3
1 Eni ëmdë ga ëye judío, ëye doyo jyã tak pjir, e l̇l̇ëno l̇l̇ëme l̈otë l̇l̇ëme.
2 Sbö tjl̈õkwo onmo l̈i iara beno tjeng ba wl̈oshko.
3 Gueniyo kjone kjone Sbö rayono pjire. ¿E kjĩshko ga l̇l̇ëye l̈ara Sbörë ba kong jl̈õkoyo l̈i shärye eni l̇l̇ëme l̈ëmire?
4 Eni l̇l̇ëme. Nopga uunkong jyõrkë wl̈eni ëmdë ga Sböra tjl̈ẽ bek ĩyado, tak pjang ba tjl̈õkwo go sorë l̈i eni. Tjl̈ẽ ga
«Pja rotëbashko ga
tjl̈õkwo l̈orop kës l̈i, e beke l̈ëba eni.
Ëbo l̇l̇gwepshko ga
l̇l̇gwerop beke l̈ëba eni bakoe.»
5 No kjone kjone tjl̈ẽ ga «Tjawa l̇l̇ëbo owa shäryono kjĩshko ga ĩkoba wẽl̈ë e go ga Sbö, e pjl̈o beke. E kjĩshko ga tjawa shdũya Sbörë l̈i owa» l̈e l̈ok eni.
6 Miga eni l̇l̇ëme. ¿Sbö owa jl̈õkoyo kjwe ga nopga l̈öng kjok ëre kjing go l̈i l̇l̇gweya sorëro?
7 No kjone kjone obi tjl̈ẽ ga «Tjawa jyõrkono kjĩshko ga ĩkoba wẽl̈ë e go ga Sbö, e tjl̈ẽ beke. Eshko ga Sbö beno kësbang, tjwl̈õ ara. ¿Eni ga tjawa shdũya l̇l̇ëbo owa shäryororwa l̈i kjĩshko ega?» l̈e l̈ok eni.
8 Eni wl̈eni kjwe ga «L̇l̇ëbo owa shäryoydë dey, l̇l̇ëbo pjl̈ú l̈i wen wl̈o» l̈ëy eni dey. No kjone kjone tjl̈ẽ ga tjawa tjl̈ẽno eni l̈e, miga e l̈orwarë eni l̇l̇ëme. Ëye tjl̈ẽno eni ga shdũya Sbörë beke.
Ëye sök pjl̈o bek l̇l̇ëme
9 ¿Eni ga shji judío kjĩshko ga shji pjl̈ú, obl̈ë kjinmore? Eni l̇l̇ëme. Judíoga, nopga judío l̇l̇ëm wl̈eniyo, e l̇l̇ëbo owa shäryono uunkong, l̈ororwa sorë l̈i eni,
10 tak pjang Sbö tjl̈õkwo go sorë l̈i eni. Tjl̈ẽno beno eni:
«Ëye pjl̈o bek Sbö bokso kjl̈ara l̇l̇ëm,
11 Sbö tjl̈õkwo l̇l̇ë l̈okl̈o miydaga ërë l̇l̇ëm,
Sbö wl̈ẽga ërë l̇l̇ëm bakoe.
12 Sbö rayara nopga uunkongdë,
beno l̈öng tjwl̈õ l̇l̇ëme.
L̇l̇ëbo pjl̈ú l̈i shäryaga ërë l̇l̇ëme.»
13 «Epga jyõrkë erä.
Ga tjl̈õkwo l̈e l̈ok l̈i kjĩshko ga
nopga wol̈on.»
«Shji uara dgurdë ga shji wol̈on,
ga tjl̈õkwo l̈e l̈ok l̈i kjĩshko ga nopga wol̈on bakoe.»
14 «Tjl̈ẽ owa ĩyado,
l̇l̇ëbo wen owa obl̈ë kong wl̈o.»
15 «Wotjl̈ĩk no zrök erä.
16 To l̈öng kjone pogo ga no kjone kjone pjiya, kjone kjone ie ber l̈öng woydë ara bakoe.
17 To l̈öng wl̈ẽp obl̈ë tjok sorë miyde l̈ok l̇l̇ëme.»
18 «Sbö ëmdë ga bangkjre l̈ok l̇l̇ëme.»
