Evangelio según Lucas
Jesucristo roy pjl̈ú ëre, e jyã tara Lucasdë
Kjibokwo ëre sorë
Domer shäng kjl̈ara ko Lucas. E no dwl̈omnega. Woyotjl̈ĩkoba ga Lucas, e judío l̇l̇ëm wl̈eniyo. E jëktong shäng parkë ba kjl̈ara Pablo tjok, tak pjang Colosenses 4.14 go, Filemón 24 go, 2 Timoteo 4.11 go sorë l̈i eni. Domer shäng kjl̈ara obi ko Teófilo. Woyotjl̈ĩkoba ga e Roma so, domer tjwl̈õ ara wl̈eniyo bakoe.
Kjibokwo ëre tara Lucasdë ba kjl̈ara Teófilo kong, Jesús roy l̈i miyde pjl̈ú wl̈o. Jesús öör kjok ëre kjing go judíoga döga, nopga judío l̇l̇ëm wl̈eniyo döga, e tara ba kong. E öör, Data Sbö l̈i miyde nopga uunkongdë wl̈o, e tara ba kong bakoe.
1
1-4 Miga, Tjl̈apga Teófilo.
L̇l̇ëbo shäryara Sbörë bi tjrëko l̈i, e tër bop kong, miydëp wl̈o. Tja omĩno l̇l̇ëm, gueniyo nopga omĩno ara ba bokkwo go, ba soyozl̈ong tek l̈ëkong. Epga beno l̈öng ba roy l̈aga. Ga roy l̈e l̈ok l̈i kuya l̈ok ga kjone kjone tjl̈ẽ ga «E jyã tëy, l̇l̇ëye ĩnaba l̈i ber wẽl̈ë wl̈o» l̈e. Ga jyã tara l̈ok beno bi kong. Ba jyã tagaga l̈i kjl̈öböso, ga tjl̈õkwo tara l̈ok l̈i beno bi kong kjibokwo obl̈ë obl̈ë go. Tjara omtë eni bakoe. Jesús roy kurorshko ga tja wotjl̈ĩno ga «¿E sorëro?» l̈oror, «Tja omkjakrokë ba miydagaga kong» l̈oror bakoe. Ga kjakrokoror shäng yõtso, eeri ga öötong l̈uyo kop arae. E kjĩshko ga tja wotjl̈ĩno ga e jyã tër ber bop kong beke. Miydëp e go wl̈o ga l̇l̇ëbo pinaba bop kong l̈i, e jl̈õe.
«Chida buk dörö kjl̈ara ko Juan» l̈e Tjl̈apga parkaga kjok dogo so kjl̈ararë
Tjl̈apga Herodes sök Judea so pjl̈uyoshko ga tjl̈apga sök kjl̈ara syõshtaga Sbö kong nopga kjĩshko wl̈eniyo ko Zacarías, e Abías tjëyo. Ba boy ko Elisabet, e Aarón tjëyo bakoe. Epga pjök l̈i pjl̈o bek Sbö bokso, ba tjl̈õkwo kol̈e l̈ok ĩyado. Epga wapga l̇l̇ëm, Elisabet kjrong kjĩshko. Eshko ga epga öötong tjl̈abl̈a tjän.
Dbar kjwara ga Zacarías tjëyoga parkë Sbö kong ba u roy wl̈o dbaryo l̈i öötonge. E ba sdëkwo kjĩshko ga jyã shira l̈ok, ga l̈ono Zacarías kong, opzrëk jek Sbö u roshko, l̇l̇ëbo l̈õ pjl̈ëbl̈ë suya eshko wl̈o. 10 Eni ga opzrëno jek öötong shäng ba l̇l̇ëbo l̈õ pjl̈ëbl̈ë l̈i suk. E wopro ga nopga tjeng kjoko kës l̈i beno tjeng syõshtë Sbö kong.
