3
Inâ turixôa Xuaum Mbátita ne ítuke
Mt 3.1-12; Mk 1.1-8; Xu 1.19-28
1 Yanekôyoke, itóponone kinze koeti xoénae natíxea ne Tiberiu Sêza, enepone koati payásoti nâti ya Róma. Kene Ponsiu Pilátu itukóvo ngovenâdo ya Njúdeya. Kene ya Ngalíleya, Êrodi pahukóya. Kene ya Itûreya yoko Tarakoníti, Filípi, po'inu Êrodi pahukô. Kene ya Ambíleni, Lîsanea itukóvo pahúkotiya.
2 Kene Ána yoko Kaífa itukóvo koati payásoti sasedóti inuxínoti jûdeu hó'eke yanekôyoke. Koati énomone yaneko káxehiko, ápe yuhó'inoa Itukó'oviti ne Xuaum Mbátita, xé'a Nzakâriya, koeku óvoheixea ya mêum ákoti apêti.
3 Yane heú kíxoa Xuâum yónea ne poké'e xe'ókuke ne huvêo, enepone Njôrdaum, koyuhó'inoati ne xanéhiko kónokea ikótivexea isóneuke ne pahúnevo koánemaka kuríkopea, motovâti kotúyopea Itukó'oviti ne pahúnevo, ina yusîka áhikeovo xokóyoke.
4 Énomone kuteâtimaka koeku yutóxeovo emó'uke Itukó'oviti yútoeke porofeta Izâiya mekúke, xoko kó'iyeaku:
“Énomonemo ne kohonókoti emó'u ya mêum ákoti apêti xapa xâne kamokénoponoati. Haramo koe yûho: ‘Míhi'akinanoe oxéne ne Vúnae itúkea ítuke xepákukenoe. Kéyuseapa ne kixeku itíkivo nonékuke’ koêti.
5 Hanemo koéneye kuteâti koeku xêne kounákopokono enepo pura'úxopokono ne uhoróxotiya. Koati kuteâtimaka koêku ikútipu'ikopokono ne vanuké'exoti koane ponopókono ne xêne ínati ikáyukexo, enepo pura'úxokono koane ikútipu'ikopokonomaka ne uhoróxotiya.
6 Yoko noixoâtimo uhá koeti xâne kíxoaku Itukó'oviti koíteovo xâne” kôe yútoe Izâiya. Izâiya 40.3-5
Koeku yuho Xuaum Mbátita
7 Hara kíxovokoxoa Xuâum neko êno xâne pihinoâtihiko, enepohikone epemóponoati áhikea:
—Itínoe ámoripono xâne kutí koeti koâti ipúhokovoti koéxoe, ikítixati itívoatimo ne ipíhoponopemo Itukó'oviti pohúneti vo'oku yáhikivo njokóyoke? Ako kalíhuina.
8 Konókoti itíkinoe únati motovâti iyúseyea itíkivonoe ikotívexoati isóneuke ne pahúnevo koane kurikópatimaka. “Uti ámoripono Âbraum,” hákonoe koe iséneupinovo, pe'okoâti itíkivo aha Itukó'oviti vo'ókuke. Vo'oku eneponi itukápu énomone kahá'a ne Itukó'oviti, mani pahukoâti itúkopeovo ámoripono Âbraum ra itátanehiko mopôi.
9 Kuteâti koêku ne povôti usó koyêtine tetúkea tikótihiko ukeâti poéheveke, enepohikone uhá koeti ákoti parêxa únati há'i, ina kurikókono yúkuke, énomonemakamo kíxoaneye Itukó'oviti ne uhá koeti xâne váhere kixoku itúkeovo —kíxovokoxoane.
10 Ina kixôa xanéhiko ne Xuâum:
—Kutí'ikopo kónoko vitúkea?
11 Ina yumopâ Xuâum:
—Koêkuti apêti pi'âti kápana, paréxa póhuti ne xâne ákoti ítuke. Kúteanemaka koêku ne apêti nîka, paréxamaka xâne épeu hímakati —koéne.