19 Miydëy ga kjok l̇l̇gwekkl̈o l̈i twara Sbörë judíoga kong, kol̈e l̈ok wl̈o. Shäryara eni, nopga uunkong l̇l̇gweyashko ga l̇l̇ëye l̈e l̈ok ba kong ga ä wl̈o.
20 Kjok l̇l̇gwekkl̈o kës l̈i kol̈aga ërë l̇l̇ëme. E kjĩshko ga ëye ie Sbörë ber pjl̈o bek ba bokso, kjok l̇l̇gwekkl̈o l̈i kjĩshko l̇l̇ëme. Kjok l̇l̇gwekkl̈o l̈i twara beno e kong wl̈o l̇l̇ëm, twara beno shji l̇l̇ëbo owa shäryë l̈i miydokl̈o wl̈o erä.
Nopga ie Sbörë ber pjl̈o bek ba bokso, mär Jesucristo go kjĩshko
21 Nopga ber pjl̈o bek Sbö bokso sorë l̈i tara beno pjang kjok l̇l̇gwekkl̈o tara Moisésdë l̈i go, kjibokwo tara Sbö tjl̈õkwo l̈agaga tek dënashko sorë l̈i go bakoe. Ga eerishko ga e pina Sbörë bi kong wẽl̈ëe. Nopga ber pjl̈o bek ba bokso, kjok l̇l̇gwekkl̈o l̈i kjĩshko l̇l̇ëme.
22 Nopga ie ber pjl̈o bek ba bokso, mär Jesucristo go kjĩshko erä. Nopga uunkong döya eni, judíoga, nopga judío l̇l̇ëm wl̈eniyo bakoe.
23 Nopga uunkong l̇l̇ëbo owa shäryono, l̇l̇ëye woyde Sbörë shärye wl̈o l̈i shäryaga ërë l̇l̇ëme.
24 Gueniyo Sbö wopjl̈ú l̈i kjĩshko ga nopga döya ba shdunggl̈o dbo dorko dwayo iguing, Cristo Jesús wol̈ono ba kjĩshko l̈i kjĩshko. Nopga ie ber pjl̈o bek ba bokso eni.
25-26 Jesucristo ichara wol̈on, owa pjang nopga go l̈i l̈ö̃ya ber dret ga pjl̈ú wl̈o, mär l̈öng srëng kwono l̈i go kjĩshko. E kjĩshko ga beno l̈öng shdungko ame. Shäryara eni, l̇l̇ëbo shärye bek ĩyado l̈i pĩya nopga kong wl̈o. Dënashko ga nopga shduna l̇l̇ëbo owa shäryara l̈i kjĩshko l̇l̇ëm, iirkë mal̈ing l̇l̇ëm kjĩshko. Gueniyo eerishko ga ëye mär Jesús go ga ie ber pjl̈o bek ba bokso. Miydëy e go ga l̇l̇ëbo uunkong shärye bek ĩyado.
27-28 ¿Eni ga shji krë l̇l̇ë kjĩshko ga pjl̈ú? Shji krë l̇l̇ë kjĩshko ga äe. Miydëy pjl̈ú ga nopga ber pjl̈o bek Sbö bokso, mär Jesús go kjĩshko, kjok l̇l̇gwekkl̈o l̈i kol̈e kjĩshko l̇l̇ëme. Eni ga shji krë l̇l̇ë kjĩshko ga äe.
29 ¿Ga Sbö, e judíoga Sbö eröre? Eni l̇l̇ëme. E nopga judío l̇l̇ëm wl̈eniyo Sbö bakoe.
30 Sbö sök kjl̈araso eröe. Nopga doyo jyã tak pjir l̈i ie ber pjl̈o bek ba bokso, mär l̈öng Jesús go kjĩshko. Nopga doyo jyã tak l̇l̇ëm l̈ira ie ber pjl̈o bek ba bokso, mär l̈öng Jesús go kjĩshko bakoe.
31 ¿Eni ga pjãy wotjl̈ĩk ga tjawa mär l̈öng Jesús goshko kuzong ga kjok l̇l̇gwekkl̈o l̈i ber tjwl̈õ ame l̈orwarë l̈öng eni l̈ëmire? Eni l̇l̇ëme. Kjok l̇l̇gwekkl̈o l̈i tjwl̈õ ara l̈orwarë.