Carta a los Filipenses
Kjibokwo ëre tara Pablorë Filipos sopga kong
Kjibokwo ëre sorë
Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Dënashko ga Pablo öötong shäng Filipos kjokyo Silas, Timoteo tjok, Jesús roy pjl̈ú l̈ë. Eshko ga nopga ara omtjl̈õkwo kjrono, tak pjang Hechos 16.12-40 go sorë l̈i eni. Pjl̈ara ga Pablo sök kjërshko Roma kjokyo, Jesús roy pjl̈ú l̈ara kjĩshko. Epga ommiydonoshko ga l̇l̇ëbo ichara l̈ok ba kjimtokl̈o, dbur bakoe. Ichara l̈ok domer kjl̈ara ko Epafrodito tjok. E kjĩshko ga kjibokwo ëre tara Pablorë, e beno wopjl̈ú ba kong l̈i l̈okl̈o.
Eshkoshko ga Jesús tjl̈õkwo kjragaga l̈öng Filipos kjokyo l̈i shdungoba ara. Eni ga kjibokwo ëre go ga Pablo shdungoba ara ëmdë ga shäng wopjl̈ú l̈i roy jyã tara, epga dbokjrë e go wl̈o. Ga epga ichara ber l̈öng wotöshko, ga ëng kjimtë kar kar bakoe.
Eshko dbaryo ga judíoga kjone kjone to l̈öng tjl̈ẽ ga shji där wl̈o ga woyde ga shji mär Jesús go dö l̇l̇ëm, woyde ga kjok l̇l̇gwekkl̈o tara Moisésdë l̈i söy bakoe l̈e l̈öng eni, miga jyõ erä. E kjĩshko ga kjibokwo ëre go ga Jesús tjl̈õkwo kjragaga l̈i ichara Pablorë ber l̈öng sjëk, nopga eniyo tjok.
Kjibokwo ëre tara ba kongshko ga sök no shdũzl̈ong uyo roshko Roma kjokyo, Jesús roy pjl̈ú l̈ara kjĩshko, tak pjang Hechos 28.16-31 go sorë l̈i eni.
1
Kjibokwo ëre taga tja Pablorë, Timoteo tjok. Tjawa Cristo Jesús parkaga.
Sbö nopga töno beno tjeng Cristo Jesús tjok l̈öng Filipos kjokyo, kjibokwo ëre ichërwa jek bomi kong, bomi kägäyoga kong, ëye parkë l̈öng bomi tjok l̈i kong bakoe.
Rokër bi Data Sbö kong, Tjl̈apga Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe.
Pablo syõshtono Sbö kong Filipos sopga kjĩshko
3-5 Tja öör Jesús roy pjl̈ú l̈ë bomi kong dämärshko tek l̈ëkong ga pjãy l̈öng parkë Jesús kong bor tjok pjl̈ú ĩyado. E kjĩshko ga pjãy woyotjl̈ĩnshko ga tja wopjl̈ú Sbö tjok, ga tja syõshtë ba kong bomi kjĩshko wopjl̈úe. Sbö tjl̈õkwo pjl̈ú l̈i kjroromishko ga l̇l̇ëbo pjl̈ú shäryara Sbörë bomi pjl̈úshko, ga miydër ga shärye jek këgong, äär jong Cristo Jesús tjwe iröng obi guing.
Sbö wopjl̈ú l̈i kjĩshko ga «Jesús roy pjl̈ú l̈i, e jl̈õe» l̈ër to shäng tjl̈apgaga këskës bokshtoshko ga pjãy iara Sbörë beno l̈öng bor kjimtaga. Ga tja bängzak shäng ëreshko orkwo kjrochak pjir dröng sho goshko ga pjãy l̈öng bor kjimtë obi. E kjĩshko ga pjãy uunkong woydër ara. Eni kuzong ga tja wopjl̈ú bomi kjĩshko l̈i, e pjl̈úe. Pjãy uunkong ĩn woydë ara, e miyde Sbörë pjire. Pjãy woydër ara, shji woyde Cristo Jesúsdë sorë ga eni.
Tja syõshtë Sbö kong bomi kjĩshkoshko ga rokër ba kong ga pjãy kjimte dbar kjwobi go obl̈ë woydë jek këgong këgong. Rokër ba kong obi ga pjãy opping jek këgong këgong ba kjok miydë l̈i go, ba wotjl̈ĩk pjl̈ú l̈i go bako, 10 l̇l̇ëbo pjl̈ú anmoyõ l̈i shäryëmi ĩyado wl̈o. Eni ga pjãy ber l̈öng pjl̈o bek, pogo l̇l̇ëye dret Sbö bokso, äär jong Cristo tjwe iröng obi guing. 11 Ga rokër ba kong ga pjãy kjimte Jesucristorë jëk l̈öng pjl̈o bek ĩyado, pjãy ĩkoba wl̈o, Sbö poshrëkoba bomi kjĩshko wl̈o, Sbö iëba ber tjwl̈õ ara anmoyõ bomi kjĩshko wl̈o bakoe.