11 Eshko ga këm kjër roshko ga Tjl̈apga parkaga kjok dogo so weno shäng Zacarías kong kjl̈ara, shäng l̇l̇ëbo l̈õ pjl̈ëbl̈ë sukkl̈o jong l̈ishko e sor go, or kël̈ëkong. 12 Ĩya ga beno shäng sëya l̇l̇ëm erä.
13 Eshko ga Tjl̈apga parkaga l̈i tjl̈ẽ ba kong ga «Zacarías, l̇l̇ëye bangkjrëp l̇l̇ëme. L̇l̇ëye rokorop Sbö kong bop syõ go l̈i, e kura, ga shärye bop kong. E kjĩshko ga l̇l̇ëye bangkjrëp l̇l̇ëme. L̇l̇ono ga bop boy, e wa buk kjl̈ara domer. Bukshko ga koiëp Juan. 14 Eshko ga pja ber wopjl̈ú, woowa l̇l̇ëme. Nopga ara ber l̈öng wopjl̈ú eshko bakoe. 15 Bop wa, e ber kësbang Sbö bokso. Kjil̇l̇gwo bo dyo ie wl̈o l̇l̇ëm, ää dbo ara ie wl̈o l̇l̇ëm bakoe. Buk l̇l̇ëm obishko ga ba go Sbö Sëya tjwe ber kësbang ba tjok.
16 »Ba kjĩshko ga Israel tjëyoga ara wotjl̈ĩk owa wl̈eniyo, e tjwe Tjl̈apga, ba Sbö l̈i kol̈ë iröng obi. 17 Sbö Sëya ber ba tjok kësbang, beno kësbang tjl̈apga tek dënashko so Elías tjok dik. Ga e jek shäng Tjl̈apga bäm go. Eshko ga dataga ie ber wotjl̈ĩk pjl̈ú ba wapga kong obi, nopga Sbö bangkjrë l̇l̇ëm wl̈eniyo, e ie ber ba tjl̈õkwo kol̈ë. Eni ga nopga poshärye, Tjl̈apga wl̈okjrë wl̈o» l̈e.
18 Kuya ga tjl̈ẽ ba kong ga «Tja tjl̈abl̈a, bor boy, e tjl̈abl̈a bakoe. ¿Tjl̈õkwo l̈ëp shäng l̈i, e jl̈õre miydër sorë?»
19 «Tja Gabriel. Tja parkë Sbö kong ba bokshto. Tja ichara l̈an bop tjok, chida l̈i roy pjl̈ú söga bop kong. 20 Ga tja tjl̈õkwo kjrorop l̇l̇ëm kuzong ga pja ber shäng tjl̈ẽ l̇l̇ëm äär jong tjl̈õkwo l̈oror bop kong l̈i shäryono eni pjir guing» l̈e ba kong.
21 E wopro ga nopga beno l̈öng Zacarías koshë kjoko l̈i wotjl̈ĩk l̈ok arae. «¿Shäng wop ara oto l̈ëba? ¿Opshik Sbö u kjwe roy dwayo mal̈ing l̇l̇ëm ega?» l̈e ëng kong eni. 22 Eshko ga opshinoshko ga tjl̈ẽ ga äe. Eni ga miydara l̈ok ga l̇l̇ëbo ĩno yoshko këm kjër roshko. Tjl̈ẽ ga ä e kjĩshko. Beno shäng tjl̈ẽ or goshko erä.
23 Ga ba pak shäryë Sbö kong ba u roy wl̈o dbaryo l̈i pjitongshko ga to iröng obi ba ushko. 24 E irgo ga ba boy beno shäng kjl̈araso l̇l̇ëme. Beno sök ba ushko, opshino l̇l̇ëm öötong mogl̈o shkëng (5). Wotjl̈ĩk ga 25 «Tja wapga l̇l̇ëm kjĩshko ga tja kong wa twe Tjl̈apgarë bor kong, tja wa tjokshko ga tja l̈ëba ame wl̈o» l̈e.
