22
Mota no wee mak foo moris
1 Nunia hotu, makbukar laleꞌan nia natudu baa haꞌu, mota ida mak ween nalo ema moris nohuun. Wee nia, moon nuꞌu lalenok. Mota nia suli sai nosi Naꞌi Maromak no Bibi Malae habesi aan fatin.
2 Hotu, mota nia suli liu baa dalan inan iha kota nia. Iha mota nia balu-baluk, no ai huun mak fuan nalo ema moris nima-nimak. Ai huun nia sia nafua tinan ida, isin sanulu resin rua. Neꞌe mak, fulan ida, isin ida. Tahan, bele halo baa aitahan moras, atu hodi hadiꞌak ema nosi klubun hotu-hotu iha raiklaran.
3 Mais hotu-hotu mak Naꞌi Maromak dudu nodi kastikar, la noo iha kota nia. Mak noo iha nia, neꞌe mak Naꞌi Maromak no Bibi Malae Oan mak tuur iha habesi aan fatin no siakaan ema mak loꞌu-sudur baa Sia.
4 Ema nia sia bele titu-naree besik Naꞌi Maromak oin. Naꞌi Maromak naran moos hakerek iha siakaan baboton.
5 La noo kalan iha kota nia. Naꞌi Maromak eman sia la buka loro no la buka tenik badut, tan Naꞌi Maromak ahar duꞌuk mak naroma kota nia. Sia moos atu kaer ukun iha nia toꞌo nima-nimak.
Naꞌi Yesus atu mai ona
6 Nunia hotu, makbukar laleꞌan nia katak baa haꞌu naꞌak, “Lia hotu-hotu mak haꞌu katak baa o neꞌe, tebes no loos. Ema bele fiar haꞌukaan dalen neꞌe. Uluk, Naꞌi Maromak nodi Niakaan Kmalar Lulik nebee katak Niakaan Manfatin baa Niakaan makoꞌan sia. Mais oras neꞌe, Nia nodi makbukar laleꞌan atu katak baa Niakaan ema sia lia neꞌe sia hotu-hotu mak la kleur ona musti dadi.”
7 Nunia hotu, Yesus dale naꞌak, “Manoin! La kleur Haꞌu kmai ona. Hakerek neꞌe, nakerek lia hotu-hotu mak atu dadi. Ema hotu-hotu mak nalo tuir lia fuan iha hakerek neꞌe, netan sotir.”
8 Ema mak nakerek hakerek neꞌe, neꞌe mak haꞌu, Yohanis. Haꞌu neꞌe duꞌuk mak rona no titu-karee lia neꞌe sia hotu-hotu. Haꞌu krona kotu, kakniꞌa kodi loꞌu-sudur seꞌi oin baa makbukar laleꞌan mak natudu lia nia sia baa haꞌu.
9 Mais nia deꞌan haꞌu naꞌak, “Hoi! Keta malo nunia! Keta loꞌu sudur baa haꞌu. O musti loꞌu-sudur baa Naꞌi Maromak dei! Tan haꞌu moos Naꞌi Maromak ain-liman hanesan o mo okaan mamaluk sia mak dadi Niakaan makoꞌan. Haꞌu moos manesak ko ema hotu-hotu mak nalo tuir saa mak hakerek hela iha hakerek neꞌe.”
10 Hotu, makbukar nia dale natutan tenik naꞌak, “O keta subar hakerek neꞌe isin baa ema. Tan la kleur ona, hotu-hotu iha hakerek neꞌe, nanis dadi.
11 Ema mak lisan aat,
habusik baa, nebee sia nalo lisan aat bei-beik.
Mais ema mak moris moos,
sia musti moris moos bei-beik.
Ema mak nalo aat,
habusik baa, nebee sia nalo aat bei-beik.
Mais, ema mak nalo diꞌak,
sia musti nalo diꞌak bei-beik.”
12 Nunia hotu, Yesus dale nikar tenik naꞌak, “Manoin diꞌa-diꞌak! La kleur tenik, Haꞌu kmai ona! Haꞌu atu kselu baa ema hotu-hotu, tuir siakaan hahalok duꞌuk.
13 Haꞌu neꞌe,
Alfa toꞌo Omega.
Haꞌu neꞌe,
Ulun toꞌo Ikun.
Hotu-hotu huun baa Haꞌu,
nosi huun toꞌo rohan.
14 Ema mak fasi namoos siakaan tais, sia mak sotir.
Tan sia bele tama odamatan nanokar baa kota nia laran.
Ema mak moris moos, sia mak sotir.
Tan sia bele naa ai fuan mak nalo ema moris nima-nimak.
15 Mais ema seluk, la bele tama iha kota nia.
Mak lahoos Naꞌi Maromak eman, la bele nein iha nia.
Sia neꞌe mak, ema mak la fiar baa Naꞌi Maromak,
ema nalo lia kfoꞌer, ema mak loꞌu baa aiꞌoi lulik,
ema mak noꞌo ema, ema mak neko ema,
no ema tolek teen.
Sia hotu-hotu nia, la bele tama.
Sia hotu-hotu nia, habusik hela iha luan dei.
16 Haꞌu neꞌe, Yesus. Haꞌu, mak solok makbukar laleꞌan nia atu nalore lia neꞌe sia hotu-hotu, nebee o baa katak Haꞌukaan Manfatin baa ema sarani klubun hitu nia.
Haꞌu neꞌe, Naꞌi Daud husar-binan.
Haꞌu neꞌe, Naꞌi makaer ukun.
Haꞌukaan kroman lakan,
boot kaliuk hanesan Fitun Lorosaꞌe.
Haꞌukaan sinak,
biit kaliuk hanesan Fitun Naꞌin.”
17 Maromak Kmalar Lulik tene naꞌak, “Mai neꞌe ona!”
Sasudin feto nia moos bolu naꞌak, “Laꞌo mai ona!”
Hotu-hotu mak rona moos tuir naꞌak, “Mai ona!”
“Ema mak nanroo, mai nemu ona.
Ema mak buka nemu wee mak nalo ema moris nima-nimak,
mai nola ona!
Ema bele nola wee nia
hodi neok.
Ema bele nemu wee nia
hodi la selu.”
Yohanis narohan hakerek
18 Haꞌu, Yohanis neꞌe, foo katene baa ema hotu-hotu mak rona lia mak Naꞌi Maromak nalore kedan iha hakerek neꞌe: Kalo noo ema mak tuꞌan sa-saa baa hakerek neꞌe, Naꞌi Maromak atu kastikar tuꞌan baa nia, nodi dinu hitu mak Nia fakar baa raiklaran.
19 Tenik, kalo noo ema mak nasai nalara sa-saa nosi hakerek neꞌe, Naꞌi Maromak atu nola nikar niakaan fafaꞌek, nebee nia keta tama baa kota lulik nia, no keta naa ai fuan mak nalo ema moris nima-nimak.
20 Yesus mesan duꞌuk mak nalore lia neꞌe sia hotu-hotu. Nia nameno tiꞌan naꞌak, “La kleur Haꞌu kmai ona. Lia neꞌe, tebes no loos!”
Kalo nunia, haꞌu kakroꞌan kaꞌak, “Mai ona Naꞌi Yesus!”
21 Haꞌu kaloon nebee, Naꞌi Yesus natudu laran diꞌak baa Niakaan ema hotu-hotu. Amen!
Nosi haꞌu,
Yohanis