12 Ápemaka koperáxinotihiko nâti simôti xoko Xuâum, enepohikone yómoti ánu'ukea kóperau. Hara kixóponoamaka:
—Ihikaxotí, kuti kónoko vitúkea?
13 Ina kixoáhiko Xuâum:
—Ópoehane yé'akeye péhoenokono képeraxi, ene képeraxa. Hákone yanú'ukoa —kíxoanehiko.
14 Ápemaka húndaruhiko kixoâti:
—Kene ûti, kuti kónoko vitúkea?
Ina yumopâmaka Xuâum:
—Hako vaheréxo ítikeinoa ne xanéhiko. Hákomaka itikóheyi koêku ne koêkuti xâne. Aúhepeinoamaka iséneu ne yé'akeye tiûketi némoenoe —kíxoanehiko.
Koyuhôa Xuaum Mbátita itúkeovo koitóvoviti ne Jesus
Mt 3.11-12; Mk 1.7-8; Xu 1.19-28
15 Yoko enepohikoneko xâne, koati ainóvoti kuxoíxoatine símea ne páhoe Itukó'oviti koíteovo xâne. Ká'aye koéhiko isóneuno Xuâum: “Énomonemea ne Mésiya, páhoe Itukó'oviti koíteovovi? áko'o pó'itimea” koe isóneunoahiko.
16 Ina kixoáhiko Xuâum:
—Kaná'uti ánjikeopinoe ya úne iháke Itukó'oviti, itea keno'ókotinemo koati hána'iti teyonéti ya undíke. Muhíkova anjí'okeova ngúxeinoa imo perékatana, ako omóndokea. Énomonemo ahíko xanéhiko haînati ya úne itea ya xunákoke Sasá'iti Omíxone Itukó'oviti. Yoko kutí koetimo otuko yúku ne xunáko kasása'ikea.
17 Hanemo koéneye, xâne omó'ixoti kasasá'ikopeti kuteâti ápa vo'ókuke. Kuteâti kixókonoku nonéti, enepone tirîku kasasá'ikovo, énomonemakamo kixóneye xanéhiko nê'e. Kuteâtimaka koeku ípihopeokono há'i íhakuke, énomonemakamo kixóneye xâne únati kixoku itúkeovo nê'e. Kene ne xâne ákoti aunáti, enepohikone kutí koeti ike kasása'ikine tirîku, kurikoâtimo yúkuke ákotinemo ípukeovoku —kíxovokoxoane Xuâum.
18 Énomone koéneye yuho Xuaum Mbátita. Koane ákomaka tôpi po'ínuhiko enékope xanéhiko koêku koyúhoinoa ne inámati ihíkauvoti íhae xoko Itukó'oviti.
19 Ina saya'íkoamaka Xuâum ne Êrodi, enepone hána'iti pahúkoti ya Ngalíleya, vo'oku kóyenopea yeno koati po'ínu, sêno koéhati Erôdiya. Haina póhutine, itea vo'ókumaka po'ínuhiko váhere ítuke.
20 Yane inamá'axo kuri'úxovo váhere ítuke ne Êrodi vo'oku kuríkeane Xuâum ika'ákovokutike.
Koeku ahíko Jesus ne Xuaum Mbátita
Mt 3.13-17; Mk 1.9-11
21 Uke'éxoane Xuâum áhikea uhá koêti neko xâne, ina ahíkomaka Jesus. Koeku itúkea orásaum ne Jesus, mihe'ó koéne ne vanúke
22 koane evésekea ne Sasá'iti Omíxone Itukó'oviti xokóyoke kutí koeti kurûte. Yane apé koéne emo'úti inu'íxoti vanúkeke koêti:
—Iti Nje'éxa koati ákoti omotóva ongóvo, porexónuti hána'iti elókeko ongóvo —koéne.
Oxúnoekenehiko Jesus
Mt 1.1-17
23 Enepone Jesus, itopónone kuteâti tirinta koetine xoénaena, ina turixôa itúkea ne ítukexeake Itukó'oviti. Yoko ya isóneunoake xanéhiko, koati xé'a Yûse nê'e. Harâ'ahiko iha oxúnoekene.