«Jesús buk döröe» l̈e Sbö parkaga kjok dogo sorë
26-27 Kjogl̈o shäng kjl̈ara ko María. E sök Nazaret kjokyo, e Galilea kjokyo obi. Domer miydoydë l̇l̇ëm obi, gueniyo tjl̈õkwo twono José kong, orkwosmok ba tjok wl̈o l̈e. José, e David tjëyo. Elisabet shäng kjl̈araso l̇l̇ëm mogl̈o tjershko (6) ga ba parkaga kjok dogo so ko Gabriel l̈i ichara Sbörë María ĩk. 28 Eni ga Sbö parkaga l̈i tjwe shäng ba shwoy ga tjl̈ẽ ba kong ga «Miga, María. Pja woyde Tjl̈apgarë ara. Ba kong ga pja tjwl̈õ ara. E shäng bop tjok» l̈e.
29 Kuya ga woyotjl̈ĩya beno sök ara. «¿Tjl̈õkwo l̈e shäng eni bor kong ega?» l̈e ba pjl̈úshko.
30 Eshko ga Sbö parkaga l̈i tjl̈ẽ ba kong ga «María, l̇l̇ëye bangkjrëp l̇l̇ëme. Sbö ber shäng wopjl̈ú bop tjok. 31 Pja ber shäng kjl̈araso l̇l̇ëme. Pja wa buk kjl̈ara domer. Bukshko ga koiëp Jesús. 32 E ber tjwl̈õ kësbang. E kowëba Sbö Tjwl̈õ Kësbangyo l̈i Wa. E ie Sbö Tjwl̈õ Kësbangyorë ber shäng Israel tjëyo pjl̈uyo, ba pjeyo tek dënashko so David ĩ dik, 33 ber Israel tjëyo pjl̈uyo ĩyado wl̈o. E ber pjl̈u dbaryo l̈i, e pjir l̇l̇ëme» l̈e.
34 Kuya ga tjl̈ẽ ga «¿Tja wa tjok sorë? Tja domer miydoydë l̇l̇ëm obi.»
35 «Bop go Sbö Sëya tjwe ber kësbang bop tjok, ga pja kjingue Sbö Tjwl̈õ Kësbangyo dbo l̈irë. Eshko ga pja ber shäng kjl̈araso l̇l̇ëm, l̈aga Sbörë eni. E kjĩshko ga chida buk l̈i, e iak beno buk dboy Sbö kong, e kowëba Sbö Wa bakoe. 36 L̈ër bop kong kjrina obi ga bop pjeyo Elisabet, e tjl̈abl̈a tjän ëmdë ga wa buk kjl̈ara döröe. L̈ãywëba ga e wapga l̇l̇ëm wl̈eniyo l̈araba. Gueniyo shäng kjl̈araso l̇l̇ëm mogl̈o tjer (6) tjän. 37 L̇l̇ëye shärye Sbörë ga ä wl̈o drete» l̈e ba kong.
38 Kuya ga tjl̈ẽ ba kong ga «Jöl̈ö. Tja ichaga Tjl̈apgarë. Eni ga l̇l̇ëye l̈orop l̈i, e miydaga ber Sbörë» l̈e.
E irgo ga Sbö parkaga l̈i toe.
María öör Elisabet ĩk
39-40 E irgo ga María to jek mal̈ing Elisabet ĩk. Elisabet sök Judea kjokyo dl̈up shwo l̈ëkong. E sök eshko ba l̈anma Zacarías tjok. María öötong shäng eshko, opzrëno jek ba u roshko ga «Miga» l̈e Elisabet kong.
41 Kuya chida buk Elisabet roshko l̈irë ga wiktong jl̈õkoyo. Ga ba mekë go Sbö Sëya shrono beno kësbang ba tjok. 42 E kjĩshko ga tjl̈ẽno dbo go, tjl̈ẽ ga «María, pja kjimtara Sbörë ara, wal̈ëga uunkong kjinmo, bop chira kjimtara ara bakoe. 43 Bor Tjl̈apga mekë l̈i pja. Tjara tjwl̈õ l̇l̇ëme. ¿Tja ĩp tjwe l̇l̇ë kjĩydo? 44 Bop ybö kur ga chida l̈i wiktong jekdo bor bö roshko, wopjl̈ú kjĩshko. 45 L̇l̇ëye l̈ara Tjl̈apgarë bop kong l̈i tjl̈õkwo kjrorop. E kjĩshko ga pja ber wopjl̈úe» l̈e ba kong.
