11
Naꞌi Maromak dodan ema Israꞌel sia
Arumak emi haneo haꞌak, “Tan ema Israꞌel sia la nanono baa Naꞌi Maromak, etuk Nia dudu sai sia tiꞌan.” Nunia ka? Lale! Tan haꞌu duꞌuk, ema Israꞌel. Haꞌu neꞌe, kosi uma huun Benyamin. Benyamin aman, naran Isak. Isak aman, naran Abraham. Abraham nia, mak ema Israꞌel hotu-hotu siakaan bei uluk fohon. Naꞌi Maromak la dala ida dudu sai ema Israꞌel mak Nia boi kedan hori uluk aan. Emi sei hanoin lia nosi Maromak makoꞌan Elia ka? Nia naksuhuk baa Naꞌi Maromak, nodi nakroꞌan nebee Naꞌi Maromak kastikar ema Israꞌel sia naꞌak,
“Ama Maromak! Ema neꞌe sia noꞌo mohu Ama makoꞌan sia
mak Ama solok mai.
Sia moos sobu karin taroman
mak ema nodi loꞌu-sudur baa Ama.
Nosi Ama makoꞌan hotu-hotu,
haꞌu kmesan dei mak sei moris.
Mais ema moos buka dalan
atu noꞌo haꞌu!”
Mais Naꞌi Maromak nataa Elia naꞌak, “O dale nia, la kona! Sei noo ema rihun hitu mak loꞌu-sudur baa Haꞌu. Sia naterus aan bei-beik no la loꞌu baa aiꞌoi lulik Baꞌal.”
5-6 Nunia moos, baa oras neꞌe. Lahoos ema Yahudi hotu-hotu seꞌi kotuk baa Naꞌi Maromak. Sei noo amikaan ema balu mak Naꞌi Maromak boi tiꞌan atu sori, tan Nia nakara natudu laran diꞌak baa ami. Kalo Nia nokbiit natudu laran diꞌak nodi sori ami tan amikaan hahalok diꞌak, neꞌe naꞌak, Nia la boi atu sori ami. Tan kalo ema nokbiit natudu laran diꞌak, neꞌe naꞌak nia la boi atu nalo nunia. Lia rohan nuneꞌe: ema Yahudi waꞌin buka dalan atu diꞌa-diꞌak no Naꞌi Maromak. Balu netan dalan, tan sia mak Naꞌi Maromak boi kedan tiꞌan. Mais waꞌin la netan dalan, tan neon monas toꞌo sia la nanono Naꞌi Maromak. Hakerek Moon naꞌak,
“Naꞌi Maromak foo baa sia,
matan mak la bele naree,
tilun mak la bele rona,
no kakutak tomak mak la bele nanoin.
Tan baa nia, sia la natene lia loos toꞌo baa ohin loron neꞌe moos.”
Naꞌi Daud moos nakerek nosi lia ema Yahudi naꞌak,
“Habusik sia nadahur iha siakaan fatin duꞌuk.
Siakaan dahur nia atu kesi fila sia,
tan sia naneo hotu-hotu diꞌak.
No siakaan sasoin duꞌuk atu nalo sia sidi ain.
10 Habusik siakaan matan nakukun,
toꞌo sia la titu-naree sa-saa!
Habusik sia natiu naha todan bei-beik,
toꞌo siakaan kotuk ruin tuꞌan katoꞌuk!”
Naꞌi Maromak nakara sori ema hotu-hotu
11 Ema Yahudi sia sidi ain tan la fiar baa Yesus. Tebes. Mais haꞌu atu kusu nuneꞌe: Sia nakloti toꞌo la bele nadeer tenik ka? Lale! Mais tan sia la noꞌuk nanono baa Naꞌi Maromak, siakaan salan nia loke dalan nebee Naꞌi Maromak simu ema seluk. Naꞌi Maromak nalo nunia, nebee ema Yahudi sia laran moras, hotu sia fila nikar baa Nia. 12 Malorek tiꞌan naꞌak, ema Yahudi sia seꞌi kotuk baa lia mak diꞌak. Mais tan siakaan salan nunia, ema seluk nosi raiklaran tomak bele noran Naꞌi Maromak laran diꞌak. Neꞌe naꞌak, ema Yahudi sia lakon boot. Ema lahoos Yahudi sia sotir boot. Mais nosi ikus, kalo ema Yahudi sia moos fila nikar diꞌa-diꞌak no Naꞌi Maromak, neꞌe mak diꞌak kaliuk!