Enepone ôxu, Éli koéha.
24 Kene Éli, xé'a Matâti.
Enepone Matâti, xé'a Lévi.
Kene Lévi, xé'a Meúki.
Kene Meúki, xé'a Njanâi.
Kene Njanâi, xé'a Yûse.
25 Enepone Yûse, xé'a Matátiya.
Kene Matátiya, Ámu itukôa xé'a.
Kene Ámu, Nâum itukôa xé'a.
Kene Nâum, Ézli itukôa xé'a.
Kene Ézli, Nâgai itukôa xé'a.
26 Kene Nâgai, Mâte itukôa xé'a.
Kene Mâte, Matátiya itukôa xé'a.
Kene Matátiya, Semêi itukôa xé'a.
Enepone Semêi, Yûse itukôa xé'a.
Kene ne Yûse, Njôda itukôa xé'a.
27 Kene Njôda, Njoánam itukôa xé'a.
Kene Njoánam, Rêza itukôa xé'a.
Kene Rêza, Nzorobâbe itukôa xé'a.
Kene Nzorobâbe, Salatíye itukôa xé'a.
Kene Salatíye, Nêri itukôa xé'a.
28 Kene Nêri, Meúki itukôa xé'a.
Kene Meúki, Âdi itukôa xé'a.
Kene Âdi, Kôzam itukôa xé'a.
Kene Kôzam, Eumâdam itukôa xé'a.
Kene Eumâdam, Ér itukôa xé'a.
29 Kene Ér, Njozûe itukôa xé'a.
Kene Njozûe, Eliêze itukôa xé'a.
Kene Eliêze, Njôrim itukôa xé'a.
Kene Njôrim, Matâti itukôa xé'a.
Kene Matâti, Lévi itukôa xé'a.
30 Kene Lévi, Simêum, xé'a Njúda, itukôa xé'a.
Kene Njúda, Yûse, xé'a Njónam itukôa xé'a.
Kene Njónam, Eliyáki itukôa xé'a.
31 Kene Eliyáki, Melêa itukôa xé'a.
Kene Melêa, Mêna itukôa xé'a.
Kene Mêna, Matâta, xé'a Nátam, itukôa xé'a.
Kene Nátam, Ndávi, xé'a Njése itukôa xé'a.
32 Kene Njése, Ôbedi, xé'a Mbôa, itukôa xé'a.
Kene Mbôa, Sála itukôa xé'a.
Kene Sála, Nâsom itukôa xé'a.
33 Enepone Nâsom, Aminâdabi itukôa xé'a.
Kene Aminâdabi, Ândimi, xé'a Ârni, itukôa xé'a.
Enepone Ârni, Êzorom, xé'a Pêre, itukôa xé'a.
Kene Pêre, Njúda itukôa xé'a.
34 Kene Njúda, Njáko, xé'a Izáki, itukôa xé'a.
Kene Izáki, Âbraum, xé'a Têra, itukôa xé'a.
Kene Têra, Náko itukôa xé'a.
35 Kene Náko, Serûki, xé'a Rágau, itukôa xé'a.
Kene Rágau, Faléki, xé'a Êbe, itukôa xé'a.
Kene Êbe, Sála itukôa xé'a.
36 Kene Sála, Káinam, xé'a Arafáxadi itukôa xé'a.
Kene Arafáxadi, Sem, xé'a Nôe, itukôa xé'a.
Kene Nôe, Laméki itukôa xé'a.
37 Kene Laméki, Metuzálem, xé'a Enóki, itukôa xé'a.
Kene Enóki, Njaréti, xé'a Maléleu, itukôa xé'a.
Kene Maléleu, Káinam itukôa xé'a.
38 Enepone Káinam, Ênu itukôa xé'a.
Kene Ênu, Séti itukôa xé'a.
Kene Séti, Âdaum itukôa xé'a.
Kene Âdaum, Itukó'oviti itukôa xé'a.