46 Kuya ga tjl̈ẽ ga
«Tja bor Tjl̈apga poshrëk arae.
47 Tja wopjl̈ú Sbö tjok,
e bor döga.
48-49 Tja ba parkaga, tja tjwl̈õ l̇l̇ëm wl̈eniyo,
gueniyo ga tja ĩna, tja miydara.
L̇l̇ëbo shäryara Sbö Kjangyo l̈irë bor kong kësbange.
E kjĩshko ga eeri jek l̈ëkong ga tja roy shdär nopga uunkong kong.
“Wal̈ë kjwe kjimtara Sbörë kësbang jl̈õe” l̈e ĩyado.
E ko Eröe. E bishĩya dik l̇l̇ëme.
50 Pja songe l̈e ba bangkjraga uunkong kong ĩyadoe.
51 L̇l̇ëbo kësbang shärye ĩyado, e dbo ara kjĩshko.
Nopga opposhrëk ä wl̈eniyo, opyë woydë ber kësbang l̈i,
e shdöra kjl̈oroe.
52 Pjl̈upga këskës wl̈eniyo,
e l̈ona beno tjwl̈õ ame.
Nopga wl̈ẽp wl̈eniyo,
e poyona beno këskëse.
53 Nopga pjl̈i ara wl̈eniyo kong,
l̇l̇ëye woyde l̈i, e twara ba kong pjire.
Nopga tjeng l̇l̇ëbo ara wl̈eniyo,
e ichara jek or rorëe.
54 Shji Israel tjëyoga ber l̈öng ba parkaga.
Shji kjimtara.
Shji songe l̈e ĩyado.
55 L̈ara eni jl̈õkoyo bi pjeyoga tek dënashko so kong, Abraham kong bako,
ga shäryara eni» l̈e.
56 Ga María beno sök Elisabet tjok ba ushko mogl̈o mya dik. E irgo ga tek shrono shäng iröng obi ba ushko.
Juan No Waga bukshko dbaryo
57 Elisabet dbaryo öötongshko ga wa buk kjl̈ara domer. 58 Eshko ga ba mekë beno wopjl̈úe. Roy kura nopga tjeng ba zl̈ong bäng l̈i, ba pjeyogarë, ga beno l̈öng wopjl̈ú ba tjok eshko bakoe. Miydara l̈ok ga l̇l̇ëbo shäryara Tjl̈apgarë pjl̈ú ba kong.
59 Öötong dbargwo kjwongshko (8) ga chida l̈i söra l̈ok, doyo jyã te wl̈o. «Koiëy Zacarías, ba data l̈i ko» l̈ara nopga l̈öng l̈irë, 60 gueniyo ga ba mekë tjl̈ẽ ga «Eni l̇l̇ëme. E ko Juan» l̈e.
61 Kuya l̈ok ga tjl̈ẽ ba kong ga «¿Eni ega? Pja pjeyo ko eni drete» l̈e. 62 Ga tjl̈ẽno l̈ok chida data l̈i kong or goshko, koie ber l̇l̇ë miyde l̈ok wl̈o. 63 Eshko ga ba data kjorkwang rokono kjwangna, l̇l̇ëbo jyã të e go wl̈o. Twara l̈ok ba kong ga jyã tara ga «E ko ber Juan» l̈e. Ĩya nopga uunkong l̈irë ga beno l̈öng yëy l̈e erä. 64 Jekdo eshko ga chida data l̈i tjl̈ẽno jek obi, ga Sbö poshrëra arae.