13 Oras neꞌe, haꞌu katak baa emi mak lahoos Yahudi sia. Naꞌi Maromak solok haꞌu hanesan Kristus klosan bodik emi. Haꞌu kakaꞌas aan kodi kalaꞌok serwisu kabaas neꞌe, 14 tan kaneo kalo haꞌu kalaꞌok diꞌa-diꞌak serwisu neꞌe bodik emi mak lahoos Yahudi, arumak haꞌukaan ema Yahudi duꞌuk laran moras, toꞌo balu netan moris tan fila nikar baa Naꞌi Maromak. 15 Baa oras Naꞌi Maromak dudu sai ema Yahudi sia, Nia loke dalan nebee ema seluk bele tama dadi baa Niakaan ema. Mais nosi ikus, kalo ema Yahudi sia fila nikar baa Naꞌi Maromak, lia nia kabaas kaliuk, nuꞌu sia moris nikar nosi mate!
16 Kalo ema sera toꞌos isin uluk fohon baa Naꞌi Maromak, neꞌe naꞌak, toꞌos isin hotu-hotu dadi baa Naꞌi Maromak Niakaan. Kalo ema mak nalo tubi, sera tubi uluk fohon, tubi hotu-hotu dadi baa Naꞌi Maromak Niakaan. Kalo ema sera ai abut ida, ai sorun hotu-hotu moos dadi baa Naꞌi Maromak Niakaan.
17 Haꞌu kanesa ema Yahudi baa ai huun saitun ida mak Naꞌi Maromak kuda iha toꞌos laran. Nunia moos, kanesa emi mak lahoos Yahudi sia baa ai saitun fuik iha toꞌos luan. Naꞌi Maromak taa kotu ai sorun balu iha toꞌos laran nia, hotu Nia taa nola ai fuik sorun balu, tubir baa ai huun iha toꞌos laran nia. Hodi nunia, sorun nosi ai huun iha toꞌos luan, simu nola moris nosi ai huun iha toꞌos laran. Neꞌe naꞌak, Naꞌi Maromak foo moris baa ema Yahudi bele-bele no emi mak lahoos Yahudi. 18 Mais sintidu! Keta kakaku aan haneo haꞌak, emi hosi luan nia diꞌak liu ai sorun mak toꞌos naꞌin taa kotu iha toꞌos laran nia! Kalo atu maksaꞌek aan, keta maluꞌa tan o neꞌe sorun loos dei! Lahoos o mak malo ai huun nia biit, mais abut mak nalo biit.
19 Arumak o maꞌak, “Naꞌi Maromak taa kotu sorun ida nosi ai huun mak moris iha Niakaan toꞌos laran, nebee tubir nikar haꞌu baa, nodi seluk sorun tuan nia.” 20 Tebes. Mais keta maluꞌa maꞌak, Naꞌi Maromak taa kotu sorun nia sia tan sia la fiar baa Yesus. O bele seluk sia, tan fiar baa Nia. Tan lia nia, o la bele kakaku aan! Diꞌak liu, daka aan! Keta malo oi-oik. 21 Ema Yahudi sia nuꞌu sorun isin mak tubu uluk iha toꞌos laran. Mais Naꞌi Maromak la nabusik sia naterus aan kleur iha nia. Dadi, kalo o la fiar baa Yesus nohuun, keta maneo maꞌak Naꞌi Maromak atu nabusik o materus aan iha nia!
22 Hanoin diꞌa-diꞌak! Naꞌi Maromak laran diꞌak. Mais Nia moos laran moon. Nia natene natuun kastikar todan baa ema mak la nanono no seꞌi kotuk baa Nia. Bodik emi mak lahoos Yahudi sia, Naꞌi Maromak natudu laran diꞌak surak emi moris talin malu bei-beik ho Nia, nebee bele simu Niakaan dadiꞌak nia. Kalo emi la moris nunia, Nia nanis taa kotu emi nosi Niakaan ai huun. 23 Kalo ema Yahudi sia nalo neon aat hotu fiar baa Yesus, nanis Naꞌi Maromak tubir nikar sia baa ai huun isin nia. Tan Nia mak noo beran atu nalo nunia! 24 Mais emi mak lahoos Yahudi sia, nuꞌu sorun nosi saitun fuik mak uluk tubu karin iha toꞌos luan. Naꞌi Maromak boi nola emi nodi tubir baa ai huun saitun mak Nia kuda iha toꞌos laran. Kalo Naꞌi Maromak nalo nunia bodik emi mak lahoos Yahudi, saa tenik bodik ema Yahudi. Kabaas kaliuk kalo Nia tubir nikar sia baa siakaan ai huun duꞌuk.
