6
1-2 Bäm go ga tjl̈õkwo l̈araba bomi kong ara. Cristo tjl̈õkwo wẽl̈ë l̈i l̈araba bomi kong. L̇l̇ëbo owa shäryëy l̈öng l̈i, e rayëy sorë, shji wol̈on l̇l̇ëm wl̈o, e l̈araba bomi kong. Shji mär Sbö go sorë, e l̈araba bomi kong. Shji wë sorë, e l̈araba bomi kong. Shji orkwo ië ëng kjing go sorë, e l̈araba bomi kong. Nopga wol̈ono l̈öng l̈i woshrë iröng obi sorë, e l̈araba bomi kong. L̇l̇ono ga nopga shdũya Sbörë ĩyado wl̈o sorë, e l̈araba bomi kong bakoe. Tjl̈õkwo uunkong ëre l̈araba bomi kong pjir tjän. Gueniyo woyde ga e l̈anyotkëy ame, shji opping tjl̈õkwo kjang l̈i go dey, nopga wotjl̈ĩk këkboga dik wl̈eni.
3 Woyde Sbörë wl̈eni ga shäryëy eni.
4-6 Ëye tjl̈õkwo l̈i kjrono, ga rayara ga rokëy iröng obi ber l̈öng Sbö tjok ga äe. L̇l̇ëbo owa shärye l̈öng l̈i, e owa jl̈õe l̈e ame, ga raye ame bakoe. L̇l̇ëbo twara Sbörë ba kong l̈i kjrara l̈ok tjän. Epga ëng dowl̈ẽno Sbö Sëya tjok. Miydara l̈ok pjir tjän ga Sbö tjl̈õkwo, e pjl̈úe. Sbö Wa tjwe iröng obi dbo ara go sorë, e miydara l̈ok pjir bakoe. Eni ga Sbö Wa l̈i rayarashko ga e zröra l̈ok l̈ök pjang kjl̈ös go jek obi wl̈eni, ga iara l̈ok beno shäng joywëba wl̈o bakoe.
7 Kjok buk kjrina. Shunyo shrë ba kjing goshko ga di l̈i shura kl̈ung sho l̈irë, ga dwl̈a botjyono pjl̈ú, nopga parkë l̈öng eshko l̈i kongshko ga Sbö ber wopjl̈ú kjok l̈i tjok.
8 Gueniyo e wen shkö sho, kjl̈o sho obl̈ë obl̈ë l̇l̇ëno l̇l̇ëm wl̈eniyo ga Sbö ber wopjl̈ú ba tjok l̇l̇ëme. L̇l̇ono ga e sukoba pjire.
9 Pjeyoga, tjawa l̈an bomi tjok eni ëmdë ga miydërwa ga pjãy opshäryë owa eni l̇l̇ëme. Ëye döktong ga woyde ga l̇l̇ëbo shärye pjl̈úe. Ga miydërwa ga pjãy omshäryë eni.
10 Sbö woydëmi ara kjĩshko ga ba nopga kjimtoromi ara, ga shäryëmi l̈öng eni obi. Sbö wotjl̈ĩk bek ĩyado, ga l̇l̇ëbo shäryëmi l̈öng l̈i woyojeya l̇l̇ëme.
11 Woydërwa ga pjãy omshäryë eni jl̈õkoyo, äär jong l̇l̇ëbo koshëmi l̈öng l̈i shäryono pjir guing.
12 Woydërwa ga pjãy opyë l̈öng shmi jong wl̈eni l̇l̇ëme. Ëye kwl̈eya mär Sbö go l̇l̇ëm ga l̇l̇ëbo twe Sbörë ba nopga kong l̈ara l̈i kjre l̈ok jl̈õkoyo. Woydërwa ga pjãy omshäryë eni bakoe.
Tjl̈õkwo l̈ara Sbörë jl̈õkoyo l̈i, e shäryë eni
13 Ëye tjwl̈õ ara Sbö kjinmo l̇l̇ëme. E kjĩshko ga Sbö tjl̈ẽno Abraham kong jl̈õkoyo dënashko ga tjl̈õkwo l̈i l̈ara ba ko om go l̈i go.
14 Eshko ga tjl̈ẽ ga «Pja kjimtër ara. Bop tjëyo tek ber bop irgo l̈i iër ber shdär träk l̇l̇ëme» l̈e.
15 Kuya ga beno shäng ba koshë wopjl̈ú, ga l̇l̇ëye l̈ara l̈i kjrara beno ba kong.
16 Nopga tjl̈õkwo l̈ë obl̈ë kong jl̈õkoyoshko ga tjl̈õkwo l̈e obl̈ë tjwl̈õ ara ba kjinmo l̈i ko goshko, ber ba miydaga wl̈o. Shäryara eni ga jl̈õe l̈ëba.
17 Eni ga Sbö tjl̈ẽno jl̈õkoyoshko ga woydara ga miydëba ga tjl̈õkwo l̈i shärye jl̈õkoyo, ga kjl̈opswe l̇l̇ëme. E kjĩshko ga tjl̈õkwo l̈i l̈ara ba ko om go l̈i go.
18 Sbö jyõrkë l̇l̇ëme. L̇l̇ëye l̈e jl̈õkoyo l̈i, e shärye kjl̈uwe. L̇l̇ëye l̈e ba ko go l̈i, e shärye kjl̈uwe bakoe. Ga shji töktong ba shwoy, ga rokoroy ba kong ga shji döya. Eni ga miydëy ga l̇l̇ëye l̈ara l̈i shärye eni kuzong ga shji beno l̈öng wopjl̈úe.
19-20 Eni ga miydëy pjl̈ú ga l̇l̇ëye koshëy l̈öng l̈i, e shäryë eni. E kjĩshko ga shji wotjl̈ĩk obl̈ë obl̈ë l̇l̇ëm, shji wotjl̈ĩk ber l̈öng kjrinaso eröe. Shji mär ber l̈öng Jesús go. E öötong sök Sbö bokshto kjok dogo bi bäm go, ga beno shäng syõshtaga kësbangyo ĩyado bi kjĩshko, Melquisedec dik.