65 Kuya l̈ok ga yëy l̈e uunkong l̈irë. Ga l̇l̇ëbo shäryono l̈i, e l̈anyotkëba ara Judea kjokyo dl̈up shwo l̈ëkong kjwang jĩkong. 66 Kuya nopga l̈öng eshko l̈irë ga beno l̈öng wotjl̈ĩk ara uunkong. Tjl̈ẽ ëng kong ga «Jl̈õkoyo ga Tjl̈apga shäng chida l̈i tjok. ¿E kjĩshko ga e ber l̇l̇ë shäryë?» l̈e l̈ok eni.
Tjl̈apga poshrëra Zacaríasdë
67 Eshko ga Zacarías go Sbö Sëya shrono beno kësbang ba tjok, ga tjl̈õkwo l̈ara Sbö Sëyarë ba kong. Kuya ga l̈ara jekdo eshko obi. Tjl̈ẽ ga
68-69 «Tjl̈apga, e poshrëy ara.
Shji Israel tjëyo Sbö l̈i e.
E shrono, shji kjimte wl̈o, shji döya wl̈o bakoe.
Bi döga ichara kjl̈ara bi kong, e kësbang,
e ba parkaga tek dënashko so David l̈i tjëyo.
E poshrëy träk l̇l̇ëm e kjĩshko.
70 Tek dënashko ga tjl̈õkwo twara beno bi kong,
l̈ak ba tjl̈õkwo l̈agagarë drete.
Tak pjang eni:
71 “Tja tjwe ber bomi döga, bomi wl̈oyoga wl̈oshko dwayo,
bomi woydaga l̇l̇ëm l̈i wl̈oshko dwayo bakoe.
72 Pjãy songe l̈ër ĩyado.
Bor tjl̈õkwo tworor bomi kong beno ĩyado wl̈o l̈i woyojer l̇l̇ëme.”
73 Tjl̈õkwo l̈ara bi tjl̈apga Abraham kong jl̈õkoyo l̈i beno jong eni.
74-75 Shji döya bi wl̈oyoga wl̈oshko dwayo.
Eni ga l̇l̇ëye bangkjrëy l̇l̇ëm,
dbar kjwobi go, shji l̈öng së obishko ga
ba tjl̈õkwo l̈i söy ga pjl̈ú, pjl̈o bek, owa l̇l̇ëme.
76-77 Ga pja, bor wa,
pja jek Tjl̈apga tjwe l̈i bäm goshko, irbo poshäryëp shäng ba kong wl̈eni.
E kjĩshko ga pja kowëba Sbö Tjwl̈õ Kësbangyo tjl̈õkwo l̈aga.
Ba tjl̈õkwo l̈orop ba nopga kong l̈i go ga
miyde l̈ok ga owa pjang ba go l̈i l̈öna Sbörë beno dret,
ga döra l̇l̇ëbo owa shärye l̈öng l̈i dbo dorko dwayo,
shdũya Sbörë ame wl̈o.
L̈örop ba kong l̈i, e irbo poshäryëp shäng ba kong wl̈eni.
78-79 Bi Sbö, shji woyde ara, shji songe l̈e ĩyado.
Miyde ga shji tjeng kjok ro sĩ roy wl̈eni,
shji wol̈on l̈i, e bangkjrëy arae.
Eni kuzong ga bi kong bi döga iche tjwe kjl̈ara kjok dogo dwayo,
kãl̈ã shjiy dl̈o wl̈eni,
dba, e ie ber bi kong tjagl̈ën wl̈eni.
Dl̈o l̈i kãl̈ã të shjiy shji l̈öng l̈ishko,
shji ber tjeng kjok ro sĩ roy ame wl̈o,
shji wol̈on l̈i, e bangkjrëy ame wl̈o bakoe.
Irbo pjl̈ú l̈i, e pĩya bi kong, shji ber l̈öng wl̈ẽp wl̈o» l̈e.
80 Ga chida l̈i kun jem, ga ba wotjl̈ĩk pjl̈ú l̈i kun jem bakoe. Öötong kësbangshko ga öötong sök kjok dogro no l̇l̇ëmshko, äär jong ba dbar opping Israel tjëyoga kong, Sbö tjl̈õkwo roy l̈e ba kong wl̈o l̈i öötong guing.