yu'unch. Chai calhajanana' ju yuchi. Chai ca'amakniyach ju ixt'iyun'an lapanacni. Chai ixlacatuna'an catamaya' lacati ju lak'achak'an junta maknicalh lacacurus ju Jesús. Pus ju Dios najun ni chunch junita ju anu' lak'achak'an tachi ju lak'achak'an Sodoma chai tachi ju lacat'un Egipto. Pus ju lapanacni ju tat'ajun ixlhilacaputs'un ju lacamunutpa' chai ju tachivinin tijpachux chivinti catalakts'iniyach ju ixlacatuna'an lakat'utu avilhchan a paitat. Ju anu' ixt'iyun'an ju xa'amaknican. Chai jantu calacasq'uincana' ni lai ca'ancalh amacnuca. 10 Chai ju lapanacni ju tat'ajun ju ani lacat'un catalhik'achanach ixlacata'an ju yu'unch. Chai catalhic'ataniya' chai catalapuxtakniya' lhak'ailakts'in. Chunch ju catanaviya' ni na ixta'amamak'alhk'ajni ju lapanacni ju ixtat'ajun ju ani lacamunutpa' ju anu' ixt'iyun'an ixlapanacni Dios. 11 Para acsni tapasalh ju anu' lakat'utu avilhchan a paitat pus ju Dios axtaknichokolh is'atsucunti'an chai lana tak'ostavi junta ixtamanalh. Chai na k'ox tatalhanalh ju talakts'ilh. 12 Pus ju acsnich ixt'iyun'an tak'asmatlh lakatam chivinti ju minchalh lact'iyan. Na p'as ju chivinilh ni laich catak'asmat'a'. Chanich ju ajuni:
―At'at'itch ju ani.
Chai lana tapu'alh ju ataputs'i ju lact'iyan. Chai na k'oxich talakts'ilh ju ixt'alaxcai'an. 13 Chai ju anu' pants'iquis lana na p'as tataclh ju lacat'un. Chai ju tamin cientos chaka' ju ixyanalh ju anu' lak'achak'an lakacavin chaka' tak'alhik'o junta lai. Chai acsni tataclh ju lacat'un pus tani lakatujun milh lapanacni. Chai ju ali'in na tatalhanalh chai talak'aya ju Dios ju vilhcha lact'iyan.
14 Pus chunch ju tapasalh ju ixlhilakat'ui mak'alhk'ajnat chai vats'alhti ca'alina' ju ixlhilakat'utu.
Ju ixlhipumatujun anquilh sunulh ju isk'olh
15 Pus ju acsnich sunulh ju isk'olh ju ixlhipumatujun anquilh. Chai lana na pumalhu ju na p'as ixtachivinacha ju lact'iyan ni laich cak'asmatk'ocalh. Ixtanajun:
Ju chavai quiDios'an chai ju Cristo catamalacasuya' ixtachaput'an.
Chai catalhinonk'alhiya' ixlhilacaputs'un ju lacamunutpa'.
16 Pus ju ixpumap'uxamt'at'i papanin ixtavilanalh lacak'ai ixputolan'an la'ix'ucxlacapu' Dios. Pus ju yu'unch lana tataquilhputanilh ju Dios chai talak'ayalh. 17 Ixtajuni:
Ji qui'ucxtin Dios ju lai navik'o'ui tachi chun ju taxtokni uxint'i ju ixt'a'un tus acsni matica' tu'u' ixjunita chai ats'uc'uk'alhiya' tus mas va tavananch.
Pus iclaxtakniyau lak'ailakts'iuch ni ch'ap'at'a ju mimpok'ai chai lhina'unch ju chavai.
18 Pus ju lapanacni ju tat'ajun ixlhilacaputs'un ju lacamunutpa' tatalhk'amalh.
Para vachu' t'alhk'amch ju uxint'i.
Chai chilh ju chavai ju avilhchan acsni calakts'intanucanach ju tanitach.
Vachu' chilh ju avilhchan acsni axt'akniya' ixtalhaja'an ju milapanacni chai ju ixtanajun ju minchivinti chai ju salaka alakts'in chai ju na tatalhoniyan.
Axt'aknik'oya' chux. Mas yu'unch ju jantu tu'u' ixtapalhni'an chai vachu' yu'unch ju xalack'ajin tajunita.
Chai chilh ju chavai ju avilhchan acsni amamak'alhk'ajniya' ju na ixta'amamak'alhk'ajninin ju lacamunutpa'.
19 Pus ju acsnich ju lact'iyan lana malhtek'acalh ju la'ixpujitat Dios chai istasui la'ixpulacni ju k'ai p'aklat junta ixmak'acanta ju chivinti ju ix'alaclhit'atak'oxita ju Dios ju israelitanin. Chai lana mak'alipnilh. Chai na p'as lacchivinincalh. Chai t'asalh ju t'ajin. Chai tataclh ju lacat'un. Chai tamachilh ju chaj'it.