Pablo sök kjërshko, Cristo tjl̈õkwo roy pjl̈ú l̈e kjĩshko
12 Pjeyoga, l̇l̇ëye weno bor kong dö l̈i, e shäryono Jesús roy pjl̈ú shdär jek këgong wl̈o. E l̈ër bomi kong, miydëmi wl̈o. 13 Eerishko ga no dagaga parkë l̈öng no l̇l̇gwezl̈ong uyo ëreshko, nopga obl̈ë obl̈ë, miyde l̈ok ga tja iak shäng kjërshko orkwo kjrochak pjir dröng sho go, Cristo kjĩshko. 14 Bi pjeyoga l̇l̇amo l̈öng kës l̈i, tja roy kuya l̈ok ga opyono mär l̈öng Sbö tjl̈õkwo roy l̈ë jl̈õkoyo, l̇l̇ëye bangkjre l̈ok ame.
15-17 No kjong kjong Cristo roy l̈ë wopjl̈ú go. Shärye l̈ok eni, tja woyde ara kjĩshko. Miyde l̈ok ga tja iak shäng ëreshko, «Cristo tjl̈õkwo roy pjl̈ú l̈i, e jl̈õe» l̈ër oba kong wl̈o. Gueniyo kjong kjongda oml̈ë, gueniyo wotjl̈ĩk l̈öng obl̈ë. Shärye l̈öng eni, tja woyde l̇l̇ëm kjĩshko, äär ber tjwl̈õ ara bor kjinmo wl̈o. Woyde l̈ok ga songyo kjrër ara anmoyõ ëreshko l̈e. Miydër ga eni. 18-19 Gueniyo ga e l̇l̇ëye l̇l̇ëme. Cristo roy, e l̈e l̈öng enido. Wotjl̈ĩk pjl̈úre, de oware, gueniyo Cristo roy l̈e l̈öng enido. Tja wopjl̈ú e kjĩshko.
L̇l̇ëbo weno bor kong owa ara ëre kjĩshko ga pjãy syõshtë l̈öng Sbö kong bor kjĩshko ara, ga tja kjimte Jesucristo Sëyarë ara bakoe. E kjĩshko ga miydër ga tja där, ga tja ber shäng wopjl̈ú ara anmoyõ e kjĩshko. 20 Bor kong ga Cristo tjl̈õkwo l̈ökyokjrër kjwe ga tja ber l̈ök ara eshko. Woydër eni l̇l̇ëme. Gueniyo miydër ga tja sgara shäng tjl̈ẽ Cristo kjĩshko sorë ga tja tjl̈ẽ eni ĩyado, ĩkoba ga Cristo, e tjwl̈õ ara l̈ëba wl̈o. Woydër ga tja sök sëre, de tja zrörabare, l̈ëba eni ĩyado. 21 Bor kong ga tja beno shäng ga tja shäng l̇l̇ëbo shäryë Cristo kong wl̈o eröe. Ga tja wol̈ono ga bor kong ga pjl̈ú anmoyõ. 22 Eni gueniyo ga tja sök kjok ëre kjing go obishko ga nopga kjimtër jek këgong ga pjl̈úe. ¿Woydër kjone dey yal̈ë? Miydër l̇l̇ëme. 23 Bor kong ga pjl̈úyo kjone dey l̈ër ga kjange. Tja wotjl̈ĩk kjrina ga tja wol̈on dey, tja to ber sök Cristo tjok wl̈o, e bor kong ga pjl̈ú anmoyõ. 24 Gueniyo tja wotjl̈ĩk kjrina obi ga ber pjl̈ú bomi kong wl̈o ga tja ber sök kjok ëre kjing go obi dey. 25 Miydër pjl̈ú ga eni. E kjĩshko ga miydër ga tja ber sök bomi tjok obi, pjãy kjimtër mär ber l̈öng Cristo go jek këgong wl̈o. Eshko ga pjãy ber l̈öng wopjl̈ú ara anmoyõ. 26 Ga tja sök bomi tjok obishko ga pjãy l̈öng wopjl̈ú Cristo Jesús tjok bor kjĩshko.
27 L̇l̇ëbo wen bor kong sorë pogo ga Cristo roy pjl̈ú l̈i kjroromi kuzong ga woydër ga pjãy jëk pjl̈o bek e go, Cristo roy pjl̈ú l̈i tjwl̈õ ara l̈ëba wl̈o. Eni ga tja äär bomi ĩkde, de pjãy roy kur eröre, miydër ga pjãy l̈öng wotjl̈ĩk kjrinaso, pjãy l̈öng parkë uunkong no kjl̈araso wl̈eni, Cristo roy shdär oba uunkong kong wl̈o. 28-29 L̇l̇ëbo shäryara Sbörë bomi kong pjl̈úe. Pjãy iara beno l̈öng mär Cristo go. Gueniyo erö l̇l̇ëme. Pjãy iara beno shdungoba song ba kjĩshko bakoe. Era l̇l̇ëbo pjl̈ú bomi kong bakoe. E kjĩshko ga bomi wl̈oyoga, e bangkjrëmi sira l̇l̇ëme. E goshko ga miyde l̈ok ga to jeno wl̈o, ga pjãyda där wl̈o. E l̈aga Sbörë eni. 30 Dënashko ga tja shdunaba sorë l̈i ĩnomi wẽl̈ëe. Eerishko ga roy kumi l̈öng ga tja shdungoba shäng e kjoyo obi. Ga miydër ga shäryëba l̈öng bomi kong eni bakoe.