23
Sara wol̈onoe
1-2 Kjok buk kjrina ko Quiriat Arbá. Eeri ga e ko Hebrón, e Canaán kjokyo obi. Eshko ga Sara l̈u ĩno öötong sak dbäw kjingsho sak pjök kjingsho kjäkshko (127) ga wol̈onoe. E kjĩshko ga Abraham sl̈atong, ba boy l̈i soyopora.
Pjir ga opshino eshko dwayo, ga öör jek shäng l̈an Het tjëyoga tjok. Epga kjok eshko sopga. Eshko ga tjl̈ẽ ba kong l̈ok ga «Tja na so l̇l̇ëme. Gueniyo rokër bomi kong sira ga tja kong kjok soynezĩ kjrina, bor boy jner ber buk eshko wl̈o» l̈e.
Kuya l̈ok ga tjl̈ẽ ba kong ga «Tjl̈apga, tjawa kuzong. Pja borwa kong ga tjwl̈õ ara, pjl̈u wa dik. Bop boy jnes borwa sak pjl̈ú, owa l̇l̇ëm wl̈eniyoshko. Kjakrokëp ë pogo kong wl̈eni ga “¡Jöl̈ö!” l̈e bop kong» l̈e.
Kuya ga kojono shäng, ga kä kjujono Het tjëyoga kong. 8-9 Ga tjl̈ẽ ba kong l̈ok ga «L̈ëmi jl̈õkoyo ga bor boy jner ber buk sak jũshko ga pjl̈ú wl̈eni ga tja kjimtëmi eni. Zojar wa Efrón kjok worbo go ga guëng jong ööng kjwara, Macpela kjokyo buk l̈ishko. Woydër ga kjakrokëmi ba kong ga soyneya bor kong. Tjwl̈õ ie kjöm ga tjwl̈ẽn ba kong eni. Eni ga kjok tjwl̈ẽnor l̈i ber buk bor kong kjok ëre kjing go» l̈e.
10 Efrón sök ba pjeyoga tjrëko kuzong ga Abraham dboryara, kuya nopga l̈öng eshko kës l̈irë pjl̈ú wl̈o. 11 Tjl̈ẽ ba kong ga «¡L̇l̇ëme, Tjl̈apga! Guëng jong ööng l̈ëp l̈i twër ber bop kong bop sënggl̈o, kjok buk eshko l̈i tjok bakoe. Bor pjeyoga kjok ëre so ber l̈öng ba miydaga. Eni ga tworor bop kong bop sënggl̈o kjĩshko ga bop boy to jnep eshko» l̈e.
12 Kuya ga kä kjujono jek obi kjok eshko sopga l̈öng l̈i kong, 13 ga Efrón dboryara ba bokshto, tjl̈ẽ ga «Tja kuzong. Rokër bop kong sira ga dbur kjros, kjok l̈i ãska. E irgo ga bor boy jner ber buk eshko» l̈e.
14 Kuya Efróndë ga tjl̈ẽ ba kong ga 15 «Tja kuzong, Tjl̈apga. Kjok tjwl̈õ dbur sho pjl̈ubl̈ún kjwo sak dbäw pjl̈ogl̈o pkëng (400), dbur bayo eni. Gueniyo bi kong ga ëre l̇l̇ëye drete. E kjĩshko ga bop boy to jnep eshko» l̈e.
16-19 Kuya ga tjl̈ẽ ba kong ga «Jöl̈ö» l̈e. Eni ga Het tjëyoga bokshto ga kjok l̈i tjwl̈ẽna Abrahamdë, dburyo shte l̈öng pjl̈uk jonge. Efrón kjok, e Macpela kjokyo obi, e ber buk Mamré kjokyo, dl̈o wen tëm shwo l̈ëkong. Eerishko ga Mamré kjokyo ko Hebrón, e Canaán kjokyo obi. Efrón kjok l̈i tjwl̈ẽna Abrahamdë, guëng jong ööng l̈i tjok, kjor l̈ok eshko tjok bakoe. E irgo ga ba boy Sara jnena beno buk eshko. 20 Eni ga guëng jong ööng soynena Het tjëyogarë Abraham kong l̈i beno ba shinmoga jnezl̈ong shtoyo.