Nosi ikus, Naꞌi Maromak atu sori ema Yahudi sia
25 Mamaluk iha Roma sia! Emi musti hatene lia neꞌe mak uluk sei lia subar. Mais kalo hatene tiꞌan, keta kakaku aan hodi haneo haꞌak, emi matenek. Lia subar nia nuneꞌe: oras neꞌe, ema Yahudi sia neon monas no la noꞌuk fiar baa Yesus. Mais la nunia bei-beik. Tan kalo ema seluk hotu-hotu fiar baa Yesus tiꞌan, ema Yahudi sia moos fiar baa Nia. 26 Kalo oras nia toꞌo tiꞌan, Naꞌi Maromak atu sori ema Yahudi hotu-hotu. Naꞌi Maromak duꞌuk katak kedan nunia tiꞌan iha Hakerek Moon naꞌak,
“Kalo niakaan oras toꞌo tiꞌan,
Maksorin ida atu mai
nosi Foho Sion iha kota Yerusalem.
Oras neꞌe, Israꞌel husar-binan sia la nanono baa Haꞌu.
Oras neꞌe, sia seꞌi kotuk baa Haꞌu.
Mais kalo ema nia toꞌo mai tiꞌan, Nia atu namoos siakaan neon.
27 Hotu, Haꞌu kasu mohu siakaan salan,
tan uluk kamate menon ko sia nunia.”
28 Sura oras ema Yahudi sia dudu Yesus Manfatin Diꞌak, sia nalo aan nuꞌu funu mak sakar Naꞌi Maromak. Hodi nunia, sia foo leet baa emi mak lahoos Yahudi sia. Mais Naꞌi Maromak nadomi sia nohuun, tan nadomi siakaan bei uluk, no boi nola sia tiꞌan dadi baa Niakaan ema. 29 Kalo Naꞌi Maromak latan buat ida tiꞌan, Nia la dada nikar ona. Kalo Nia bolu nola ema atu dadi baa Niakaan ema tiꞌan, Nia la nabusik ona.
30 Uluk, emi mak lahoos ema Yahudi la hanono baa Naꞌi Maromak. Mais oras neꞌe, emi simu Niakaan dodan tan ema Yahudi sia la nanono baa Nia. 31 Oras neꞌe, sia mak la nalo tuir Naꞌi Maromak beer. Tan baa nia, Naꞌi Maromak natudu nikar dodan baa emi. Mais Nia sei nakara foo dodan baa sia tenik. 32 Lia neꞌe naꞌak, ema Yahudi no ema lahoos Yahudi, Naꞌi Maromak nafoli manesak. Sia hotu-hotu la tuir Niakaan hakara. Mais Nia nabusik nunia, nebee bele natudu dodan baa ema hotu-hotu.
Tonu-haboot Maromak
33 Adeei! Haꞌu ktonu-kaboot Maromak tan Nia matenek kaliuk!
Nia nodi Niakaan matenek nia, nalo lia kabaas.
La noo ema ida mak bele natene tebe-tebes Maromak moris dalan.
La noo ema ida mak bele natene fukur nosi Maromak nakotu lia.
La noo ema ida mak bele natene
tan saa Maromak nalo lia ida.
34 Tebes! Iha Hakerek Moon ema nusu naꞌak,
“See mak bele natene fukur Maromak Niakaan hanoin?
See mak bele foo lia tateꞌan baa Nia?
35 See mak bele foo sa-saa baa Nia, toꞌo Nia natusan baa ema raiklaran?
La noo ema ida kois mak bele.”
36 Hotu-hotu nahabut baa Maromak.
Hotu-hotu, Nia mak babilan.
Hotu-hotu bodik Nia.
Ita tonu-haboot Nia
toꞌo nima-nimak!
Nunia tebes!
11:1 Filipi 3:5 11:3 1 Naꞌi Israꞌel Sia 19:10, 14 11:4 1 Naꞌi Israꞌel Sia 19:18 11:5-6 Hanoin Hikar Dalan Moris 7:7-8 11:8 Hanoin Hikar Dalan Moris 29:4; Yesaya 29:10 11:10 Kananuk Sia 69:23-24 11:26 Yesaya 59:20-21 11:27 Yeremia 31:33-34 11:33 Yesaya 55:8 11:34 Yesaya 40:13 11:35 Ayub 41:11 11:36 1 Korintus 8:6