Hakerek bodik ema
Ibrani
mak foin laꞌo nela siakaan bei uluk hanorin nodi fiar naꞌak, Yesus mak Kristus
1
Naꞌi Maromak Niakaan Oan makaꞌas liu Naꞌi Maromak makoꞌan uluk sia
Uluk, Naꞌi Maromak nodi Niakaan makoꞌan sia atu dale no itakaan bei uluk ema Ibrani sia.* Nia dale no sia dala waꞌin, nodi dalan oi-oik. Mais oras neꞌe, Naꞌi Maromak solok Niakaan Oan tiꞌan, atu dale duꞌuk no ita.
Hori uluk, Naꞌi Maromak boi nola Niakaan Oan neꞌe,
atu kaer ukun namutuk no Nia.
Baa oras Naꞌi Maromak naseꞌi laleꞌan no raiklaran no sasoin hotu-hotu,
Niakaan Oan neꞌe namutuk no Nia naseꞌi hotu-hotu.
Niakaan Oan neꞌe natudu Maromak Niakaan kabaas,
hanesan loro matan sinak mak tubu nosi lalenok.
Niakaan ilas, oin ida no Maromak.
Hodi Niakaan Manfatin makaꞌas,
Nia nalaꞌo hotu-hotu iha laleꞌan no raiklaran.
Nia moos loke dalan
atu kasu mohu ema raiklaran salan,
nebee sia dadi moos.
Hotu Nia namaan aan saꞌe baa laleꞌan,
tuur nabesi aan iha Maromak sorin kwana
iha fatik mak kneter kaliuk.
Naꞌi Maromak Niakaan Oan makaꞌas liu Maromak Niakaan makbukar laleꞌan sia
Naꞌi Maromak Niakaan makbukar laleꞌan sia makaꞌas tebes, mais Niakaan Oan mak makaꞌas kaliuk, tan Nia liu sia hotu-hotu. Naꞌi Maromak Niakaan kneter-taek, aas kaliuk. Nia latan kneter-taek nia baa Oan. Etuk Niakaan Oan makaꞌas liu nosi Niakaan makbukar laleꞌan sia.
Dala ida Naꞌi Maromak dale baa Oan naꞌak,
“Ohin loron neꞌe, Haꞌu kfoti O dadi makaer ukun.”
Naꞌi Maromak moos dale naꞌak,
“Haꞌu neꞌe, Niakaan Ama.
Nia moos, Haꞌukaan Oan.”
Naꞌi Maromak dale kedan nunia nosi lia Niakaan Oan, mais Nia la dala ida dale nunia nosi lia Niakaan makbukar laleꞌan sia.
Baa oras Naꞌi Maromak solok Niakaan Oan makaꞌas kaliuk nia mai raiklaran neꞌe, Nia naruka Niakaan makbukar laleꞌan sia naꞌak,
“Hei! Makbukar sia!
Emi musti foo kneter,
hodi loꞌu-sudur baa Haꞌukaan Oan!”
Naꞌi Maromak moos dale lia nosi Niakaan makbukar laleꞌan sia naꞌak,
“Haꞌu kaseꞌi Haꞌukaan makbukar laleꞌan sia,
dadi lais hanesan anin.
Haꞌu kaseꞌi Haꞌukaan ata laleꞌan sia,
dadi hanesan haꞌi.”
Naꞌi Maromak dale nunia, tan Niakaan makbukar laleꞌan sia, Niakaan ain-liman dei.
Mais Nia dale seluk tenik, nosi lia Niakaan Oan duꞌuk naꞌak,
“O neꞌe, Maromak.
O atu tuur baa kadera ukun toꞌo nima-nimak.
O atu kaer beran nebee ukun modi neon loos.
O neon diꞌak, kalo O maree ema moris loos.
Mais O neon susar, kalo O maree ema moris kaleꞌuk.
Tan lia nia, Haꞌu neon diꞌak,
toꞌo Haꞌu kfui mina baa Okaan ulun,
kodi foti O dadi baa Naꞌi, liu ema seluk sia.”
10 Naꞌi Maromak moos dale baa Niakaan Oan naꞌak,
“Oa!
O neꞌe, Naꞌi mak ukun kedan hori uluk.
O neꞌe, mak maruka toꞌo laleꞌan noo kedan.
O neꞌe, mak maruka toꞌo raiklaran dadi kedan.
11 Nosi ikus, laleꞌan no raiklaran dodok mohu.
Nosi ikus, laleꞌan no raiklaran lakon mohu.
Mais O duꞌuk moris nohuun.
12 Nosi ikus, O atu foti soe laleꞌan no raiklaran,
hanesan ema foti soe tais aat.
Nosi ikus, O atu taruka laleꞌan no raiklaran,
hanesan ema taruka tais foun.
Mais O duꞌuk la nunia.
Tan O moris nima-nimak.”
13 Naꞌi Maromak moos dale baa Niakaan Oan naꞌak,
“Oa!
Mai tuur iha fatik kneter kaliuk
iha Haꞌukaan sorin kwana neꞌe.
Haꞌu atu kalo Okaan funu sia
toꞌo loꞌu baa O.”
Naꞌi Maromak dale kedan nunia nosi lia Niakaan Oan, mais Nia la dala ida dale nunia nosi lia Niakaan makbukar laleꞌan sia. 14 Niakaan makbukar sia nanis noo folin. Tan Nia solok sia atu baa naliku Niakaan ema hotu-hotu, nebee natudu dalan moris baa sia. Masik makbukar laleꞌan sia makaꞌas nunia moos, Naꞌi Maromak Niakaan Oan liu sia hotu-hotu.
* 1:1 a: Lia fuan Ibrani nia, naran seluk bodik ema klubun Yahudi. Ema Yahudi mak fiar baa Yesus Kristus, ema temi sia naꞌak “ema sarani Ibrani”. Sia seluk nosi siakaan mamaluk Yahudi sia mak sei kaer ukun-badu Yahudi tuan. 1:1 b: Naꞌi Maromak katak Niakaan lia menon sia, nodi dalan oi-oik. Nia katak baa Abraham nodi mamenon, baa Musa nodi ukun-badu, baa Daud nodi kananuk tonu-haboot, baa Yeremia nodi lia hatetek. 1:5 Kananuk Sia 2:7 1:5 2 Samuel 7:14; 1 Lia Rai Israꞌel no Rai Yahuda 17:13 1:6 Hanoin Hikar Dalan Moris 32:43; Lukas 2:13-14 1:7 Kananuk Sia 104:4 1:9 Kananuk Sia 45:7-8 1:12 Kananuk Sia 102:26-28 1:13 Kananuk Sia 110:1